ഹാലിഫാക്സ്: നോവ സ്കോഷ്യയിൽ വൈദ്യുതി വിതരണത്തിന്റെ വിശ്വാസ്യത വർദ്ധിപ്പിക്കുന്നതിനായി നടപ്പിലാക്കുന്ന ‘ഗ്രിഡ്-സ്കെയിൽ ബാറ്ററി’ പദ്ധതിയിലെ ആദ്യ രണ്ട് കേന്ദ്രങ്ങൾ പ്രവർത്തനമാരംഭിച്ചു. അറ്റ്ലാന്റിക് കാനഡയിലെ തന്നെ ഏറ്റവും വലിയ ബാറ്ററി ഇൻസ്റ്റാളേഷൻ പദ്ധതിയെന്നാണ് ഇതിനെ വിശേഷിപ്പിക്കുന്നത്. ബ്രിഡ്ജ് വാട്ടർ, വേവർലി എന്നിവിടങ്ങളിലെ രണ്ട് പ്ലാന്റുകളാണ് ഇപ്പോൾ പ്രവർത്തനസജ്ജമായിരിക്കുന്നത്. 2030-ഓടെ പ്രവിശ്യയിലെ മൊത്തം ഊർജ്ജത്തിന്റെ 80 ശതമാനവും പുതുക്കാവുന്ന സ്രോതസ്സുകളിൽ നിന്ന് കണ്ടെത്തുക എന്ന ലക്ഷ്യത്തിലേക്കുള്ള നിർണ്ണായകമായ ഒരു ചുവടുവെപ്പാണിത്.
പുതുക്കാവുന്ന ഊർജ്ജം സംഭരിച്ചുവെക്കാനും വൈദ്യുതി ആവശ്യം ഏറിനിൽക്കുന്ന സമയങ്ങളിൽ അത് വിതരണം ചെയ്യാനും ഈ ബാറ്ററി കേന്ദ്രങ്ങൾ സഹായിക്കും. കഠിനമായ തണുപ്പുള്ള സമയങ്ങളിൽ വൈദ്യുതി ഉപയോഗം ഏറ്റവും ഉയരത്തിൽ എത്തുമ്പോൾ ബാക്കപ്പ് സംവിധാനമായി ഇവ പ്രവർത്തിക്കും. കഴിഞ്ഞ ഡിസംബറിലെയും ജനുവരിയിലെയും അതിശൈത്യ സമയങ്ങളിൽ ഈ ബാറ്ററികൾ വിജയകരമായി പരീക്ഷിച്ചുവെന്ന് നോവ സ്കോഷ്യ പവർ ചീഫ് ഓപ്പറേറ്റിംഗ് ഓഫീസർ ഡേവ് പിക്കിൾസ് അറിയിച്ചു. പദ്ധതിയുടെ ഭാഗമായ മൂന്നാമത്തെ പ്ലാന്റ് 2026 ഓഗസ്റ്റിൽ വൈറ്റ് റോക്കിൽ പ്രവർത്തനമാരംഭിക്കുമെന്നാണ് കരുതുന്നത്.
ഏകദേശം 23.7 കോടി ഡോളർ ചെലവ് വരുന്ന ഈ പദ്ധതിയിൽ പ്രാദേശിക തദ്ദേശീയ കമ്മ്യൂണിറ്റികളുടെ പങ്കാളിത്തം വലിയ ശ്രദ്ധ നേടിയിട്ടുണ്ട്. നോവ സ്കോഷ്യയിലെ 13 മിക്മാക് (Mi’kmaw) കമ്മ്യൂണിറ്റികളുടെ ഉടമസ്ഥതയിലുള്ള ഡബ്ല്യു.എം.എ (WMA) എന്ന ഏജൻസിയാണ് ഈ സംരംഭത്തിൽ പങ്കാളികളായിരിക്കുന്നത്. കാനഡ ഇൻഫ്രാസ്ട്രക്ചർ ബാങ്ക് നൽകിയ 13.8 കോടി ഡോളർ വായ്പ വഴിയാണ് ഈ പങ്കാളിത്തം സാധ്യമായത്. ക്ലീൻ എനർജി മേഖലയിലേക്കുള്ള ഈ മാറ്റം തദ്ദേശീയ ജനതയ്ക്ക് സാമ്പത്തിക നേട്ടവും ഊർജ്ജ സുരക്ഷയും നൽകുമെന്ന് ഡബ്ല്യു.എം.എ പ്രസിഡന്റ് ക്രിസ്റ്റൽ നിക്കോളാസ് വ്യക്തമാക്കി.
നാച്ചുറൽ റിസോഴ്സസ് കാനഡയുടെ വിവിധ പദ്ധതികൾ വഴിയുള്ള സാമ്പത്തിക സഹായവും ഈ ഗ്രീൻ എനർജി പ്രോജക്റ്റിന് ലഭിച്ചിട്ടുണ്ട്. പൈപ്പ്ലൈനുകളെയും കൽക്കരിയെയും ആശ്രയിക്കുന്നത് കുറച്ച്, പ്രകൃതി സൗഹൃദമായ ഊർജ്ജത്തിലേക്ക് മാറാനുള്ള കാനഡയുടെ ശ്രമങ്ങൾക്ക് ഈ പദ്ധതി വലിയ കരുത്ത് പകരും.
കാനഡയിലെ ഏറ്റവും പുതിയ വാർത്തകൾക്കായി:https://chat.whatsapp.com/Ghtm5bIjsVN8SItyDlaj3Q?mode=wwt
Two Nova Scotia Power grid scale battery facilities now operational
