ടൊറന്റോ: റോഡ് സുരക്ഷ മുൻനിർത്തി ഒന്റാറിയോ സർക്കാർ കൊണ്ടുവന്ന പുതിയ ഡ്രൈവിംഗ് നിയമങ്ങൾ ജൂലൈ 2026 മുതൽ പ്രാബല്യത്തിൽ വന്നു. മദ്യപിച്ചോ ലഹരി ഉപയോഗിച്ചോ വാഹനമോടിക്കുന്നവർക്കും, പുതിയ കുടിയേറ്റക്കാർക്കും, വാണിജ്യ വാഹന ഓപ്പറേറ്റർമാർക്കും ഈ മാറ്റങ്ങൾ വലിയ രീതിയിൽ ബാധിക്കും
ജൂലൈ 1 മുതൽ മദ്യപിച്ച് വാഹനമോടിച്ച് ശിക്ഷിക്കപ്പെടുന്നവർ നിർബന്ധമായും തങ്ങളുടെ വാഹനങ്ങളിൽ ഇഗ്നിഷൻ ഇന്റർലോക്ക് ഉപകരണം ഘടിപ്പിക്കണം. ഇത് ശ്വാസം പരിശോധിച്ച ശേഷം മദ്യത്തിന്റെ അംശമില്ലെന്ന് ഉറപ്പുവരുത്തിയാൽ മാത്രമേ വാഹനം സ്റ്റാർട്ട് ആകുകയുള്ളൂ. ഈ ഉപകരണം നീക്കം ചെയ്ത ശേഷം ആറുമാസത്തേക്ക് സീറോ-ടോളറൻസ് നിയമം ബാധകമായിരിക്കും. ഈ കാലയളവിൽ ശരീരത്തിൽ മദ്യത്തിന്റെയോ ലഹരിയുടെയോ നേരിയ അംശം പോലും കണ്ടെത്തുകയാണെങ്കിൽ, ഉടനടി ലൈസൻസ് റദ്ദാക്കപ്പെടും.
ഒന്റാറിയോയുമായി ലൈസൻസ് കൈമാറ്റ കരാറില്ലാത്ത രാജ്യങ്ങളിൽ നിന്ന് വരുന്നവർക്ക്, അവരുടെ പഴയ ലൈസൻസ് പരിചയം 12 മാസത്തേക്ക് മാത്രമേ ഇനി കണക്കാക്കുകയുള്ളൂ. പൂർണ്ണമായ ‘G’ ലൈസൻസ് ലഭിക്കുന്നതിനായി അവർക്ക് ഇവിടുത്തെ ഡ്രൈവിംഗ് പരീക്ഷകളും നിർബന്ധിത കാലാവധിയും പൂർത്തിയാക്കേണ്ടി വരും. അതേസമയം, ഹൈവേ 401, 416 എന്നിവയുടെ നിശ്ചിത ഭാഗങ്ങളിൽ വേഗത പരിധി 110 കിലോമീറ്ററായി സ്ഥിരമായി വർദ്ധിപ്പിച്ചു. റോഡ് ടെസ്റ്റുകൾക്കും ഡ്രൈവിംഗ് ലൈസൻസുകൾക്കും ഈ വർഷം ഫീസ് വർദ്ധനവ് ഉണ്ടാകില്ലെന്നും സർക്കാർ അറിയിച്ചിട്ടുണ്ട്.
വാണിജ്യ വാഹനങ്ങളുടെ സുരക്ഷ ഉറപ്പാക്കാൻ സിവിഒആർ (CVOR) സർട്ടിഫിക്കറ്റുകളിൽ എപ്പോൾ വേണമെങ്കിലും നിബന്ധനകൾ ചേർക്കാൻ അധികൃതർക്ക് അധികാരം നൽകി. ടോ ട്രക്ക് ഓപ്പറേറ്റർമാർ വാഹനം നീക്കുന്നതിന് മുൻപ് ഫോട്ടോ എടുക്കണമെന്നും വണ്ടികളിൽ വ്യക്തമായ അടയാളപ്പെടുത്തലുകൾ വേണമെന്നും പുതിയ നിയമം അനുശാസിക്കുന്നു. 2027 ജനുവരി 1 മുതൽ, വാണിജ്യ വാഹനങ്ങൾ ഓടിക്കാനുള്ള ലൈസൻസിന് അപേക്ഷിക്കുന്നവർക്ക് അതിനു മുൻപുള്ള 12 മാസത്തിനുള്ളിൽ ചുരുങ്ങിയത് 6 മാസമെങ്കിലും ഒന്റാറിയോയിലെ ‘Full G’ ലൈസൻസ് ഉണ്ടായിരിക്കണം എന്ന പുതിയ നിബന്ധനയും സർക്കാർ പ്രഖ്യാപിച്ചിട്ടുണ്ട്.
റോഡ് സുരക്ഷ വർദ്ധിപ്പിക്കുന്നതിനും നിയമലംഘനങ്ങൾ കുറയ്ക്കുന്നതിനുമായിട്ടാണ് സർക്കാർ ഈ നടപടികൾ സ്വീകരിച്ചിരിക്കുന്നത്. വാഹനമോടിക്കുന്നവർ പുതിയ നിയമങ്ങളെക്കുറിച്ച് കൃത്യമായി മനസ്സിലാക്കണമെന്നും അല്ലാത്തപക്ഷം കനത്ത പിഴയും ലൈസൻസ് റദ്ദാക്കലുകളും നേരിടേണ്ടി വരുമെന്നും അധികൃതർ മുന്നറിയിപ്പ് നൽകുന്നു.
10 New Ontario Driving Laws Now In Effect In July 2026
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
