നോവ സ്കോഷ്യയിലെ ഷെൽബേണിന് സമീപമുണ്ടായ വാഹനാപകടത്തിൽ രണ്ട് വാഹനങ്ങൾ കൂട്ടിയിടിച്ച് തീപിടിച്ച് രണ്ട് പേർ വെന്തുമരിച്ചു. ഹൈവേ 103-ൽ ഉച്ചയ്ക്ക് 1:15 ഓടെയാണ് അപകടം നടന്നത്. കനേഡിയൻ റോയൽ മൗണ്ടഡ് പോലീസ് (RCMP) സംഭവസ്ഥലത്തെത്തി. ഒരു കറുത്ത ഫോക്സ്വാഗൺ ജെറ്റയും മഞ്ഞ ഫോർഡ് F-150-യും തമ്മിൽ കൂട്ടിയിടിക്കുകയായിരുന്നുവെന്ന് പോലീസ് അറിയിച്ചു.
അപകടസ്ഥലത്ത് ആദ്യമെത്തിയ രക്ഷാപ്രവർത്തകർ കണ്ടത് ഫോർഡ് പൂർണ്ണമായും അഗ്നിക്കിരയായ നിലയിലും ഫോക്സ്വാഗൺ ജെറ്റക്ക് കാര്യമായ കേടുപാടുകൾ സംഭവിച്ച നിലയിലുമായിരുന്നു. ഫോക്സ്വാഗൺ ജെറ്റയുടെ ഡ്രൈവറായ ക്ലൈഡ് റിവറിൽ നിന്നുള്ള 42 വയസ്സുകാരിയും, ഫോർഡിന്റെ ഡ്രൈവറായ വില്യംസ്വൂഡിൽ നിന്നുള്ള 32 വയസ്സുകാരനും സംഭവസ്ഥലത്ത് വെച്ച് തന്നെ മരിച്ചു.
അപകടസമയത്ത് വാഹനങ്ങളിൽ ഇവർ രണ്ടുപേർ മാത്രമാണ് ഉണ്ടായിരുന്നത്.
അപകടത്തെക്കുറിച്ച് പോലീസ് അന്വേഷണം ആരംഭിച്ചു. നോവ സ്കോഷ മെഡിക്കൽ എക്സാമിനർ സർവീസിന്റെ സഹായത്തോടെയുള്ള അന്വേഷണം പുരോഗമിക്കുകയാണ്. അപകടത്തിൽ ഒരു ഔദ്യോഗിക വാഹനം ഉൾപ്പെട്ടതുകൊണ്ട് നോവ സ്കോഷ്യ ഡിപ്പാർട്ട്മെന്റ് ഓഫ് ലേബർ, സ്കിൽസ് ആൻഡ് ഇമ്മിഗ്രേഷൻ വിഭാഗത്തെയും വിവരമറിയിച്ചിട്ടുണ്ട്.
RCMPയും ലേബർ ഡിപ്പാർട്ട്മെന്റും സംയുക്തമായാണ് അപകടത്തെക്കുറിച്ച് അന്വേഷിക്കുന്നത്. അപകടത്തെ തുടർന്ന് ഹൈവേ മണിക്കൂറുകളോളം അടച്ചിട്ടെങ്കിലും പിന്നീട് ഗതാഗതം പുനഃസ്ഥാപിച്ചു. അപകടത്തെക്കുറിച്ചോ കൂട്ടിയിടിക്കുന്നതിന് മുമ്പുള്ള വാഹനങ്ങളുടെ ഡാഷ്കാം ദൃശ്യങ്ങളെക്കുറിച്ചോ എന്തെങ്കിലും വിവരങ്ങളുള്ളവർ ഷെൽബേൺ RCMP ഡിറ്റാച്ച്മെന്റുമായി 902-875-2490 എന്ന നമ്പറിലോ അല്ലെങ്കിൽ നോവ സ്കോഷ ക്രൈം സ്റ്റോപ്പേഴ്സുമായി 1-800-222-TIPS (8477) എന്ന നമ്പറിലോ ബന്ധപ്പെടണമെന്ന് പോലീസ് അറിയിച്ചു.
