ഒട്ടാവ: കാനഡയുടെ ഇമിഗ്രേഷൻ രംഗത്ത് വലിയ മാറ്റങ്ങൾ വരുത്തുന്ന രണ്ട് പുതിയ അപ്ഡേറ്റുകളാണ് ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) പുറത്തിറക്കിയിരിക്കുന്നത്. ഫ്രഞ്ച് ഭാഷാ പ്രാവീണ്യമുള്ള കാനഡയിൽ പഠനം പൂർത്തിയാക്കുന്ന വിദ്യാർത്ഥികൾക്ക് പി.ആർ അപേക്ഷാ സമയത്ത് ഓപ്പൺ വർക്ക് പെർമിറ്റിന് അപേക്ഷിക്കാനുള്ള അവസരം നൽകുന്നതാണ് ഒന്നാമത്തെ അപ്ഡേറ്റ്. ക്യുബക്കിന് പുറത്തുള്ള ഫ്രഞ്ച് മൈനോറിറ്റി കമ്മ്യൂണിറ്റി സ്റ്റുഡന്റ് പൈലറ്റിന്റെ കീഴിൽ പഠനം പൂർത്തിയാക്കിയവർക്കാണ് ഇത് പ്രയോജനപ്പെടുക.
വിദ്യാർത്ഥികൾക്ക് അവരുടെ പി.ആർ അപേക്ഷയുടെ തീരുമാനം വരുന്നതുവരെ മൂന്ന് വർഷം വരെ കാലാവധിയുള്ള ഓപ്പൺ വർക്ക് പെർമിറ്റ് ഇതിലൂടെ നേടാം. ഇതിനായി കോഴ്സിലെ ക്ലാസുകളുടെ ഭൂരിഭാഗവും ഫ്രഞ്ച് ഭാഷയിലായിരിക്കണമെന്നും കുറഞ്ഞത് രണ്ട് വർഷത്തെ കോഴ്സ് പൂർത്തിയാക്കിയിരിക്കണമെന്നും വ്യവസ്ഥയുണ്ട്. ഈ നയത്തിന് കീഴിലുള്ള പി.ആർ അപേക്ഷകൾ 2027 ശൈത്യകാലത്ത് സ്വീകരിച്ചുതുടങ്ങും. പ്രധാന അപേക്ഷകന്റെ കുടുംബാംഗങ്ങൾക്കും കാനഡയിൽ ഒപ്പമുണ്ടെങ്കിൽ വർക്ക് പെർമിറ്റിനും സ്റ്റഡി പെർമിറ്റിനും അപേക്ഷിക്കാനുള്ള അവസരം ലഭിക്കുന്നുണ്ട്.
എന്നാൽ, ഇൻ-കാനഡ പി.ആർ അപേക്ഷകൾ പരിശോധിക്കുന്ന ഉദ്യോഗസ്ഥർക്കായി പുറത്തിറക്കിയ രണ്ടാമത്തെ അപ്ഡേറ്റ് നിയമങ്ങൾ കൂടുതൽ കർശനമാക്കുന്നതാണ്. പബ്ലിക് പോളിസിയിലെ നിബന്ധനകളിൽ ഇളവ് വരുത്താൻ ഉദ്യോഗസ്ഥർക്ക് മാനുഷിക പരിഗണനാ കാരണങ്ങൾ (H&C) ഉപയോഗിക്കാൻ കഴിയില്ലെന്ന് IRCC ഇതിലൂടെ വ്യക്തമാക്കി. സെക്ഷൻ 25.2 പ്രകാരം മന്ത്രി പുറത്തിറക്കുന്ന പബ്ലിക് പോളിസിയിലെ വ്യവസ്ഥകളിൽ ഏതെങ്കിലും ഒന്നിൽ അപേക്ഷകൻ പരാജയപ്പെട്ടാൽ, മാനുഷിക പരിഗണനകളുടെ അടിസ്ഥാനത്തിൽ മാത്രം ആ അപേക്ഷ അംഗീകരിക്കാൻ ഉദ്യോഗസ്ഥർക്ക് അധികാരമില്ല. അത്തരം സന്ദർഭങ്ങളിൽ അപേക്ഷ നിരസിക്കപ്പെടുകയും പരാജയപ്പെട്ട കാരണം കത്തിൽ വ്യക്തമാക്കുകയും ചെയ്യും. മാനുഷിക പരിഗണനകൾ അപേക്ഷയോടൊപ്പം ആവശ്യപ്പെട്ടാലും പബ്ലിക് പോളിസിയിലെ നിബന്ധനകളെ അത് മറികടക്കില്ല. അപേക്ഷ നിരസിക്കപ്പെടുകയാണെങ്കിൽ, വേണമെങ്കിൽ ഫീസ് അടച്ച് പുതിയൊരു എച്ച്.ആൻഡ്.സി അപേക്ഷയായി വീണ്ടും സമർപ്പിക്കാവുന്നതാണ്. ക്യൂബക്കിന് പുറത്തുള്ള പ്രവിശ്യകളിൽ താമസിക്കാൻ ഉദ്ദേശിക്കുന്നവർക്ക് മാത്രമാണ് ഈ പുതിയ നയങ്ങൾ ബാധകമാകുന്നത്.
2 New IRCC Updates For Canada PR And Open Work Permit Applications
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
