ഒട്ടാവ: കാനഡയിലെ തൊഴിലാളികളുടെ ശരാശരി ആഴ്ച ശമ്പളത്തിൽ കഴിഞ്ഞ വർഷത്തേക്കാൾ വർധനയുണ്ടായതായി പുതിയ കണക്കുകൾ. സ്റ്റാറ്റിസ്റ്റിക്സ് കാനഡ പുറത്തുവിട്ട ഏറ്റവും പുതിയ റിപ്പോർട്ട് പ്രകാരം 2026 മെയ് മാസത്തിൽ രാജ്യത്തെ ശരാശരി ആഴ്ച വരുമാനം 1,337.77 കനേഡിയൻ ഡോളറായി ഉയർന്നു. പ്രവിശ്യകളും ടെറിട്ടറികളും തിരിച്ചുള്ള കണക്കുകളിൽ ഏറ്റവും ഉയർന്ന വരുമാനം നുനാവട്ടിലും (1,862.20 ഡോളർ) ഏറ്റവും കുറഞ്ഞ വരുമാനം പ്രിൻസ് എഡ്വേർഡ് ഐലൻഡിലുമാണ് (1,189.61 ഡോളർ) രേഖപ്പെടുത്തിയത്. ഇതിൽ ഏറ്റവും കൂടിയ പ്രദേശവും കുറഞ്ഞ പ്രദേശവും തമ്മിൽ ആഴ്ചയിൽ ഏകദേശം 700 ഡോളറിന്റെ വലിയ വ്യത്യാസമാണുള്ളത്.
തൊഴിൽ മേഖലകളിലെ മാറ്റങ്ങൾ, മുൻവർഷത്തെ വേതന നിരക്കുകൾ, ആഴ്ചയിലെ ജോലി സമയം എന്നിവ അടിസ്ഥാനമാക്കിയാണ് ശരാശരി വരുമാനം കണക്കാക്കിയത്. മെയ് മാസത്തിലെ വിവരങ്ങൾ അനുസരിച്ച് കനേഡിയൻ തൊഴിലാളികൾ ആഴ്ചയിൽ ശരാശരി 33.4 മണിക്കൂർ ജോലി ചെയ്യുന്നുണ്ട്. ഇതോടൊപ്പം രാജ്യത്തെ ഒഴിവുള്ള ജോലികളുടെ എണ്ണം 4,95,700 ആയി തുടരുകയാണ്. നിർമ്മാണം, ധനകാര്യം, സാങ്കേതിക സേവനങ്ങൾ എന്നീ മേഖലകളിൽ പുതിയ ജോലി ഒഴിവുകൾ വർധിച്ചപ്പോൾ ഹെൽത്ത് കെയർ, വിവര സാങ്കേതിക വിദ്യ തുടങ്ങിയ മേഖലകളിൽ ഒഴിവുകൾ കുറഞ്ഞതായും ഔദ്യോഗിക വിവരങ്ങൾ വ്യക്തമാക്കുന്നു.
വേതനത്തിൽ വർധനവുണ്ടായിട്ടുണ്ടെങ്കിലും നിത്യോപയോഗ സാധനങ്ങളുടെയും ഭക്ഷണത്തിന്റെയും വിലക്കയറ്റം കനേഡിയൻ കുടുംബങ്ങളുടെ ബജറ്റിനെ പ്രതികൂലമായി ബാധിക്കുന്നുണ്ട്. ജൂൺ മാസത്തിൽ പണപ്പെരുപ്പം 2.8 ശതമാനമായി കുറഞ്ഞെങ്കിലും പച്ചക്കറികൾ ഉൾപ്പെടെയുള്ള ഭക്ഷ്യവസ്തുക്കളുടെ വിലയിൽ 3.9 ശതമാനം വർധന രേഖപ്പെടുത്തി. വിലക്കയറ്റം തുടരുന്ന സാഹചര്യത്തിൽ കുടുംബങ്ങൾ ദൈനംദിന ചെലവുകൾ ചുരുക്കാൻ നിർബന്ധിതരാകുന്നതായി സാമ്പത്തിക വിദഗ്ധരുടെ വിലയിരുത്തലുകൾ സൂചിപ്പിക്കുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Which region in Canada offers the highest salaries? Where are they the lowest? Figures released.
