അറ്റ്‌ലാന്റിക് കാനഡയിലെ ഓഫ്‌ഷോർ വിൻഡ് പദ്ധതികൾ: വൈദ്യുതി ഉൽപ്പാദന ശേഷി പ്രതീക്ഷിച്ചതിലും കുറവെന്ന് റിപ്പോർട്ട്

ഹാലിഫാക്സ്: ലോകത്തിലെ തന്നെ ഏറ്റവും മികച്ച ഓഫ്‌ഷോർ വിൻഡ് ഊർജ്ജ സ്രോതസ്സുകളിൽ ഒന്നാണ് അറ്റ്‌ലാന്റിക് കാനഡയെന്ന് പുതിയ റിപ്പോർട്ട്. എന്നാൽ, മേഖലയിലെ രാഷ്ട്രീയ നേതൃത്വങ്ങൾ വിഭാവനം ചെയ്യുന്നത്ര വൈദ്യുതി ഉൽപ്പാദനം പ്രായോഗികമായി സാധ്യമായേക്കില്ലെന്ന് എൻജിനീയറിങ് സ്ഥാപനമായ ‘സ്റ്റാന്റെക്’ തയ്യാറാക്കിയ പഠനറിപ്പോർട്ട് ചൂണ്ടിക്കാട്ടുന്നു. കേന്ദ്ര ഗവൺമെന്റിനായി അറ്റ്‌ലാന്റിക് പ്രവിശ്യകളുടെയും പവർ കമ്പനികളുടെയും പങ്കാളിത്തത്തോടെയാണ് ഈ റിപ്പോർട്ട് തയ്യാറാക്കിയത്.

സമുദ്രത്തിലെ ശക്തമായ കാറ്റും വികസന സാധ്യതകളും റിപ്പോർട്ട് ശരിവെക്കുന്നുണ്ടെങ്കിലും ഉൽപ്പാദനത്തിന് നിരവധി തടസ്സങ്ങളുണ്ടെന്ന് പഠനം പറയുന്നു. സമുദ്രത്തിന്റെ ആഴം, സമുദ്ര സംരക്ഷിത മേഖലകൾ, ഐസ് രൂപപ്പെടാനുള്ള സാധ്യത, കപ്പൽ ഗതാഗത പാതകൾ, മത്സ്യബന്ധന മേഖലകൾ എന്നിവ പരിഗണിക്കുമ്പോൾ ടർബൈനുകൾ സ്ഥാപിക്കാൻ സാധിക്കുന്ന ഇടങ്ങൾ പരിമിതമാണ്. കൂടാതെ, സമുദ്രത്തിൽ നിന്നുള്ള വൈദ്യുതി കരയിലേക്ക് എത്തിക്കാനുള്ള ട്രാൻസ്മിഷൻ ലൈനുകളുടെ ഭാരിച്ച ചെലവും സാമ്പത്തിക വെല്ലുവിളിയാണെന്ന് സ്റ്റാന്റെക് പ്രതിനിധി എറിക്ക വിക്സ് അറിയിച്ചു.

നോവ സ്കോഷ്യ പ്രീമിയർ ടിം ഹൂസ്റ്റൺ പ്രഖ്യാപിച്ച ‘വിൻഡ് വെസ്റ്റ്’ പദ്ധതിയുടെ ലക്ഷ്യങ്ങളുമായി താരതമ്യം ചെയ്യുമ്പോൾ സ്റ്റാന്റെക്കിന്റെ പ്രവചനങ്ങൾ ഏറെ താഴെയാണ്. 40 മുതൽ 66 ജിഗാവാട്ട് വരെ വൈദ്യുതി ഉൽപ്പാദിപ്പിക്കാമെന്ന് ഹൂസ്റ്റൺ അവകാശപ്പെടുമ്പോൾ, 2050-ഓടെ നോവ സ്കോഷ്യയിൽ പരമാവധി ഒൻപത് ജിഗാവാട്ട് വൈദ്യുതി മാത്രമേ ഉൽപ്പാദിപ്പിക്കാൻ കഴിയൂ എന്ന് റിപ്പോർട്ട് കണക്കാക്കുന്നു. അറ്റ്‌ലാന്റിക് കാനഡയിലെ നാല് പ്രവിശ്യകളിൽ നിന്നുമായി ആകെ 16.5 ജിഗാവാട്ട് ഉൽപ്പാദനമാണ് റിപ്പോർട്ട് പ്രവചിക്കുന്നത്.

മേഖലയിലെ പ്രവിശ്യകളിൽ നോവ സ്കോഷയാണ് നിലവിൽ പദ്ധതികളിൽ മുന്നിൽ നിൽക്കുന്നത്. ന്യൂഫൗണ്ട്‌ലാൻഡ് ആൻഡ് ലാബ്രഡോറിൽ 2050-ഓടെ നാല് മുതൽ അഞ്ച് ജിഗാവാട്ട് വരെ ശേഷിയുണ്ടാകുമെന്നാണ് കരുതുന്നത്. ന്യൂ ബ്രൺസ്‌വിക്ക് രണ്ട് ജിഗാവാട്ടും പ്രിൻസ് എഡ്വേർഡ് ഐലൻഡ് ഒരു ജിഗാവാട്ടും വൈദ്യുതി ഉൽപ്പാദിപ്പിക്കാൻ സാധ്യതയുണ്ടെന്നും റിപ്പോർട്ട് വ്യക്തമാക്കുന്നു. ആഴക്കടലിലെ ടർബൈനുകളുടെ നിർമ്മാണ ചെലവ് ഉയർന്നതാണെങ്കിലും ഭാവിയിൽ സാങ്കേതികവിദ്യ വികസിക്കുന്നതോടെ ചെലവ് കുറഞ്ഞേക്കാം.

കടൽക്കാറ്റിൽ നിന്നുള്ള വൈദ്യുതി വിതരണത്തിന് ആവശ്യമായ ട്രാൻസ്മിഷൻ സംവിധാനങ്ങൾ നിലവിൽ സജ്ജമല്ലെന്നത് വലിയൊരു പോരായ്മയായി പഠനം ചൂണ്ടിക്കാട്ടുന്നു. 2035-ഓടെ മാത്രമേ നോവ സ്കോഷ്യയിൽ ആദ്യ ടർബൈനുകൾ സ്ഥാപിക്കാൻ സാധിക്കൂ എന്നാണ് കമ്പനികളുടെ വിലയിരുത്തൽ. ട്രാൻസ്മിഷൻ ലൈനുകളുടെ വികസനത്തിനായി മാത്രം ഏകദേശം 20 ബില്യൺ ഡോളർ ചെലവ് വരുമെന്ന് കണക്കാക്കപ്പെടുന്നു. പഠനത്തിന്റെ അടുത്ത ഘട്ടത്തിൽ വൈദ്യുതി വിതരണ ശൃംഖലയെക്കുറിച്ചുള്ള വിശദമായ റിപ്പോർട്ട് പുറത്തുവിടും.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Offshore wind projects in Atlantic Canada: Report finds power generation capacity lower than expected