ഒട്ടാവ : ഫെഡറൽ ജീവനക്കാർ ആഴ്ചയിൽ നാല് ദിവസം ഓഫീസുകളിലേക്ക് തിരികെ എത്തുന്നതും സ്കൂളുകൾ തുറക്കുന്നതും പ്രമാണിച്ച് ഉണ്ടാകാനിടയുള്ള വൻ ഗതാഗതക്കുരുക്ക് പരിഹരിക്കാൻ ഒട്ടാവ നഗരസഭ പ്രത്യേക ആക്ഷൻ പ്ലാൻ തയ്യാറാക്കി. നഗരത്തിലെ ഗതാഗത സൗകര്യങ്ങൾ മെച്ചപ്പെടുത്തുന്നതിനായി 48 നിർദേശങ്ങൾ അടങ്ങിയ ‘ടാർഗെറ്റഡ് ട്രാൻസ്പോർട്ടേഷൻ പ്ലാൻ’ ജൂലൈ 14-ന് കൗൺസിൽ പരിഗണിക്കും. വേനൽക്കാലത്തും ശരത്കാലത്തുമായി ഘട്ടങ്ങളായാണ് ഈ നിർദേശങ്ങൾ നടപ്പിലാക്കുകയെന്ന് അധികൃതർ അറിയിച്ചു.
പൊതുഗതാഗത സംവിധാനമായ ഒസി ട്രാൻസ്പോയുടെ സേവനങ്ങൾ വിപുലീകരിക്കുകയാണ് പദ്ധതിയുടെ പ്രധാന ലക്ഷ്യം. ഒ-ട്രെയിൻ സർവീസുകളുടെ എണ്ണം കൂട്ടുക, പാരാ ട്രാൻസ്പോർട്ട് സംവിധാനം നവീകരിക്കുക, പുതിയ എക്സ്പ്രസ് ബസ് റൂട്ടുകൾ ആരംഭിക്കുക, പാർക്ക് ആൻഡ് റൈഡ് കേന്ദ്രങ്ങളിൽ നിന്നുള്ള കണക്റ്റിവിറ്റി മെച്ചപ്പെടുത്തുക എന്നിവ ഇതിൽ ഉൾപ്പെടുന്നു. കാർലിംഗ് കാമ്പസ്, കനാറ്റ നോർത്ത് തുടങ്ങിയ പ്രധാന തൊഴിൽ മേഖലകളിലും ഗാറ്റിനൗവിലേക്കുള്ള റൂട്ട് 13-ലും പ്രത്യേക സർവീസുകൾ ആരംഭിക്കും. ഇതിന് പുറമെ ഇ1 ഷട്ടിൽ എക്സ്പ്രസ് ഉൾപ്പെടെ 5, 13, 24, 39, 61, 62, 63, 66, 74, 75, 98, 256 എന്നീ ബസ് റൂട്ടുകളിലും സർവീസുകൾ വർദ്ധിപ്പിക്കും.
റോഡ് നിർമാണ പ്രവർത്തനങ്ങൾ മൂലമുള്ള തടസ്സങ്ങളും ഗതാഗതക്കുരുക്കും കുറയ്ക്കാനുള്ള നിർദേശങ്ങളും പ്ലാനിലുണ്ട്. പ്രധാന റൂട്ടുകളിലെ നിർമാണ ജോലികൾ രാത്രി സമയങ്ങളിലേക്കും തിരക്കില്ലാത്ത സമയങ്ങളിലേക്കും മാറ്റുക, കൂടുതൽ ട്രാഫിക് ക്യാമറകൾ സ്ഥാപിക്കുക, ബസ് ലെയ്നുകളിലും നോ സ്റ്റോപ്പിങ് സോണുകളിലും പരിശോധന കർശനമാക്കുക എന്നിവയാണ് പ്രധാന നടപടികൾ. കൂടാതെ സൈക്ലിങ്, കാൽനടയാത്ര എന്നിവ പ്രോത്സാഹിപ്പിക്കുന്നതിനായി മികച്ച മാപ്പുകളും ട്രിപ്പ് പ്ലാനിങ് ടൂളുകളും ലഭ്യമാക്കുമെന്നും നഗരസഭ വ്യക്തമാക്കുന്നു.
അതേസമയം, നഗരസഭയുടെ പുതിയ ആക്ഷൻ പ്ലാനിന്റെ വിജയസാധ്യതയിൽ ചില കൗൺസിലർമാർ ആശങ്ക പ്രകടിപ്പിച്ചിട്ടുണ്ട്. ഒട്ടാവ നദിയുടെ കുറുകെയുള്ള കിങ് എഡ്വേർഡ് അവന്യൂ, മക്ഡൊണാൾഡ്-കാർട്ടിയർ പാലം എന്നിവയെക്കുറിച്ചുള്ള വിവരങ്ങൾ രേഖയിലില്ലെന്ന് കൗൺസിലർ സ്റ്റെഫാനി പ്ലാന്റെ ചൂണ്ടിക്കാട്ടി. നിലവിലുള്ള വിഭവങ്ങൾ ഉപയോഗിച്ച് ചെയ്യാൻ കഴിയുന്ന കാര്യങ്ങളാണ് പദ്ധതിയിലുള്ളതെങ്കിലും, യാത്രാക്ലേശം പൂർണ്ണമായി പരിഹരിക്കാൻ ആവശ്യമായ പൊതുഗതാഗത സൗകര്യം നഗരസഭയ്ക്ക് നിലവിലുണ്ടോ എന്നത് ചോദ്യചിഹ്നമാണെന്ന് കൗൺസിലർ ജെഫ് ലെയ്പ്പർ വിലയിരുത്തി.
4-day office work a week: Municipality proposes 48 traffic changes to solve commute woes in Ottawa!
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
