ഇന്ത്യൻ വിദ്യാർത്ഥികൾക്കുള്ള കാനഡയുടെ വാതിലുകൾ അടയുകയാണ്. ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) പുറത്തിറക്കിയ കണക്കുകൾ പ്രകാരം, 2025-ൽ സമർപ്പിക്കപ്പെട്ട ഇന്ത്യൻ വിദ്യാർത്ഥികളുടെ വിസ അപേക്ഷകളിൽ 80 ശതമാനവും നിരസിക്കപ്പെട്ടിരിക്കുന്നു. പത്തുവർഷത്തിനിടയിലെ ഏറ്റവും കഠിനമായ വിദ്യാർത്ഥി വിസാ നയങ്ങൾ നടപ്പിലാക്കുന്ന കാനഡ, ഒരു കാലത്ത് ഇന്ത്യക്കാരുടെ ‘ഡ്രീം ഡെസ്റ്റിനേഷൻ’ ആയിരുന്ന തന്റെ പഴയ മുഖച്ഛായ പൂർണമായും മാറ്റിക്കളയുകയാണ്. ലക്ഷക്കണക്കിന് ഇന്ത്യൻ യുവാക്കളുടെ ഉന്നത വിദ്യാഭ്യാസ സ്വപ്നങ്ങളെ തകർത്തുകൊണ്ട്, ആഗോള വിദ്യാർത്ഥി പ്രയാണത്തിന്റെ ഭൂപടം തന്നെ മാറ്റിമറിക്കുന്ന ഈ നയം അന്താരാഷ്ട്ര വിദ്യാഭ്യാസ മേഖലയിൽ വലിയ അലച്ചിലുണ്ടാക്കിയിരിക്കുന്നു.
കാനഡയിലെ അന്താരാഷ്ട്ര വിദ്യാർത്ഥികളിൽ 40 ശതമാനത്തോളം ഇന്ത്യക്കാരാണ്. 2025-ന്റെ രണ്ടാം പാദത്തിൽ, അഞ്ച് ഇന്ത്യൻ വിദ്യാർത്ഥി അപേക്ഷകരിൽ നാലുപേർക്കും വിസ നിഷേധിക്കപ്പെട്ടതായി ബോർഡർപാസ് പുറത്തുവിട്ട കണക്കുകൾ ഉദ്ധരിച്ച് വിദ്യാഭ്യാസ പ്രസിദ്ധീകരണമായ ‘ദി പൈ ന്യൂസ്’ റിപ്പോർട്ട് ചെയ്യുന്നു. 2024-ൽ 1.88 ലക്ഷം ഇന്ത്യൻ വിദ്യാർത്ഥികൾക്ക് കാനഡയിൽ പ്രവേശനം ലഭിച്ചിരുന്നു. ഇത് രണ്ട് വർഷം മുൻപുള്ളതിനേക്കാൾ ഇരട്ടിയിലധികം വരും. കാനഡയിലെ ഈ നയം മാറ്റം ഏഷ്യയിലെയും ആഫ്രിക്കയിലെയും മറ്റ് രാജ്യങ്ങളിലെ വിദ്യാർത്ഥികളെയും ബാധിച്ചിട്ടുണ്ടെന്നും റിപ്പോർട്ടുകൾ സൂചിപ്പിക്കുന്നു.
സുരക്ഷ, മികച്ച തൊഴിലവസരങ്ങൾ, ലോകോത്തര വിദ്യാഭ്യാസ സ്ഥാപനങ്ങൾ എന്നിവ കാരണം പതിറ്റാണ്ടുകളായി നോർത്ത് അമേരിക്കയായിരുന്നു വിദ്യാർത്ഥികളുടെ പ്രധാന ലക്ഷ്യം. എന്നാൽ, സമീപകാലത്തെ കണക്കുകൾ ഈ പ്രവണതയിൽ വലിയ മാറ്റം വന്നതായി കാണിക്കുന്നു. 2022-ൽ ഇന്ത്യൻ വിദ്യാർത്ഥികൾക്കിടയിൽ 18 ശതമാനം മുൻഗണന കാനഡയ്ക്ക് ഉണ്ടായിരുന്നത് 2024-ൽ 9 ശതമാനമായി കുറഞ്ഞു. അതേസമയം, 31 ശതമാനം മുൻഗണന നേടി ജർമ്മനി ഒന്നാം സ്ഥാനത്തേക്ക് ഉയർന്നു.
കാനഡയിലെ ഭവനക്ഷാമം, അടിസ്ഥാന സൗകര്യങ്ങളുടെ കുറവ്, തദ്ദേശീയർക്ക് മുൻഗണന നൽകാനുള്ള രാഷ്ട്രീയ സമ്മർദ്ദം എന്നിവയാണ് വിസാനയങ്ങൾ കർശനമാക്കാൻ സർക്കാരിനെ പ്രേരിപ്പിക്കുന്നത്. “ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) പുതിയ അപേക്ഷകൾ കൂടുതൽ സൂക്ഷ്മമായി പരിശോധിക്കുന്നുണ്ടെന്ന് വ്യക്തമാണ്,” ബോർഡർപാസ് വൈസ് പ്രസിഡന്റ് ജോനാഥൻ ഷെർമാൻ ‘ദി പൈ ന്യൂസിനോട്’ പറഞ്ഞു. കൂടാതെ, വിസ അപേക്ഷകർ നൽകേണ്ട സാമ്പത്തിക രേഖകൾക്കുള്ള മിനിമം തുക കാനഡ ഇരട്ടിയാക്കി CA$20,635 (ഏകദേശം 13.13 ലക്ഷം രൂപ) ആക്കിയതായും VnExpress റിപ്പോർട്ട് ചെയ്യുന്നു.
ഇന്ത്യൻ വിദ്യാർത്ഥികൾക്കിടയിൽ ജർമ്മനി കൂടുതൽ ശ്രദ്ധ നേടുന്നുണ്ട്. ശക്തമായ സമ്പദ്വ്യവസ്ഥ, പൊതുഫണ്ട് ഉപയോഗിച്ച് നടത്തുന്ന സർവകലാശാലകൾ, ഇംഗ്ലീഷ് ഭാഷയിലുള്ള കോഴ്സുകൾ എന്നിവ ജർമ്മനിയെ ആകർഷകമാക്കുന്നു. ജർമ്മനിയിലെ ഫെഡറൽ സ്റ്റാറ്റിസ്റ്റിക്കൽ ഓഫീസ് പറയുന്നതനുസരിച്ച്, കഴിഞ്ഞ അഞ്ച് വർഷത്തിനിടെ ഇന്ത്യൻ വിദ്യാർത്ഥികളുടെ എണ്ണം ഇരട്ടിയിലധികമായിട്ടുണ്ട്. 2023-ൽ 49,500 ആയിരുന്നത് 2025-ൽ ഏകദേശം 60,000 ആയി ഉയർന്നു. പരമ്പരാഗത പഠന കേന്ദ്രങ്ങളായ യു.എസ്, യു.കെ, കാനഡ എന്നിവിടങ്ങളിൽ വർദ്ധിച്ചുവരുന്ന ആഭ്യന്തര പ്രശ്നങ്ങളാണ് ജർമ്മനി പോലുള്ള രാജ്യങ്ങൾക്ക് മുൻതൂക്കം നൽകുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
