ഓട്ടവ: കാനഡയിലെ കുടുംബങ്ങൾക്കും അർഹരായ വ്യക്തികൾക്കും ആശ്വാസമായി 2026 നവംബർ മാസത്തിൽ നാല് പുതിയ കാനഡ റെവന്യൂ ഏജൻസി (CRA) ആനുകൂല്യങ്ങൾ അക്കൗണ്ടുകളിലേക്ക് എത്താൽ പോകുന്നു. നാല് വ്യത്യസ്ത തീയതികളിലായി വിതരണം ചെയ്യുന്ന ഈ നികുതിരഹിത സഹായങ്ങൾ 2025-ലെ വരുമാന നികുതി റിട്ടേണിനെ അടിസ്ഥാനമാക്കിയാണ് കണക്കാക്കിയിരിക്കുന്നത്. 2026 ജൂലൈ മുതൽ 2027 ജൂൺ വരെയുള്ള നടപ്പ് ആനുകൂല്യ വർഷത്തിലെ തുകയാണ് നിലവിൽ വിതരണം ചെയ്യുന്നത്.
ആദ്യ പേയ്‌മെന്റായ ഒന്റാരിയോ ട്രില്ലിയം ബെനിഫിറ്റ് (OTB) നവംബർ 10 ചൊവ്വാഴ്ച യോഗ്യരായ ഒന്റാരിയോ നിവാസികളുടെ അക്കൗണ്ടുകളിൽ എത്തും. മൂന്ന് വ്യത്യസ്ത പ്രൊവിൻഷ്യൽ ക്രെഡിറ്റുകൾ സമന്വയിപ്പിച്ച് നൽകുന്ന ഈ ആനുകൂല്യത്തിലൂടെ വടക്കൻ ഒന്റാരിയോയിലെ യോഗ്യരായ മുതിർന്ന പൗരന്മാർക്ക് പ്രതിവർഷം പരമാവധി 2,055 ഡോളർ വരെ ലഭിക്കും. ഇതിൽ ഒന്റാരിയോ സെയിൽസ് ടാക്സ് ക്രെഡിറ്റ് (OSTC), എനർജി ആന്റ് പ്രോപ്പർട്ടി ടാക്സ് ക്രെഡിറ്റ് (OEPTC), നോർത്തേൺ ഒന്റാരിയോ എനർജി ക്രെഡിറ്റ് (NOEC) എന്നിവ ഉൾപ്പെടുന്നു. ആനുവൽ എൻടൈറ്റിൽമെന്റ് 500 ഡോളറിൽൽ താഴെയുള്ളവർക്ക് ജൂലൈ മാസത്തിൽ തന്നെ തുക ലഭിച്ചിട്ടുണ്ടാകും.
തുടർന്ന് നവംബർ 20 വെള്ളിയാഴ്ച 18 വയസ്സിന് താഴെയുള്ള കുട്ടികളുള്ള കാനഡയിലെ എല്ലാ കുടുംബങ്ങൾക്കും കാനഡ ചൈൽഡ് ബെനിഫിറ്റ് (CCB) ലഭിക്കും. പുതിയ 2% പണപ്പെരുപ്പ വർദ്ധനവോടെ 6 വയസ്സിൽ താഴെയുള്ള കുട്ടികൾക്ക് പ്രതിമാസം പരമാവധി 679.75 ഡോളർ വരെയും 6 മുതൽ 17 വരെയുള്ളവർക്ക് പ്രതിമാസം 573.58 ഡോളർ വരെയും ലഭിക്കുന്നതാണ്. കൂടാതെ ഡിസെബിലിറ്റി ടാക്സ് ക്രെഡിറ്റിന് യോഗ്യതയുള്ള കുട്ടികൾക്ക് മാസം 290 ഡോളർ വരെയുള്ള ചൈൽഡ് ഡിസെബിലിറ്റി ബെനിഫിറ്റും ഇതിനോടൊപ്പം അക്കൗണ്ടിലെത്തും. 2025-ലെ കുടുംബ നികുതി വരുമാനം 38,237 ഡോളറിൽ താഴെയുള്ളവർക്ക് മുഴുവൻ ആനുകൂല്യവും ലഭിക്കും.
