അതിർത്തിയിൽ ‘ടോൾ കെണി’; നോവ സ്കോഷ്യ – ന്യൂ ബ്രൺസ്‌വിക്ക് യാത്ര ഇനി ചിലവേറും, പ്രതിഷേധവുമായി ജനങ്ങൾ

ഫ്രെഡറിക്റ്റൺ: ന്യൂ ബ്രൺസ്‌വിക്ക് പ്രവിശ്യാ അതിർത്തിയിൽ പുതിയ ടോൾ സ്റ്റേഷൻ സ്ഥാപിക്കാനുള്ള സർക്കാർ നീക്കം കാനഡയിലെ അറ്റ്‌ലാന്റിക് മേഖലയിൽ വലിയ പ്രതിഷേധത്തിന് വഴിതെളിക്കുന്നു. പ്രീമിയർ സൂസൻ ഹോൾട്ട് ചൊവ്വാഴ്ച അവതരിപ്പിച്ച ബജറ്റിലാണ് ട്രാൻസ്-കാനഡ ഹൈവേയിലെ ഓലക് (Aulac) മേഖലയിൽ ടോൾ ഏർപ്പെടുത്തുമെന്ന് പ്രഖ്യാപിച്ചത്. 2028-ഓടെ പ്രവർത്തനമാരംഭിക്കുന്ന ടോൾ പ്ലാസയിലൂടെ പ്രതിവർഷം 10.4 ദശലക്ഷം ഡോളർ വരുമാനമാണ് സർക്കാർ ലക്ഷ്യമിടുന്നത്.

പുതിയ പരിഷ്കാരം അതിർത്തി നഗരമായ ആംഹെർസ്റ്റിലെ (Amherst) താമസക്കാരെയും ചെറുകിട വ്യാപാരികളെയും കടുത്ത പ്രതിസന്ധിയിലാക്കും. നോവ സ്കോട്ടിയയെ രാജ്യത്തിന്റെ മറ്റ് ഭാഗങ്ങളുമായി ബന്ധിപ്പിക്കുന്ന ഏക കരമാർഗ്ഗമാണിത് എന്നതിനാൽ, ടോൾ ഏർപ്പെടുത്തുന്നത് ചരക്ക് നീക്കത്തെയും നിത്യേനയുള്ള യാത്രകളെയും ബാധിക്കുമെന്ന് കംബർലാൻഡ് കൗണ്ടി മേയർ റോഡ് ഗിൽറോയ് ചൂണ്ടിക്കാട്ടി. നിലവിലെ സാമ്പത്തിക സാഹചര്യത്തിൽ ഈ അധിക നികുതി സാധാരണക്കാർക്ക് താങ്ങാനാവില്ലെന്നാണ് പ്രാദേശിക ഭരണകൂടങ്ങളുടെ നിലപാട്.

പ്രഖ്യാപനം തികച്ചും അപ്രതീക്ഷിതമായിരുന്നുവെന്ന് ആംഹെർസ്റ്റ് മേയർ റോബ് സ്മോൾ പറഞ്ഞു. മുൻപ് ഇതേ മേഖലയിലുണ്ടായിരുന്ന ടോൾ ഒഴിവായതിന്റെ ആശ്വാസത്തിലായിരുന്നു ജനങ്ങൾ. എന്നാൽ അതിർത്തിയുടെ മറുഭാഗത്ത് വീണ്ടും ടോൾ വരുന്നത് അംഗീകരിക്കാനാവില്ലെന്ന് അദ്ദേഹം വ്യക്തമാക്കി. മോങ്ക്ടണിലെ ആശുപത്രികളെ ആശ്രയിക്കുന്ന രോഗികൾക്കും നിത്യേന ജോലിക്ക് പോകുന്നവർക്കും ഇത് വലിയ സാമ്പത്തിക ബാധ്യത വരുത്തും.

പ്രാദേശിക ബിസിനസ് സ്ഥാപനങ്ങളും ആശങ്കയിലാണ്. ആംഹെർസ്റ്റിലെ തൊഴിലാളികളിൽ മൂന്നിലൊന്ന് ഭാഗവും ജോലി ആവശ്യങ്ങൾക്കായി നിത്യേന ന്യൂ ബ്രൺസ്‌വിക്കിലേക്ക് പോകുന്നവരാണ്. കുറഞ്ഞ വേതനത്തിന് ജോലി ചെയ്യുന്നവരെ സംബന്ധിച്ചിടത്തോളം യാത്രയ്ക്കായി വലിയൊരു തുക ടോൾ ഇനത്തിൽ നൽകേണ്ടി വരുന്നത് ജീവിതച്ചെലവ് വർദ്ധിപ്പിക്കും. കൂടാതെ, ടോൾ ഏർപ്പെടുത്തുന്നത് അന്തർ-പ്രവിശ്യാ വ്യാപാരത്തെയും വിനോദസഞ്ചാരത്തെയും പ്രതികൂലമായി ബാധിക്കുമെന്ന് വ്യാപാരികൾ ഭയപ്പെടുന്നു.

ടോൾ നിരക്ക് സംബന്ധിച്ച് സർക്കാർ ഇതുവരെ അന്തിമ തീരുമാനമെടുത്തിട്ടില്ല. എങ്കിലും നോവ സ്കോട്ടിയയിലെ കോബെക്വിഡ് പാസിലെ നിരക്കുകൾക്ക് (വാഹനത്തിന് ഏകദേശം 4 ഡോളർ) സമാനമായ തുക ഈടാക്കാനാണ് സാധ്യതയെന്ന് ഔദ്യോഗിക വൃത്തങ്ങൾ സൂചിപ്പിക്കുന്നു. അന്താരാഷ്ട്ര വ്യാപാര ബന്ധങ്ങൾ ശക്തിപ്പെടുത്തേണ്ട ഘട്ടത്തിൽ ഇത്തരമൊരു തീരുമാനം തിരിച്ചടിയാകുമെന്ന് രാഷ്ട്രീയ നിരീക്ഷകരും വിലയിരുത്തുന്നു. ടോൾ സ്റ്റേഷൻ സ്ഥാപിക്കുന്നതിനുള്ള കൃത്യമായ സ്ഥലം കണ്ടെത്താനുള്ള നടപടികൾ പുരോഗമിക്കുകയാണ്.

toll-talk-ns-border-town-balks-at-nb-budget-decision

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt