ഒട്ടാവ: കാനഡയുടെ സായുധ സേനയ്ക്കുള്ളിൽ തീവ്രവാദ ചിന്താഗതികൾ വേരുറപ്പിക്കുന്നുവോ എന്ന ചോദ്യമുയർത്തി പുതിയ അന്വേഷണ റിപ്പോർട്ട് പുറത്ത്. വെള്ളക്കാർക്ക് മാത്രമായി പ്രവർത്തിക്കുന്നതും നിയോ-നാസി (Neo-Nazi) ആശയങ്ങൾ പ്രചരിപ്പിക്കുന്നതുമായ ‘വൈറ്റ്ഡേറ്റ്’ (WhiteDate) എന്ന ഡേറ്റിംഗ് വെബ്സൈറ്റിൽ കനേഡിയൻ സൈനികർ അംഗങ്ങളാണെന്ന് അന്വേഷണത്തിലൊടുവിൽ കണ്ടെത്തിയത്. ‘നാസികൾക്കുള്ള ടിൻഡർ’ എന്ന് അറിയപ്പെടുന്ന ഈ സൈറ്റിലെ വിവരങ്ങൾ ഒരു ഹാക്കർ പുറത്തുവിട്ടതോടെയാണ് ഞെട്ടിപ്പിക്കുന്ന വിവരങ്ങൾ പുറത്തുവന്നത്.
ഹാക്കിംഗിലൂടെ പുറത്തുവന്ന രഹസ്യങ്ങൾ
2017-ൽ ആരംഭിച്ച വൈറ്റ്ഡേറ്റ്, വെളുത്ത വർഗ്ഗക്കാർക്ക് മാത്രമായുള്ള പ്ലാറ്റ്ഫോം എന്ന നിലയിലാണ് സ്വയം വിശേഷിപ്പിക്കുന്നത്. വംശീയ വിദ്വേഷം പടർത്തുന്ന സന്ദേശങ്ങളും ചിഹ്നങ്ങളും സൈറ്റിൽ വ്യാപകമായി ഉപയോഗിക്കുന്നുണ്ട്. കഴിഞ്ഞ ഡിസംബറിൽ ‘മാർത്ത റൂട്ട്’ എന്നറിയപ്പെടുന്ന അജ്ഞാത ഹാക്കർ സൈറ്റ് തകർക്കുകയും ഉപഭോക്താക്കളുടെ വിവരങ്ങൾ പരസ്യപ്പെടുത്തുകയും ചെയ്തിരുന്നു. ഇതിൽ കാനഡയിൽ നിന്നുള്ള അഞ്ഞൂറോളം അക്കൗണ്ടുകൾ ഉണ്ടെന്ന് കണ്ടെത്തി. ഇവയിൽ 200 പേരെ തിരിച്ചറിഞ്ഞപ്പോഴാണ് സൈനികരുടെ സാന്നിധ്യം വ്യക്തമായത്.
നിരീക്ഷണത്തിൽ ഉന്നത ഉദ്യോഗസ്ഥർ
തിരിച്ചറിഞ്ഞവരിൽ റോയൽ കനേഡിയൻ എയർഫോഴ്സിലെ കമ്മ്യൂണിക്കേഷൻ എഞ്ചിനീയറിംഗ് ഓഫീസറായ ട്രിസ്റ്റൻ ആംസ്ട്രോംഗ്, നേവി റിസർവിസ്റ്റായ ബ്രോഗൻ ഹേൽ, ഇൻഫൻട്രി റെജിമെന്റിലെ കോർപ്പറലായ ബ്രാൻഡൻ ലോങ്പ്രെ എന്നിവർ ഉൾപ്പെടുന്നു.
ബ്രോഗൻ ഹേൽ: തന്റെ സോഷ്യൽ മീഡിയ അക്കൗണ്ടുകളിൽ ഇന്ത്യക്കാർക്കും വെള്ളക്കാരല്ലാത്തവർക്കും എതിരെ ‘ജൈവായുധം’ പ്രയോഗിക്കണമെന്നതടക്കമുള്ള വംശീയ വിദ്വേഷ പോസ്റ്റുകൾ പങ്കുവെച്ചതായി കണ്ടെത്തി.
ട്രിസ്റ്റൻ ആംസ്ട്രോംഗ്: കാനഡയുടെ അത്യാധുനിക യുദ്ധവിമാനങ്ങൾ വാങ്ങുന്നതിനുള്ള തന്ത്രപ്രധാനമായ ‘ഫ്യൂച്ചർ ഫൈറ്റേഴ്സ് കേപ്പബിലിറ്റി പ്രോജക്റ്റിൽ’ ജോലി ചെയ്യുന്ന ഉദ്യോഗസ്ഥനാണ് ഇദ്ദേഹം.
തീവ്രവാദ ആശയങ്ങൾ പിന്തുടരുന്നവർ സൈനിക പരിശീലനവും ആയുധങ്ങളും രഹസ്യ വിവരങ്ങളും കൈകാര്യം ചെയ്യുന്നത് രാജ്യസുരക്ഷയ്ക്ക് വൻ ഭീഷണിയാണെന്ന് ഇൻസ്റ്റിറ്റ്യൂട്ട് ഫോർ സ്ട്രാറ്റജിക് ഡയലോഗ് ഡയറക്ടർ കാതറിൻ കെനീലി മുന്നറിയിപ്പ് നൽകി.
അന്വേഷണം പ്രഖ്യാപിച്ച് പ്രതിരോധ മന്ത്രാലയം
വിഷയം ഗൗരവകരമാണെന്നും ആരോപണവിധേയരായ ഉദ്യോഗസ്ഥർക്കെതിരെ അന്വേഷണം ആരംഭിച്ചതായും കാനഡയുടെ പ്രതിരോധ മന്ത്രാലയം അറിയിച്ചു. സായുധ സേനയുടെ മൂല്യങ്ങൾക്കും ധാർമ്മികതയ്ക്കും വിരുദ്ധമായി സൈനികർ ഓൺലൈനിൽ പെരുമാറുന്നത് അനുവദിക്കാനാവില്ലെന്നും അധികൃതർ വ്യക്തമാക്കി.
ആരോപണവിധേയരായ മൂന്ന് ഉദ്യോഗസ്ഥരും പ്രതികരിക്കാൻ തയ്യാറായില്ല. ഇതിന് പിന്നാലെ ഇവരുടെ മിക്ക സോഷ്യൽ മീഡിയ അക്കൗണ്ടുകളും നീക്കം ചെയ്യപ്പെടുകയോ സ്വകാര്യമാക്കുകയോ ചെയ്തിട്ടുണ്ട്. കാനഡയിലെ തീവ്ര വംശീയ സംഘടനകളുടെ നേതാക്കളും ഈ സൈറ്റിൽ സജീവമാണെന്ന് കണ്ടെത്തിയിട്ടുണ്ട്. വംശീയ വിദ്വേഷം സൈന്യത്തിനുള്ളിലേക്ക് പടരുന്നത് തടയാൻ കർശനമായ പരിശോധനകൾ ആവശ്യമാണെന്ന വാദം ഇതോടെ ശക്തമായിരിക്കുകയാണ്.
whitedate-canada-military
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
