മുതിർന്ന പൗരന്മാരെ ലക്ഷ്യം വച്ച് വർദ്ധിച്ചുവരുന്ന AI തട്ടിപ്പുകൾക്കെതിരെ ഹാലിഫാക്സ് റീജിയണൽ പോലീസ്. ഇരകളിലുള്ള അവരുടെ വിശ്വാസം വളർത്തിയെടുക്കാൻ കുറ്റവാളികൾ ഉപയോഗിക്കുന്ന രീതികളെക്കുറിച്ച് മുന്നറിയിപ്പ് നൽകുകയാണ് പോലീസ്. കഴിഞ്ഞ ആഴ്ചയിൽ മുതിർന്ന അഞ്ച് പൗരന്മാരാണ് തട്ടിപ്പിന് ഇരയായത്.
ആദ്യം ഇരകളോട് വളരെ പരിചയക്കാരെ പോലെ പെരുമാറുന്ന തട്ടിപ്പുകാർ പിന്നീട് അവരെ പോലീസ് അറസ്റ്റ് ചെയ്തെന്ന് വ്യാജമായി പറഞ്ഞ് ഇരയുടെ മാനസികാവസ്ഥയെ തകർക്കുന്നു. പിന്നാലെ മറ്റൊരു തട്ടിപ്പുകാരൻ, ഒരു ലോയറായി ഇരയെ സമീപിക്കുകയും പ്രിയപ്പെട്ടവരെ കസ്റ്റഡിയിൽ നിന്ന് മോചിപ്പിക്കാൻ പണം നൽകണമെന്ന് ഇരയോട് ആവിശ്യപ്പെടുകയും ചെയ്യും.
സമീപകാല സംഭവങ്ങളിൽ പ്രിയപ്പെട്ട ഒരാളുടെ ശബ്ദം റെക്കോർഡ് ചെയ്യാൻ കുറ്റവാളികൾ കൃത്രിമബുദ്ധി ഉപയോഗിക്കുന്നുണ്ടെന്നാണ് പോലീസ് പറയുന്നത്.
കാനഡയിലെ കോടതി ഉദ്യോഗസ്ഥർ വീടുകളിൽ നിന്ന് ജാമ്യത്തുക ശേഖരിക്കാറില്ലെന്നും ഇതുപോലുള്ള ഒരു കോൾ ലഭിക്കുന്ന ആർക്കും വ്യക്തിഗത വിവരങ്ങൾ നൽകാതെ ഫോൺ കട്ട് ചെയ്യണമെന്നും പോലീസ് പറയുന്നു.
