നോവ സ്കോഷ്യ: യുവതലമുറക്കിടയിൽ ഓൺലൈൻ ചൂതാട്ടത്തിനുള്ള താൽപ്പര്യം വർധിക്കുന്നതിൽ ആശങ്ക പ്രകടിപ്പിച്ച് നോവ സ്കോഷ്യയിലെ അഡ്വക്കസി ഗ്രൂപ്പുകൾ. കംപൾസീവ് ആൻഡ് പ്രോബ്ലം ഗാംബ്ലേഴ്സ് സൊസൈറ്റിയുടെ സ്ഥാപകൻ കാരി മർഫി പറയുന്നതനുസരിച്ച്, ഡിജിറ്റൽ ചൂതാട്ട പ്ലാറ്റ്ഫോമുകളിലേക്കുള്ള എളുപ്പത്തിലുള്ള ലഭ്യതയാണ് ഈ പ്രവണതയ്ക്ക് പ്രധാന കാരണം. ഇത്തരം ചൂതാട്ടങ്ങളോടുള്ള ആസക്തി യുവാക്കളുടെ ഭാവിക്കും സമൂഹത്തിനും വലിയ ഭീഷണിയാണെന്നും അദ്ദേഹം ചൂണ്ടിക്കാട്ടുന്നു. ഒരു കാലത്ത് ചൂതാട്ടത്തിന് അടിമയായിരുന്ന തനിക്ക് അതിന്റെ ഗുരുതരമായ പ്രത്യാഘാതങ്ങൾ നന്നായി അറിയാമെന്നും മർഫി പറയുന്നു.
വർഷങ്ങൾക്ക് മുമ്പ് ചൂതാട്ടത്തിൽ നിന്ന് മുക്തി നേടിയ ശേഷമാണ് മർഫി ഈ നോൺ-പ്രോഫിറ്റ് സംഘടന ആരംഭിച്ചത്. ചൂതാട്ട ആസക്തിക്ക് അടിമകളായവരെ സഹായിക്കുക എന്നതാണ് ഈ സംഘടനയുടെ പ്രധാന ലക്ഷ്യം. ഇപ്പോൾ ഓൺലൈൻ വഴിയുള്ള ചൂതാട്ടം വ്യാപകമാകുന്നതിൽ തനിക്ക് വലിയ ആശങ്കയുണ്ടെന്ന് അദ്ദേഹം വ്യക്തമാക്കി. കൗമാരക്കാരെയും യുവജനങ്ങളെയും ഓൺലൈൻ ചൂതാട്ടത്തിന്റെ അപകടങ്ങളെക്കുറിച്ച് ബോധവത്കരിക്കാനായി ഒരു പുതിയ പദ്ധതിക്ക് തുടക്കമിടാനാണ് മർഫി ഗ്രൂപ്പ് ലക്ഷ്യമിടുന്നത്. അതുപോലെ, സ്പോർട്സ് ബെറ്റിംഗ് പ്ലാറ്റ്ഫോമുകളിലേക്ക് ആകർഷിക്കപ്പെടുന്ന യുവാക്കളുമായി നേരിട്ട് സംസാരിച്ച് അവരെ കാര്യങ്ങൾ മനസ്സിലാക്കിപ്പിക്കാനും ഈ സംഘടന ശ്രമിച്ചുവരുന്നു.
അതേസമയം, ലഹരി ഉപയോഗവും ചൂതാട്ട ആസക്തിയും പോലുള്ള പ്രശ്നങ്ങളുമായി ബുദ്ധിമുട്ടുന്ന ആളുകൾക്കായി നോവ സ്കോഷ്യ സർക്കാർ കഴിഞ്ഞയാഴ്ച നാല് പുതിയ വാക്ക്-ഇൻ റിക്കവറി സെന്ററുകൾ തുറന്നിട്ടുണ്ട്. ഇത്തരം കേന്ദ്രങ്ങൾ വഴി ആസക്തിക്ക് അടിമകളായവർക്ക് ചികിത്സയും കൗൺസിലിംഗും നൽകാനാണ് സർക്കാർ ലക്ഷ്യമിടുന്നത്. സമൂഹത്തിന്റെ വിവിധ കോണുകളിൽ നിന്ന് ഈ പ്രശ്നം പരിഹരിക്കുന്നതിനുള്ള ശ്രമങ്ങൾ നടക്കുമ്പോഴും ഓൺലൈൻ ചൂതാട്ടം ഉയർത്തുന്ന വെല്ലുവിളി വർധിച്ചുകൊണ്ടിരിക്കുകയാണെന്ന് വിദഗ്ദ്ധർ അഭിപ്രായപ്പെടുന്നു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Youth trapped in the web of online gambling; NS advocacy groups raise concerns
