ന്യൂഡൽഹി: 1000 രൂപയുടെ പുതിയ കറൻസി നോട്ട് പുറത്തിറക്കുമെന്ന സമൂഹമാധ്യമ പ്രചാരണം വ്യാജമാണെന്ന് കേന്ദ്ര സർക്കാരിന്റെ പ്രസ് ഇൻഫർമേഷൻ ബ്യൂറോയുടെ (PIB) ഫാക്ട് ചെക്ക് വിഭാഗം. പുതിയ 1000 രൂപ നോട്ട് പുറത്തിറക്കുന്നതുമായി ബന്ധപ്പെട്ട് റിസർവ് ബാങ്ക് ഓഫ് ഇന്ത്യ (RBI) പ്രഖ്യാപനമൊന്നും നടത്തിയിട്ടില്ലെന്ന് അധികൃതർ വ്യക്തമാക്കി.
തഞ്ചാവൂർ രാജരാജേശ്വര ക്ഷേത്രത്തിന്റെ ചിത്രമുള്ള മഞ്ഞ നിറത്തിലുള്ള 1000 രൂപ നോട്ടിന്റെ ചിത്രങ്ങളും വീഡിയോകളുമാണ് സമൂഹമാധ്യമങ്ങളിൽ പ്രചരിച്ചത്. പുതിയ നോട്ട് പുറത്തിറക്കിയെന്നും ഉടൻ വിപണിയിലെത്തുമെന്നുമായിരുന്നു ചില പോസ്റ്റുകളിലെ അവകാശവാദം. ഇൻസ്റ്റഗ്രാം, ട്വിറ്റർ, ടെലഗ്രാം തുടങ്ങിയ പ്ലാറ്റ്‌ഫോമുകളിലൂടെ ഈ പ്രചാരണം വ്യാപകമായി.
ALSO READ: ഐഫോൺ ഡ്യുവോയുടെ ഡിസ്പ്ലേയിൽ തകരാർ; പ്രശ്നമുള്ള ഫോണുകൾ മാറ്റിനൽകുമെന്ന് ആപ്പിൾ
എന്നാൽ, ഈ അവകാശവാദങ്ങൾ തെറ്റാണെന്ന് പി.ഐ.ബി ഫാക്ട് ചെക്ക് വ്യക്തമാക്കി. സ്ഥിരീകരിക്കാത്ത വിവരങ്ങൾ വിശ്വസിക്കുകയോ പങ്കുവെക്കുകയോ ചെയ്യരുതെന്നും അധികൃതർ മുന്നറിയിപ്പ് നൽകി.
2016 നവംബർ എട്ടിന് കേന്ദ്ര സർക്കാർ പ്രഖ്യാപിച്ച നോട്ട് അസാധുവാക്കൽ നടപടിയിലൂടെയാണ് അന്നത്തെ 1000 രൂപ നോട്ട് പിൻവലിച്ചത്. പിന്നീട് പുതിയ 500 രൂപ നോട്ട് പുറത്തിറക്കിയെങ്കിലും 1000 രൂപയുടെ നോട്ട് വീണ്ടും പ്രചാരത്തിൽ വന്നിട്ടില്ല.
പുതിയ കറൻസി നോട്ടുകളെക്കുറിച്ചുള്ള വിവരങ്ങൾ റിസർവ് ബാങ്കിന്റെ ഔദ്യോഗിക അറിയിപ്പുകളിലൂടെ പരിശോധിക്കണമെന്ന് പി.ഐ.ബി നിർദേശിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
