കാനഡയിലെ പ്രമുഖ ഊർജ്ജ കമ്പനിയായ നോവ സ്കോഷ്യ പവറിൻ്റെ കമ്പ്യൂട്ടർ ശൃംഖലയിൽ റാൻസംവെയർ ആക്രമണം നടന്നതായി സ്ഥിരീകരിച്ചു. മാർച്ച് 19-ന് നടന്ന ആക്രമണ വിവരം ഒരു മാസത്തിന് ശേഷം ഏപ്രിൽ 25-നാണ് കമ്പനി തിരിച്ചറിഞ്ഞത്. ഇതിനകം ഏകദേശം 2,80,000 ഉപഭോക്താക്കളുടെ അതീവ പ്രാധാന്യമുള്ള വ്യക്തിഗത വിവരങ്ങൾ കുറ്റവാളികൾ കൈക്കലാക്കിയതായി കമ്പനി വെളിപ്പെടുത്തി. പേര്, വിലാസം, ഫോൺ നമ്പർ, ജനനത്തീയതി, ഡ്രൈവിംഗ് ലൈസൻസ്, സാമൂഹിക സുരക്ഷാ നമ്പർ, ബാങ്ക് അക്കൗണ്ട് വിവരങ്ങൾ എന്നിവ ഉൾപ്പെടെയുള്ള നിർണായക ഡാറ്റയാണ് ചോർന്നത്.
കാനഡയുടെ സൈബർ സുരക്ഷാ ഏജൻസിയായ കനേഡിയൻ സെൻ്റർ ഫോർ സൈബർ സെക്യൂരിറ്റിയുടെ തലവൻ രാജീവ് ഗുപ്ത, ഈ ആക്രമണം അതീവ ഗൗരവമേറിയതാണെന്ന് അഭിപ്രായപ്പെട്ടു. കുറ്റവാളികൾ ഇവിടെ പ്രയോഗിച്ചത് ‘ഇരട്ട ഭീഷണി’ (Double Extortion) എന്ന തന്ത്രമാണ്. ഇതുപ്രകാരം, കമ്പ്യൂട്ടർ സംവിധാനങ്ങൾ പ്രവർത്തനരഹിതമാക്കി മോചനദ്രവ്യം ആവശ്യപ്പെടുന്നതിനൊപ്പം, മോഷ്ടിച്ച വിവരങ്ങൾ പുറത്തുവിടുമെന്നും ഇവർ ഭീഷണിപ്പെടുത്തി.
മോചനദ്രവ്യം നൽകുന്നത് കുറ്റവാളികളെ പ്രോത്സാഹിപ്പിക്കുന്നതിന് തുല്യമായതിനാൽ നോവ സ്കോഷ്യ പവർ പണം നൽകിയില്ല. എന്നാൽ മോഷ്ടിക്കപ്പെട്ട വിവരങ്ങൾ ഡാർക്ക് വെബ്ബിലൂടെ മറ്റ് കുറ്റവാളി സംഘങ്ങൾക്ക് വിൽക്കാനുള്ള സാധ്യത തള്ളിക്കളയാനാവില്ലെന്ന് ഗുപ്ത മുന്നറിയിപ്പ് നൽകി.
വ്യക്തിഗത വിവരങ്ങൾ നഷ്ടമായ ഉപഭോക്താക്കൾക്ക് വലിയ ഭീഷണികളാണ് വരാനിരിക്കുന്നത്.
ഒരു വ്യക്തിയെ പ്രത്യേകമായി ലക്ഷ്യം വെച്ചുള്ള ഇ-മെയിൽ, സന്ദേശ തട്ടിപ്പുകൾ (സ്പിയർ ഫിഷിംഗ്), ബാങ്ക് അക്കൗണ്ട് വിവരങ്ങൾ ഉപയോഗിച്ചുള്ള സാമ്പത്തിക തട്ടിപ്പുകൾ എന്നിവയ്ക്ക് സാധ്യതയേറെയാണ്. സംഭവത്തെത്തുടർന്ന്, സൈബർ സുരക്ഷാ സംവിധാനം ശക്തിപ്പെടുത്തുന്നതിനായി 1.8 ദശലക്ഷം ഡോളറിൻ്റെ പദ്ധതിക്ക് നോവ സ്കോഷ്യ പവർ അനുമതി തേടിയിട്ടുണ്ട്.
ഭാവിയിൽ ഇത്തരം ആക്രമണങ്ങൾ തടയാൻ കൃത്യമായ മുൻകരുതലുകൾ, വിവരങ്ങളുടെ ബാക്കപ്പ്, കരുത്തുറ്റ പാസ്വേഡുകളും മറ്റ് തിരിച്ചറിയൽ രീതികളും ഉപയോഗിക്കേണ്ടതിൻ്റെ പ്രാധാന്യം സൈബർ സുരക്ഷാ കേന്ദ്രം ആവർത്തിച്ച് പറഞ്ഞു.