ഡിസെബിലിറ്റി ടാക്സ് ക്രെഡിറ്റ് (DTC) ഉള്ള 18-നും 64-നും ഇടയിൽ പ്രായമുള്ള ന്യൂഫൗണ്ട്‌ലാന്റ് ആൻഡ് ലാബ്രഡോർ നിവാസികൾക്കുള്ള പ്രതിമാസ ആനുകൂല്യമായ 400 ഡോളർ വരെ നൽകുന്ന NLDB തുക നവംബർ 25 ബുധനാഴ്ച അക്കൗണ്ടിൽ ക്രെഡിറ്റാകും. കുടുംബത്തിൽ ദമ്പതികൾ രണ്ടുപേരും DTC യോഗ്യതയുള്ളവരാണെങ്കിൽ പ്രതിമാസം 800 ഡോളർവരെ നേടാൻ അർഹതയുണ്ട്. ഈ ആനുകൂല്യത്തിനായി പ്രത്യേകം അപേക്ഷ സമർപ്പിക്കേണ്ടതില്ല, ടാക്സ് റിട്ടേൺ സമർപ്പിച്ചവർക്ക് തുക സ്വയമേവ ലഭ്യമാകും.
മാസാവസാനം നവംബർ 27 വെള്ളിയാഴ്ച ആൽബെർട്ടയിലെ കുടുംബങ്ങൾക്കുള്ള 2026-ലെ നാലാമത്തെയും അവസാനത്തെയും പാദ ആൽബെർട്ട ചൈൽഡ് ആൻഡ് ഫാമിലി ബെനിഫിറ്റ് (ACFB) വിതരണം ചെയ്യും. ആദ്യ കുട്ടിക്കായി പ്രതിവർഷം 1,529 ഡോളർ ബേസ് ബെനിഫിറ്റും തുടർന്ന് വരുന്ന മൂന്ന് കുട്ടികൾക്ക് വരെ 764 ഡോളർ വീതവും ലഭിക്കും. കൂടാതെ ജോലി ചെയ്യുന്ന കുടുംബങ്ങൾക്കായി ആദ്യ കുട്ടിയ്ക്ക് 782 ഡോളർ വരെയുള്ള വർക്കിംഗ് ഇൻകം കോമ്പോണന്റും ഇതിനൊപ്പം ലഭിക്കും.
ALSO READ: നവംബറിൽ കാനഡയിൽ വരുന്നത് നിർണായക മാറ്റങ്ങൾ; അതിർത്തി നിയമങ്ങളും വിമാന ചട്ടങ്ങളും ഇനി മാറും
ഈ കേന്ദ്ര-പ്രൊവിൻഷ്യൽ ധനസഹായ തുകകൾ തടസ്സമില്ലാതെ ബാങ്ക് അക്കൗണ്ടുകളിൽ ലഭിക്കുന്നതിനായി നിങ്ങളുടെ ടാക്സ് റിട്ടേണുകൾ കൃത്യമായി നൽകിയിട്ടുണ്ടെന്നും CRA മൈ അക്കൗണ്ടിലെ വിവരങ്ങളും ഡയറക്ട് ഡെപ്പോസിറ്റും പുതുക്കിയിട്ടുണ്ടെന്നും ഉറപ്പാക്കുക. ക്രെഡിറ്റ് ചെയ്യപ്പെടേണ്ട തീയതികളിൽ തുക ലഭിച്ചില്ലെങ്കിൽ OTB തുകയ്ക്കായി 10 പ്രവർത്തി ദിവസങ്ങളും CCB തുകയ്ക്കായി 5 പ്രവർത്തി ദിവസങ്ങളും കാത്തിരുന്ന ശേഷം കാനഡ റെവന്യൂ ഏജൻസിയുമായി (CRA) ബന്ധപ്പെടേണ്ടതാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
