ഒട്ടാവ: കാനഡയുടെ ഇമിഗ്രേഷൻ രംഗത്ത് ഫ്രഞ്ച് ഭാഷാ പ്രാവീണ്യമുള്ളവർക്ക് വൻ കുതിച്ചുചാട്ടമാണ് ഉണ്ടായിരിക്കുന്നത്. ഈ ആഴ്ച നടന്ന മൂന്നാമത്തെ എക്സ്പ്രസ് എൻട്രി ഡ്രോയിലൂടെ നാലായിരം ഉദ്യോഗാർത്ഥികൾക്ക് കൂടി സ്ഥിരതാമസത്തിനുള്ള ക്ഷണം ലഭിച്ചു. ഫ്രഞ്ച് ഭാഷാ വിഭാഗത്തിൽ മാത്രം ഈ വർഷം നടക്കുന്ന അഞ്ചാമത്തെ ഡ്രോയാണിത്. ഇതോടെ 2026-ൽ ഈ വിഭാഗത്തിലൂടെ ഇമിഗ്രേഷൻ ക്ഷണം ലഭിച്ചവരുടെ ആകെ എണ്ണം ഇരുപത്തിയാറായിരമായി ഉയർന്നു.
ഏപ്രിൽ 29-ന് നടന്ന ഈ ഡ്രോയിൽ പരിഗണിക്കപ്പെടാൻ ഉദ്യോഗാർത്ഥികൾക്ക് കുറഞ്ഞത് 400 സി.ആർ.എസ് സ്കോർ ആവശ്യമായിരുന്നു. കൂടാതെ ഏപ്രിൽ ഏഴിന് മുൻപായി പ്രൊഫൈൽ സമർപ്പിച്ചവരെയാണ് ഈ ഘട്ടത്തിൽ പരിഗണിച്ചത്. കാനഡ പ്രധാനമായും രാജ്യത്തിനുള്ളിൽ പ്രവൃത്തിപരിചയമുള്ളവർക്കും പ്രൊവിൻഷ്യൽ നോമിനേഷൻ ഉള്ളവർക്കുമാണ് മുൻഗണന നൽകുന്നതെങ്കിലും കാറ്റഗറി അടിസ്ഥാനത്തിലുള്ള ഡ്രോകളിൽ ഫ്രഞ്ച് ഭാഷാ പ്രാവീണ്യമുള്ളവർക്ക് വൻ അവസരങ്ങളാണ് ലഭിച്ചുകൊണ്ടിരിക്കുന്നത്.
ഈ ആഴ്ച തന്നെ നേരത്തെ നടന്ന പി.എൻ.പി ഡ്രോയിൽ 473 പേർക്കും സി.ഇ.സി ഡ്രോയിൽ 2,000 പേർക്കും ക്ഷണം ലഭിച്ചിരുന്നു. നിലവിലെ കണക്കുകൾ പ്രകാരം കാനഡയിലേക്ക് കുടിയേറാൻ ആഗ്രഹിക്കുന്നവർക്ക് ഫ്രഞ്ച് ഭാഷാ പഠനം വലിയൊരു മുതൽക്കൂട്ടാവുകയാണ്. മറ്റ് പ്രോഗ്രാമുകളെ അപേക്ഷിച്ച് കുറഞ്ഞ സി.ആർ.എസ് സ്കോറിലും സ്ഥിരതാമസം ഉറപ്പാക്കാൻ ഈ വിഭാഗം സഹായിക്കുന്നു എന്നത് ഉദ്യോഗാർത്ഥികൾക്ക് വലിയ പ്രതീക്ഷ നൽകുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
4000 ITAs issued in third Express Entry draw of the week
