നോവ സ്കോഷ്യ: വെസ്റ്റ് കാലിഡോണിയക്ക് സമീപം റോസിഗ്നോൾ തടാകത്തിൽ ഉണ്ടായ ബോട്ടിംഗ് അപകടത്തിൽ രണ്ട് കുട്ടികൾ മരിക്കുകയും മറ്റ് രണ്ട് പേർക്ക് പരിക്കേൽക്കുകയും ചെയ്തതായി റോയൽ കനേഡിയൻ മൗണ്ടഡ് പോലീസ് അറിയിച്ചു. ശനിയാഴ്ച വൈകുന്നേരം 5 മണിക്ക് മുമ്പാണ് തടാകത്തിൽ ഒരു ബോട്ട് അപകടത്തിൽപ്പെട്ടതായി അത്യാഹിത വിഭാഗത്തിന് വിവരം ലഭിക്കുന്നത്. ഉടൻ തന്നെ പോലീസ്, ഇ.എച്ച്.എസ്, ഫയർ സർവീസസ്, ജോയിന്റ് റെസ്ക്യൂ കോർഡിനേഷൻ സെന്റർ എന്നിവയുടെ സഹായത്തോടെ രക്ഷാപ്രവർത്തനം ആരംഭിച്ചു. ഒരു പുരുഷനും മൂന്ന് കുട്ടികളുമാണ് ബോട്ടിലുണ്ടായിരുന്നത്. ഈ സംഘം സഞ്ചരിച്ച ബോട്ട് തടാകത്തിൽ മറിയുകയായിരുന്നുവെന്ന് പോലീസ് പിന്നീട് സ്ഥിതീകരിച്ചു.
ഫാൾ റിവർ, നോവ സ്കോട്ടിയ സ്വദേശികളായ 45 വയസ്സുള്ള ഒരാളെയും മൂന്ന് കുട്ടികളെയുമാണ് രക്ഷാപ്രവർത്തകർ തടാകത്തിൽ നിന്ന് കണ്ടെത്തിയത്. ഇവരെ ജോയിന്റ് റെസ്ക്യൂ കോർഡിനേഷൻ സെന്ററിന്റെ ഹെലികോപ്റ്ററിൽ ആശുപത്രിയിലേക്ക് മാറ്റി. എന്നാൽ, ആശുപത്രിയിൽ ചികിത്സയിലിരിക്കെ കുട്ടികളിൽ രണ്ടുപേർ മരിച്ചതായി പോലീസ് ഞായറാഴ്ച പുറത്തിറക്കിയ വാർത്താക്കുറിപ്പിൽ അറിയിച്ചു.
മരിച്ച കുട്ടികളുടെ വിവരങ്ങൾ അധികൃതർ പുറത്തുവിട്ടിട്ടില്ല. കുട്ടികളുടെ കുടുംബത്തിന്റെ ദുഃഖത്തിൽ പങ്കുചേരുന്നതായി പോലീസ് പ്രസ്താവനയിൽ അറിയിച്ചു. അപകടത്തിൽപ്പെട്ട 45 വയസ്സുള്ള പുരുഷനും ഒരു കുട്ടിക്കും ജീവന് ഭീഷണയില്ലാത്ത പരിക്കുകളാണ് ഉള്ളതെന്നും പോലീസ് അറിയിച്ചു. സംഭവത്തെക്കുറിച്ച് കൂടുതൽ വിവരങ്ങൾ ലഭ്യമായിട്ടില്ല. അപകടത്തെക്കുറിച്ച് റോയൽ കനേഡിയൻ മൗണ്ടഡ് പോലീസ് നിലവിൽ വിശദമായ അന്വേഷണം നടത്തിവരികയാണ്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Boating accident in Nova Scotia: Two people die tragically
