കുപ്രസിദ്ധ ലൈംഗിക കുറ്റവാളി ജെഫ്രി എപ്സ്റ്റീൻ തന്റെ ക്രിമിനൽ പശ്ചാത്തലം മറച്ചുവെച്ച് വാൻകൂവറിൽ പലതവണ സന്ദർശനം നടത്തിയിരുന്നതായി പുറത്തുവന്ന പുതിയ രേഖകൾ വ്യക്തമാക്കുന്നു. യുഎസ് നീതിന്യായ വകുപ്പ് വെള്ളിയാഴ്ച പുറത്തുവിട്ട മുപ്പത് ലക്ഷത്തോളം വരുന്ന എപ്സ്റ്റീൻ ഫയലുകളിലാണ് ഈ സന്ദർശനത്തെക്കുറിച്ചുള്ള ഞെട്ടിക്കുന്ന വെളിപ്പെടുത്തലുകളുള്ളത്.
രഹസ്യനീക്കങ്ങളും വാൻകൂവർ യാത്രകളും
2014-നും 2016-നും ഇടയിലുള്ള കാലയളവിൽ വാൻകൂവറിലെ ആഡംബര ഹോട്ടലുകളിൽ എപ്സ്റ്റീൻ താമസിച്ചിരുന്നതായി ഇമെയിൽ രേഖകൾ സാക്ഷ്യപ്പെടുത്തുന്നു. ലോകപ്രശസ്തമായ ടെഡ് കോൺഫറൻസ് നടക്കുന്ന സമയത്താണ് ഇയാൾ നഗരത്തിൽ എത്തിയിരുന്നത്. സ്വന്തം സ്വകാര്യ വിമാനത്തിൽ യാത്ര ചെയ്തിരുന്ന എപ്സ്റ്റീൻ, തന്റെ സന്ദർശനം അതീവ രഹസ്യമായി വെക്കാൻ പ്രത്യേകം ശ്രദ്ധിച്ചിരുന്നു. 2015-ലെ ഒരു യാത്രയ്ക്കായി ഹോട്ടൽ ബുക്ക് ചെയ്തപ്പോൾ, തന്റെ പേര് ഒരിടത്തും വെളിപ്പെടുത്തരുതെന്ന് ഇയാൾ കർശന നിർദ്ദേശം നൽകിയിരുന്നതായും രേഖകൾ പറയുന്നു.
2018-ലെ തിരിച്ചടിയും പ്രവേശന വിലക്കും
വർഷങ്ങളോളം സുരക്ഷാ ഏജൻസികളുടെ കണ്ണുവെട്ടിച്ച് കാനഡയിൽ പ്രവേശിച്ച എപ്സ്റ്റീന് 2018-ൽ കനത്ത തിരിച്ചടിയാണ് ലഭിച്ചത്. ആ വർഷം ഏപ്രിലിൽ വാൻകൂവറിൽ നടക്കാനിരുന്ന ടെഡ് കോൺഫറൻസിൽ പങ്കെടുക്കാൻ താത്കാലിക താമസ അനുമതിക്കായി ഇയാൾ ലോസ് ഏഞ്ചൽസിലെ കനേഡിയൻ കോൺസുലേറ്റിനെ സമീപിച്ചു. എന്നാൽ അപേക്ഷ വിശദമായി പരിശോധിച്ച അധികൃതർ ഏപ്രിൽ 4-ന് പ്രവേശനാനുമതി നിഷേധിക്കുകയായിരുന്നു. 2008-ൽ ഫ്ലോറിഡയിൽ പ്രായപൂർത്തിയാകാത്തവർക്കെതിരായ ലൈംഗികാതിക്രമക്കേസിൽ ശിക്ഷിക്കപ്പെട്ട ഹിസ്റ്ററിയാണ് എപ്സ്റ്റീന് വില്ലനായത്. ക്രിമിനൽ പശ്ചാത്തലമുള്ളവർക്ക് പ്രവേശനം അനുവദിക്കാത്ത കാനഡയിലെ കർശനമായ നിയമം മുൻനിർത്തിയാണ് അധികൃതർ ഇയാളെ തടഞ്ഞത്. എപ്സ്റ്റീന്റെ അന്താരാഷ്ട്ര തലത്തിലുള്ള ബന്ധങ്ങളുടെയും യാത്രകളുടെയും ആഴം വ്യക്തമാക്കുന്നതാണ് ഇപ്പോൾ പുറത്തുവന്ന ഈ പുതിയ വിവരങ്ങൾ.
Jeffrey Epstein secret visits to Canada
