ന്യൂഡൽഹി: കാനഡയിൽ നിന്ന് ഇന്ത്യയിലേക്ക് മടങ്ങിയെത്തിയ ഒരു പ്രൊഫഷണൽ നേരിട്ട കഠിനമായ തൊഴിൽ പ്രശ്നം പങ്കുവെച്ച റെഡ്ഡിറ്റ് പോസ്റ്റ് സോഷ്യൽ മീഡിയയിൽ ചർച്ചയാകുന്നു. കഴിഞ്ഞ രണ്ട് മാസത്തിനിടെ 600-ൽ അധികം ജോലികൾക്ക് അപേക്ഷിച്ചിട്ടും വെറും നാല് അഭിമുഖങ്ങൾക്ക് മാത്രമാണ് ക്ഷണം ലഭിച്ചതെന്ന് മാർക്കറ്റിംഗ്/കമ്മ്യൂണിക്കേഷൻസ് മേഖലയിൽ പ്രവർത്തിക്കുന്ന ഈ പ്രവാസി വെളിപ്പെടുത്തി.
“ഇന്ത്യയിലേക്ക് മടങ്ങിയെത്തിയിട്ടും ഒരു ജോലി കണ്ടെത്താൻ കഴിയുന്നില്ല,” എന്ന തലക്കെട്ടോടെയാണ് അദ്ദേഹം തന്റെ ദുരനുഭവം പങ്കുവെച്ചത്. കാനഡയിൽ വെറും 50 മുതൽ 100 വരെ അപേക്ഷകൾ അയച്ചാൽ തന്നെ 10 മുതൽ 15 വരെ അഭിമുഖങ്ങൾ ലഭിച്ചിരുന്ന സ്ഥാനത്ത്, ഇന്ത്യയിലെ തൊഴിലന്വേഷണം കടുത്ത നിരാശയാണ് നൽകുന്നതെന്നും അദ്ദേഹം കൂട്ടിച്ചേർത്തു. വലിയ കമ്പനികളിൽ പ്രവർത്തിച്ച പരിചയമുള്ള തനിക്ക് ഇന്ത്യയിലെ തൊഴിൽ വിപണി ഇത്രയും ബുദ്ധിമുട്ടുള്ളതാണെന്ന് ഒരിക്കലും കരുതിയില്ലെന്നും പോസ്റ്റിൽ പറയുന്നു. മാത്രമല്ല, തന്റെ അനുഭവപരിചയമുള്ള മേഖലയിൽ ഇന്ത്യയിൽ ലഭിക്കുന്ന ശമ്പളം വളരെ കുറവാണ് എന്നും അദ്ദേഹം പരാതിപ്പെട്ടു. നിലവിലെ സാഹചര്യത്തിൽ എങ്ങനെ മുന്നോട്ട് പോകണമെന്നും കടുപ്പമേറിയ ഈ സാഹചര്യത്തെ എങ്ങനെ മറികടക്കണമെന്നും അറിയില്ലെന്ന് പോസ്റ്റിൽ പറയുന്നു.
പോസ്റ്റിന് പ്രതികരണമായി നിരവധി ഉപദേശങ്ങളാണ് സോഷ്യൽ മീഡിയ ഉപയോക്താക്കൾ പങ്കുവെച്ചത്. വിദേശ ബിരുദമോ അനുഭവപരിചയമോ ഒരുപാട് ഗുണം ചെയ്യില്ലെന്നും, കനേഡിയൻ ജീവിതത്തിൽ നിന്ന് ലഭിച്ച അനുഭവങ്ങൾ ഉപേക്ഷിച്ച് വേണം ജോലി അന്വേഷണം തുടരാൻ എന്നും ചിലർ കമന്റ് ചെയ്തു. കൂടാതെ, മാർക്കറ്റിംഗ് രംഗത്തുള്ള പലർക്കും ഗൾഫ് മേഖലയിൽ മികച്ച അവസരങ്ങൾ ലഭിച്ചിട്ടുണ്ടെന്നും, അങ്ങോട്ട് ശ്രദ്ധ തിരിക്കുന്നത് നല്ലൊരു വഴിയാണെന്നും ചിലർ നിർദ്ദേശിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Returning from Canada, Unable to Secure a Job: Young Man’s Post on Indian Job Market Goes Viral
