മാരിടൈംസ് പ്രവിശ്യകളിൽ ഞായറാഴ്ച രാവിലെ മുതൽ മോശം കാലാവസ്ഥയ്ക്ക് സാധ്യതയുണ്ടെന്ന് എൻവയോൺമെന്റ് കാനഡ അറിയിച്ചു. പ്രവിശ്യയുടെ ഭൂരിഭാഗം പ്രദേശങ്ങളിലും പ്രത്യേക കാലാവസ്ഥാ പ്രസ്താവനകളും മഞ്ഞുവീഴ്ച, ഫ്രീസിങ്ങ് റെയിൻ എന്നിവ സംബന്ധിച്ച മുന്നറിയിപ്പുകളും അധികൃതർ നൽകിയിട്ടുണ്ട്. ഞായറാഴ്ച ആരംഭിക്കുന്ന ഈ കാലാവസ്ഥാ വ്യതിയാനം തിങ്കളാഴ്ച രാവിലെ വരെ തുടരുമെന്നാണ് വിലയിരുത്തൽ.
ന്യൂ ബ്രൺസ്വിക്കിന്റെ വടക്ക്. കിഴക്ക് മേഖലകളിൽ മഞ്ഞുവീഴ്ചാ മുന്നറിയിപ്പ് നിലവിലുണ്ട്. ഈ ഭാഗങ്ങളിൽ 15 മുതൽ 25 സെന്റീമീറ്റർ വരെ മഞ്ഞുവീഴ്ചയുണ്ടായേക്കാമെന്ന് എൻവയോൺമെന്റ് കാനഡ വ്യക്തമാക്കി. മറ്റ് പല ഭാഗങ്ങളിലും ഞായറാഴ്ച രാവിലെ ആരംഭിക്കുന്ന മഞ്ഞുവീഴ്ച പിന്നീട് ഐസ് പെല്ലറ്റായും ഫ്രീസിംഗ് റെയിനായും മാറാൻ സാധ്യതയുണ്ട്. ശക്തമായ കാറ്റ് കാരണം വടക്കുകിഴക്കൻ മേഖലകളിൽ കാഴ്ചപരിധി കുറയുമെന്നും റിപ്പോർട്ടുണ്ട്.
പ്രിൻസ് എഡ്വേർഡ് ഐലൻഡിൽ ഞായറാഴ്ച രാവിലെ മഞ്ഞുവീഴ്ചയോടെ കാലാവസ്ഥാ വ്യതിയാനം ആരംഭിക്കും. വൈകുന്നേരത്തോടെ ഇത് ഐസ് പെല്ലറ്റായും ഫ്രീസിംഗ് റെയിനായും മാറുമെന്ന് അറിയിപ്പിൽ പറയുന്നു. തിങ്കളാഴ്ച പുലർച്ചെയോടെ ശക്തമായ കാറ്റോടു കൂടി വീണ്ടും മഞ്ഞുവീഴ്ചയ്ക്ക് സാധ്യതയുണ്ടെന്നും കാലാവസ്ഥാ കേന്ദ്രം അറിയിച്ചു.
നോവ സ്കോഷ്യയിലെ കോൾചെസ്റ്റർ, ആന്റിഗോണിഷ്, പിക്ടോ കൗണ്ടികളിൽ ഞായറാഴ്ച രാത്രി വരെ മഞ്ഞുവീഴ്ചയും ഐസ് പെല്ലറ്റും തുടരും. കംബർലാൻഡ് കൗണ്ടിയിൽ ഉച്ചകഴിഞ്ഞ് മൂന്ന് മുതൽ ആറ് മണിക്കൂർ വരെ നീണ്ടുനിൽക്കുന്ന ഫ്രീസിംഗ് റെയിൻ മുന്നറിയിപ്പുണ്ട്. കേപ് ബ്രെട്ടനിലെ ഇൻവർനെസ് കൗണ്ടിയിൽ മണിക്കൂറിൽ 100 കിലോമീറ്റർ വേഗതയിലുള്ള ‘ലെ സ്യൂട്ടെസ്’ (Les Suêtes) കാറ്റിനും വിക്ടോറിയ കൗണ്ടിയിൽ ശക്തമായ കാറ്റിനും സാധ്യതയുള്ളതിനാൽ പ്രത്യേക ജാഗ്രതാ നിർദ്ദേശം നൽകി.
കേപ് ബ്രെട്ടൻ മേഖലയിൽ ഞായറാഴ്ച ഉച്ചകഴിഞ്ഞ് മഞ്ഞുവീഴ്ച ആരംഭിക്കുമെന്നും പിന്നീട് അത് ഫ്രീസിംഗ് റെയിനായി മാറാൻ സാധ്യതയുണ്ടെന്നും എൻവയോൺമെന്റ് കാനഡയുടെ റിപ്പോർട്ടിൽ പറയുന്നു. പ്രവിശ്യകളിലുടനീളം യാത്രാ തടസ്സങ്ങൾക്കും മോശം റോഡ് സാഹചര്യങ്ങൾക്കും സാധ്യതയുള്ളതിനാൽ പൊതുജനങ്ങൾ ജാഗ്രത പാലിക്കണമെന്ന് അധികൃതർ നിർദ്ദേശിച്ചു.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
Heavy snowfall and ice pellets possible in Maritime provinces; Environment Canada issues warning
