ഹാലിഫാക്സ്: സമുദ്ര ഭക്ഷ്യ വ്യവസായ മേഖലയിലെ നിയമവിരുദ്ധ പ്രവർത്തനങ്ങൾ തടയുന്നതിനായി കർശന നടപടികൾ ആരംഭിച്ച് നോവാ സ്കോഷ്യ . ഇതിന്റെ ഭാഗമായി ഫിഷറീസ് ആൻഡ് കോസ്റ്റൽ റിസോഴ്സസ് ആക്ട് പരിഷ്കരിക്കുകയും 31 പുതിയ കുറ്റകൃത്യങ്ങൾ കൂടി ഉൾപ്പെടുത്തി പിഴ തുക കുത്തനെ വർധിപ്പിക്കുകയും ചെയ്തു.പ്രവിശ്യയിലെ മത്സ്യബന്ധന മേഖലയുടെ സുരക്ഷയും സുതാര്യമായ വളർച്ചയും ലക്ഷ്യമിട്ടാണ് ഈ പുതിയ നീക്കമെന്ന് ഫിഷറീസ്-അക്വാകൾച്ചർ മന്ത്രി കെന്റ് സ്മിത്ത് അറിയിച്ചു.
പുതിയ ഉത്തരവ് പ്രകാരം രേഖകളിൽ തിരിമറി നടത്തുന്നതും നിയമവിരുദ്ധമായി മത്സ്യം വാങ്ങുന്നതും വിൽക്കുന്നതും ഗുരുതരമായ കുറ്റകൃത്യങ്ങളുടെ പരിധിയിൽ വരും. രേഖകൾ നശിപ്പിക്കുകയോ വ്യാജമായി നിർമ്മിക്കുകയോ ചെയ്താൽ ആദ്യഘട്ടത്തിൽ 5,000 ഡോളറും ആവർത്തിച്ചാൽ 10,000 ഡോളറുമാണ് പിഴ. നിയമവിരുദ്ധമായി പിടിച്ച മത്സ്യം വാങ്ങി സംസ്കരിക്കുന്നവർക്ക് ആദ്യ തവണ 25,000 ഡോളറും പിന്നീട് 50,000 ഡോളറുമാണ് പിഴയായി ഈടാക്കുക. ഇതിന് പുറമെ അധിക ഫീസുകളും നൽകേണ്ടി വരും.
മുൻപ് മിക്ക നിയമലംഘനങ്ങൾക്കും 1,000 ഡോളറിൽ താഴെ മാത്രമായിരുന്നു പിഴ ഈടാക്കിയിരുന്നത്. എന്നാൽ, ഇത്രയും ചെറിയ തുക പിഴയായി നൽകുന്നത് നിയമവിരുദ്ധ പ്രവർത്തനങ്ങൾ തടയാൻ സഹായിക്കുന്നില്ലെന്ന കണ്ടെത്തലിനെ തുടർന്നാണ് ശിക്ഷാ നടപടികൾ കർശനമാക്കിയത്. അറ്റ്ലാന്റിക് കാനഡയിൽ പിടിക്കപ്പെടുന്ന ലോബ്സ്റ്ററുകളിൽ 30 ശതമാനത്തോളം ഔദ്യോഗികമായി റിപ്പോർട്ട് ചെയ്യപ്പെടുന്നില്ല. ഇതിലൂടെ സർക്കാരിന് വർഷം തോറും ഏകദേശം 400 മില്യൺ ഡോളറിന്റെ നികുതി വരുമാനമാണ് നഷ്ടമാകുന്നത്.
നിയമം നടപ്പിലാക്കുന്നതിന്റെ ഭാഗമായി തുറമുഖങ്ങളിലും പ്രവിശ്യയിലെ സമുദ്ര ഭക്ഷ്യ കേന്ദ്രങ്ങളിലും പരിശോധന നടത്താൻ പ്രത്യേക ഇൻസ്പെക്ടർമാരുടെ യൂണിറ്റ് രൂപീകരിച്ചിട്ടുണ്ട്. കൺസർവേഷൻ ഓഫീസർമാർക്ക് നിയമലംഘകർക്കെതിരെ തൽക്ഷണം ടിക്കറ്റുകൾ നൽകാൻ അധികാരം നൽകിയിട്ടുണ്ട്. റിപ്പോർട്ടിംഗ് രീതികൾ ആധുനികവൽക്കരിക്കുകയും നിയമങ്ങൾ കർശനമാക്കുകയും ചെയ്യുന്നതിലൂടെ പ്രവിശ്യയുടെ വരുമാന ചോർച്ച തടയാനാകുമെന്നാണ് സർക്കാർ പ്രതീക്ഷിക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Nova Scotia to crack down on illegal fishing; heavy fines for violators
