ജോലിയും പരിചരണവും ഒരേസമയം; കാനഡയിലെ കെയർഗിവർമാർ കടുത്ത പ്രതിസന്ധിയിലെന്ന് റിപ്പോർട്ട്

ഒട്ടാവ: ജോലിസ്ഥലത്തെ ഉത്തരവാദിത്തങ്ങളും പ്രിയപ്പെട്ടവരുടെ പരിചരണവും ഒരുപോലെ കൊണ്ടുപോകാൻ കഴിയാതെ കാനഡയിലെ പകുതിയിലധികം കെയർഗിവർമാരും കടുത്ത സമ്മർദ്ദത്തിലെന്ന് പുതിയ പഠന റിപ്പോർട്ട്. കനേഡിയൻ സെന്റർ ഫോർ കെയർഗിവിംഗ് എക്സലൻസ് പുറത്തുവിട്ട ‘കെയറിംഗ് ഇൻ കാനഡ 2026’ എന്ന ദേശീയ റിപ്പോർട്ടിലാണ് രാജ്യത്തെ കെയർഗിവർമാർ നേരിടുന്ന ദുസ്സഹമായ സാഹചര്യങ്ങൾ വ്യക്തമാക്കുന്നത്. പ്രായമായ മാതാപിതാക്കൾ, ഭിന്നശേഷിയുള്ള കുട്ടികൾ, രോഗബാധിതരായ പങ്കാളികൾ എന്നിവരെ പരിചരിക്കുന്നതിനൊപ്പം ഉപജീവനത്തിനായി ജോലി ചെയ്യേണ്ടി വരുന്നത് ഇവരുടെ മാനസികവും സാമ്പത്തികവുമായ നില തകിടം മറിക്കുന്നുവെന്നാണ് കണ്ടെത്തൽ.

കാനഡയിലെ കെയർഗിവർമാരിൽ 59 ശതമാനം പേരും മറ്റ് തൊഴിലുകളിൽ ഏർപ്പെട്ടിരിക്കുന്നവരാണെന്ന് റിപ്പോർട്ട്. ജോലിക്ക് ശേഷമുള്ള സമയങ്ങളിൽ ശമ്പളമോ മറ്റ് ആനുകൂല്യങ്ങളോ ഇല്ലാതെ പ്രതിദിനം ശരാശരി അഞ്ച് മണിക്കൂറിലധികമാണ് ഇവർ പ്രിയപ്പെട്ടവരുടെ പരിചരണത്തിനായി ചെലവഴിക്കുന്നത്.

വർദ്ധിച്ചുവരുന്ന സാമ്പത്തിക ബാധ്യതകൾ മറികടക്കാൻ അധികസമയം ജോലി ചെയ്യേണ്ടി വരുന്നതും, അതോടൊപ്പം പരിചരണത്തിനായി സമയം മാറ്റിവെക്കേണ്ടി വരുന്നതും ഇവരുടെ ഔദ്യോഗിക ജീവിതത്തെ പ്രതികൂലമായി ബാധിക്കുന്നു. കെയർഗിവർമാർക്ക് ജോലിയിൽ കൃത്യത പാലിക്കാൻ കഴിയാത്ത ഈ സാഹചര്യം കാനഡയിലെ തൊഴിൽ മേഖലയ്ക്കും സമ്പദ്‌വ്യവസ്ഥയ്ക്കും വലിയ വെല്ലുവിളിയാവുന്നുണ്ടെന്നും റിപ്പോർട്ട് ചൂണ്ടിക്കാട്ടുന്നു.

പരിചരണത്തിനായുള്ള ചെലവുകൾ വർധിക്കുന്നത് കാനഡയിലെ കുടുംബങ്ങളെ ഒരു സാമ്പത്തിക കുരുക്കിലേക്ക് തള്ളിവിടുകയാണ്. വർധിച്ചുവരുന്ന ജീവിതച്ചെലവുകൾ നേരിടാൻ 17 ശതമാനം പേർ അധിക സമയം ജോലി ചെയ്യുന്നു. ഒൻപത് ശതമാനം പേർ വിരമിക്കൽ പ്രായം നീട്ടിവെച്ചപ്പോൾ, അഞ്ച് ശതമാനം പേർ രണ്ടാം ജോലി കണ്ടെത്താൻ നിർബന്ധിതരായി. ഇതിനു വിപരീതമായി, പരിചരണത്തിന്റെ ഭാരം കാരണം മൂന്നിലൊന്ന് പേർക്ക് ജോലിയിലെ ഉൽപ്പാദനക്ഷമത കുറയുകയും വരുമാനനഷ്ടം സംഭവിക്കുകയും ചെയ്യുന്നുണ്ട്. ജോലി ഉപേക്ഷിക്കേണ്ടി വരുന്ന അവസ്ഥ പലരുടെയും സാമ്പത്തിക ഭദ്രത തകർക്കുന്നതായും പഠനം പറയുന്നു.

രാജ്യത്തെ 2,600-ലധികം കെയർഗിവർമാരിൽ നിന്ന് ശേഖരിച്ച വിവരങ്ങളുടെ അടിസ്ഥാനത്തിലാണ് ഈ റിപ്പോർട്ട് തയ്യാറാക്കിയിരിക്കുന്നത്. പങ്കെടുത്തവരിൽ പകുതിയോളം പേർ കഴിഞ്ഞ ഒരു വർഷത്തിനിടെ കടുത്ത സാമ്പത്തിക ക്ലേശം അനുഭവിച്ചവരാണ്. പലരും കടുത്ത മാനസിക സമ്മർദ്ദവും തളർച്ചയും അനുഭവിക്കുന്നതായും റിപ്പോർട്ടിലുണ്ട്. കെയർഗിവർമാർക്ക് കൂടുതൽ ആനുകൂല്യങ്ങൾ നൽകുക, ജോലിസ്ഥലങ്ങളിൽ ഇളവുകൾ അനുവദിക്കുക, മെച്ചപ്പെട്ട ഹോം-കെയർ സൗകര്യങ്ങൾ ഒരുക്കുക തുടങ്ങിയ കാര്യങ്ങളിൽ സർക്കാർ അടിയന്തരമായി ഇടപെടണമെന്നാണ് റിപ്പോർട്ട് ആവശ്യപ്പെടുന്നത്. വരും വർഷങ്ങളിൽ കാനഡയുടെ സാമൂഹിക വ്യവസ്ഥയിൽ വലിയ മാറ്റങ്ങൾ വരുത്തേണ്ടതിന്റെ ആവശ്യകതയിലേക്കാണ് ഈ പഠനം വിരൽചൂണ്ടുന്നത്.

Working and caring at the same time; Report says caregivers in Canada are in dire straits

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt