ഒട്ടാവ: കടുത്ത മഞ്ഞുവീഴ്ചയ്ക്കും തണുപ്പിനും പിന്നാലെ കാനഡയിലെ പ്രയറി (Prairies) മേഖലകളിൽ അപ്രതീക്ഷിത ഉഷ്ണതരംഗം. ആഴ്ചകളോളം നീണ്ടുനിന്ന കഠിനമായ തണുപ്പിൽ നിന്ന് പെട്ടെന്ന് വേനൽക്കാലത്തിന് സമാനമായ ചൂടിലേക്ക് കാലാവസ്ഥ മാറിയതിനെ ‘വെതർ വിപ്ലാഷ്’ (Weather Whiplash) എന്നാണ് ശാസ്ത്രജ്ഞർ വിശേഷിപ്പിക്കുന്നത്. വരും ദിവസങ്ങളിൽ പശ്ചിമ കാനഡയിലെ വിവിധ പ്രദേശങ്ങളിൽ താപനില 30 മുതൽ 38 ഡിഗ്രി സെൽഷ്യസ് വരെ ഉയർന്നേക്കുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ വിലയിരുത്തൽ.
മേയ് മാസം പകുതി വരെ കടുത്ത തണുപ്പും മഞ്ഞുവീഴ്ചയുമാണ് പ്രയറി മേഖലകളിൽ അനുഭവപ്പെട്ടിരുന്നത്. എന്നാൽ ഇതിന് വിപരീതമായി വരും ദിവസങ്ങളിൽ ആൽബർട്ടയിലെ മെഡിസിൻ ഹാറ്റ്, റെജീന തുടങ്ങിയ നഗരങ്ങളിൽ താപനില 36 മുതൽ 38 ഡിഗ്രി സെൽഷ്യസ് വരെ ഉയർന്നേക്കും. മാനിറ്റോബയിലെ ബ്രാൻഡൻ, വിന്നിപെഗ് തുടങ്ങിയ നഗരങ്ങളിലും വരും ദിവസങ്ങളിൽ കടുത്ത ചൂട് അനുഭവപ്പെടുമെന്ന് പരിസ്ഥിതി-കാലാവസ്ഥാ വ്യതിയാന മന്ത്രാലയത്തിലെ സീനിയർ ക്ലൈമറ്റോളജിസ്റ്റായ ഡേവിഡ് ഫിലിപ്സ് വ്യക്തമാക്കി. ചില പ്രദേശങ്ങളിൽ കഴിഞ്ഞ വർഷത്തെ വേനൽക്കാലത്തേക്കാൾ ഉയർന്ന താപനിലയാണ് ഇപ്പോൾ രേഖപ്പെടുത്തുന്നത്. റെജീനയിൽ സാധാരണയായി 6 ഡിഗ്രി സെൽഷ്യസ് രേഖപ്പെടുത്താറുള്ള രാത്രികാല താപനില നിലവിൽ 20 ഡിഗ്രി സെൽഷ്യസ് വരെ ഉയർന്നിട്ടുണ്ട്.
“മേയ് മാസത്തിന്റെ ഭൂരിഭാഗവും കടുത്ത മഞ്ഞുവീഴ്ചയെക്കുറിച്ചാണ് നമ്മൾ സംസാരിച്ചിരുന്നത്. നദികളിൽ ചൂണ്ടയിടുന്നതിനേക്കാൾ കൂടുതൽ മഞ്ഞുപാളികൾക്ക് മുകളിലിരുന്നാണ് ജനങ്ങൾ സമയം ചെലവഴിച്ചിരുന്നത്. എന്നാൽ ഇപ്പോൾ കാര്യങ്ങൾ ആകെ മാറിമറിഞ്ഞിരിക്കുന്നു.” – ഡേവിഡ് ഫിലിപ്സ് സിടിവി ന്യൂസിനോട് പറഞ്ഞു.
വരാനിരിക്കുന്ന ജൂൺ, ജൂലൈ, ഓഗസ്റ്റ് മാസങ്ങളിലും സമാനമായ രീതിയിൽ കടുത്ത ചൂട് തുടരാനാണ് സാധ്യതയെന്ന് പ്രാരംഭ കാലാവസ്ഥാ പ്രവചനങ്ങൾ സൂചിപ്പിക്കുന്നു. കഠിനമായ തണുപ്പിൽ വലഞ്ഞ കനേഡിയൻ ജനതയ്ക്ക് ഈ കാലാവസ്ഥാ വ്യതിയാനം താല്ക്കാലിക ആശ്വാസം നൽകുമെങ്കിലും പെട്ടെന്നുള്ള ഈ മാറ്റം ആശങ്കയോടെയാണ് വിദഗ്ധർ കാണുന്നത്. അതേസമയം, വസന്തകാലത്തുണ്ടായ കടുത്ത തണുപ്പും മഴയും കാരണം ഇത്തവണ കാട്ടുതീയുടെ ഭീഷണി വലിയ തോതിൽ കുറഞ്ഞിട്ടുണ്ട്. കഴിഞ്ഞ വർഷത്തെ അപേക്ഷിച്ച് കേവലം അഞ്ച് ശതമാനം കാട്ടുതീ മാത്രമാണ് ഈ വർഷം ഇതുവരെ റിപ്പോർട്ട് ചെയ്യപ്പെട്ടിട്ടുള്ളത്.
കാനഡയിൽ അനുഭവപ്പെടുന്ന ഈ കടുത്ത ചൂട് ആഗോള കാലാവസ്ഥാ വ്യതിയാനത്തിന്റെ ഭാഗമാണെന്നാണ് വിലയിരുത്തൽ. യൂറോപ്പിലും ഇന്ത്യയിലും നിലവിൽ അനുഭവപ്പെടുന്ന കടുത്ത താപനിലയുടെ തുടർച്ചയാണിത്. പശ്ചിമ യൂറോപ്പിന് മുകളിലുണ്ടായ ശക്തമായ ‘ഹീറ്റ് ഡോം’ ആഫ്രിക്കയിൽ നിന്നുള്ള ചൂടുള്ള വായുവിനെ വടക്കൻ മേഖലകളിലേക്ക് തള്ളിവിടുന്നതാണ് ലണ്ടൻ ഉൾപ്പെടെയുള്ള നഗരങ്ങളിൽ താപനില ഉയരാൻ കാരണം. ആഗോളതലത്തിൽ താപനില ഉയരുന്ന പ്രതിഭാസമാണ് ഇപ്പോൾ കാനഡയിലും പ്രതിഫലിക്കുന്നതെന്ന് കാലാവസ്ഥാ വിദഗ്ധർ ചൂണ്ടിക്കാണിക്കുന്നു. സാഹചര്യങ്ങൾ വിലയിരുത്തി പരിസ്ഥിതി മന്ത്രാലയം വിവിധ മേഖലകളിൽ ജാഗ്രതാ നിർദ്ദേശം പുറപ്പെടുവിച്ചിട്ടുണ്ട്.
winter-weary-canadians-will-have-a-hot-summer-season-to-look-forward-to-phillips
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
