ബംഗളൂരു: നിതീഷ് തിവാരിയുടെ സംവിധാനത്തിൽ അണിഞ്ഞൊരുങ്ങിയ ബ്രഹ്മാണ്ഡ ചിത്രം ‘രാമായണ: പാർട്ട് 1’ ലോകമെമ്പാടുമുള്ള തിയേറ്ററുകളിൽ റിലീസ് ചെയ്തു. 4,000 കോടി രൂപയുടെ മെഗാ ബജറ്റിൽ രണ്ട് ഭാഗങ്ങളായി ഒരുങ്ങുന്ന ഈ സിനിമാ പരമ്പരയുടെ ആദ്യഭാഗത്തിന് പ്രേക്ഷകരിൽ നിന്നും ചലച്ചിത്ര ലോകത്തുനിന്നും മികച്ച പ്രതികരണമാണ് ലഭിക്കുന്നത്. റിലീസിന് തൊട്ടുമുമ്പ് ചിത്രത്തിനും അണിയറപ്രവർത്തകർക്കും പിന്തുണ പ്രഖ്യാപിച്ച് തെലുങ്ക് സൂപ്പർ താരം അല്ലു അർജുൻ രംഗത്തെത്തിയിരുന്നു.
“രാമായണ ടീമിന് എന്റെ ഹൃദയം നിറഞ്ഞ ആശംസകൾ. ഇതൊരു വെറുമൊരു സിനിമ മാത്രമല്ല, നമ്മുടെ സംസ്കാരത്തിന്റെ പ്രതിഫലനവും ഇന്ത്യൻ സിനിമയുടെ നിലവാരം ഉയർത്താനുള്ള മികച്ചൊരു ശ്രമവുമാണ്. ഈ ദിവ്യമായ ശ്രമത്തിന് എന്റെ എല്ലാവിധ പോസിറ്റീവ് ആശംസകളും നേരുന്നു. നമ്മുടെ കഥകളും സംസ്കാരവും പ്രൗഢിയും പേറുന്ന ഈ ശുദ്ധമായ ശ്രമത്തെ പിന്തുണയ്ക്കാൻ നമുക്കെല്ലാവർക്കും ഒന്നിക്കാം. ജയ് ശ്രീറാം,” എന്നാണ് അല്ലു അർജുൻ എക്സിൽ കുറിച്ചത്. താരത്തിന്റെ പോസ്റ്റിന് പിന്നാലെ സംവിധായകൻ നിതീഷ് തിവാരിയും നിർമ്മാതാക്കളും താരത്തിന് നന്ദി അറിയിച്ചു.
ശ്രീരാമനായി വെള്ളിത്തിരയിലെത്തിയ രൺബീർ കപൂർ കഥാപാത്രത്തിന്റെ ശാന്തതയും ഗാംഭീര്യവും തികഞ്ഞ പക്വതയോടെയും അടക്കത്തോടെയും ആവിഷ്‌കരിച്ചിട്ടുണ്ട്. രാവണന്റെ വീര്യവും ആധിപത്യവും മാസ് പ്രാതിനിധ്യത്തോടെ സ്ക്രീനിൽ ആവിഷ്കരിച്ച ‘റോക്കിങ് സ്റ്റാർ’ യഷ് ചിത്രത്തിലെ തിളങ്ങുന്ന താരമായി മാറി. സീതാദേവിയായെത്തിയ സായ് പല്ലവി തനതായ ലാളിത്യവും ദിവ്യത്വവും പ്രതിഫലിപ്പിച്ചപ്പോൾ, ലക്ഷ്മണനായി രവി ദുബെയും കൈകേയിയായി മലയാളികളുടെ പ്രിയനടി ശോഭനയും രാവണന്റെ അച്ഛനായ ദശരഥ മഹാരാജാവായി അരുൺ ഗോവിലും മികച്ച പിന്തുണ നൽകി.
ഇന്ത്യൻ സിനിമാചരിത്രത്തിൽ അവിസ്മരണീയമായ രീതിയിലുള്ള വിഷ്വൽ എഫക്റ്റുകളാണ് പ്രശസ്ത വിഎഫ്എക്സ് സ്റ്റുഡിയോയായ ഡിഎൻഇജി (DNEG) ചിത്രത്തിനായി ഒരുക്കിയിരിക്കുന്നത്. അയോധ്യയുടെ പ്രൗഢിയും ലങ്കയുടെ വിസ്മയിപ്പിക്കുന്ന വേൾഡ് ബിൽഡിംഗും ജഡായു-രാവണ യുദ്ധരംഗങ്ങളും വലിയ സ്ക്രീനിൽ കണ്ണിന് വിരുന്നാകുന്നു. ഓസ്‌കാർ ജേതാക്കളായ എ.ആർ. റഹ്മാനും ഹാൻസ് സിമ്മറും ചേർന്നൊരുക്കിയ പശ്ചാത്തലസംഗീതം ചിത്രത്തിന്റെ ആക്ഷൻ-വൈകാരിക രംഗങ്ങളെ വേറിട്ട തലത്തിലേക്ക് ഉയർത്തുന്നു.
ചിത്രത്തെ പ്രശംസിച്ച് പ്രമുഖ സംവിധായകൻ എസ്.എസ്. രാജമൗലിയും ബോളിവുഡ് സംവിധായകൻ കരൺ ജോഹറും രംഗത്തെത്തിയിട്ടുണ്ട്. ബിഗ് സ്ക്രീനിൽ മാത്രം അനുഭവിച്ചറിയേണ്ട മികച്ചൊരു കാഴ്ചയാണണിതെന്നും രൺബീറിന്റെയും യഷിന്റെയും പ്രകടനങ്ങൾ അതിശയിപ്പിക്കുന്നതാണെന്നും രാജമൗലി എക്സിൽ കുറിച്ചു. ചിത്രത്തിന്റെ ക്ലൈമാക്സ് രംഗങ്ങൾക്ക് ശേഷമുള്ള പോസ്റ്റ്-ക്രെഡിറ്റ് സീനിൽ സണ്ണി ഡിയോൾ ഹനുമാനായി തീയേറ്ററുകളിൽ നടത്തുന്ന മാസ് എൻട്രി രണ്ടാം ഭാഗത്തിനായുള്ള പ്രതീക്ഷകൾ വാനോളമുയർത്തുന്നു.
ALSO READ: ഭൂമിയെ ചുട്ടുപൊള്ളിക്കാൻ സൂപ്പർ എൽ നിനോ? 2026 ഏറ്റവും ചൂടേറിയ വർഷമാകുമെന്ന് വിലയിരുത്തൽ
ചില കഥാപാത്രങ്ങളുടെ വൈകാരിക തലങ്ങൾക്ക് കൂടുതൽ ആഴം നൽകമായിരുന്നു എന്ന് ചില നിരൂപകർ ചൂണ്ടിക്കാട്ടുന്നുണ്ടെങ്കിലും, മൂന്ന് മണിക്കൂറിലധികം നീളുന്ന ദൈർഘ്യം മറികടന്ന് ഇന്ത്യൻ സിനിമയുടെ പെരുമ ആഗോളതലത്തിലേക്ക് ഉയർത്തുന്ന തിയേറ്റർ അനുഭവമാണ് നിതീഷ് തിവാരിയുടെ രാമായണം സമ്മാനിക്കുന്നത്. ചിത്രത്തിന്റെ രണ്ടാം ഭാഗം 2027 ദീപാവലി റിലീസായി തിയേറ്ററുകളിലെത്തുമെന്നാണ് സൂചന.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
