ഒട്ടാവ: കാനഡയെയും അമേരിക്കയെയും ബന്ധിപ്പിക്കുന്ന ഗോർഡി ഹോവ് ഇന്റർനാഷണൽ ബ്രിഡ്ജിന്റെ ഉദ്ഘാടനവുമായി ബന്ധപ്പെട്ട രാഷ്ട്രീയ ചർച്ചകൾ തുടരുന്നതിനിടെയും, പാലത്തിന്റെ നിർമാണത്തിൽ പങ്കെടുത്ത രണ്ട് ഇരുമ്പ് തൊഴിലാളികളുടെ അനുഭവങ്ങളാണ് ഇപ്പോൾ ശ്രദ്ധ നേടുന്നത്. ഒന്റാറിയോ സ്വദേശിയായ ജേസൺ ഹഗെറ്റും അമേരിക്കയിലെ മിഷിഗൺ സ്വദേശിയായ കേസി വിറ്റ്സണും പാലത്തിന്റെ നിർമാണത്തിലെ ചരിത്രനിമിഷത്തിന് സാക്ഷികളായവരാണ്.
2024 ജൂൺ 14-ന് പുലർച്ചെയായിരുന്നു പാലത്തിന്റെ രണ്ട് ഭാഗങ്ങളെയും ബന്ധിപ്പിക്കുന്ന അവസാന സ്റ്റീൽ ഗർഡറുകൾ സ്ഥാപിച്ചത്. ഇതോടെ കാനഡയുടെയും അമേരിക്കയുടെയും ഭാഗങ്ങളിൽ നിന്ന് നിർമ്മിച്ചിരുന്ന പാലം പൂർണമായി ഒന്നിച്ചു ചേർന്നു. ഈ ചരിത്രനിമിഷം അടയാളപ്പെടുത്താൻ ഓരോ രാജ്യത്തുനിന്നും ഓരോ ഇരുമ്പ് തൊഴിലാളിയെ തിരഞ്ഞെടുത്ത് പരസ്പരം കൈകോർക്കുന്ന പ്രതീകാത്മക ചടങ്ങും സംഘടിപ്പിച്ചു. ആ ദൃശ്യം പകർത്തിയ ചിത്രം പിന്നീട് രണ്ട് രാജ്യങ്ങളുടെയും സഹകരണത്തിന്റെ പ്രതീകമായി മാറി.
22 വർഷത്തെ പ്രവൃത്തി പരിചയമുള്ള ജേസൺ ഹഗെറ്റ്, തന്റെ കരിയറിലെ ഏറ്റവും മികച്ച നിമിഷങ്ങളിലൊന്നാണ് അതെന്ന് പറഞ്ഞു. അന്ന് രാത്രിയിലാണ് ജോലി ആരംഭിച്ചതെന്നും മണിക്കൂറുകൾ നീണ്ട തയ്യാറെടുപ്പുകൾക്കൊടുവിലാണ് അവസാന സ്റ്റീൽ ഘടകങ്ങൾ സ്ഥാപിക്കാൻ കഴിഞ്ഞതെന്നും അദ്ദേഹം ഓർത്തെടുത്തു. ഇത്രയും വലിയ സ്റ്റീൽ ഘടനകളിൽ മുമ്പ് പ്രവർത്തിച്ചിട്ടില്ലെന്നും, നിർമാണകാലത്ത് വലിയ അപകടങ്ങളോ തൊഴിലാളികൾക്ക് പരിക്കുകളോ സംഭവിക്കാതെ പദ്ധതി പൂർത്തിയാക്കാൻ കഴിഞ്ഞത് വലിയ നേട്ടമാണെന്നും അദ്ദേഹം പറഞ്ഞു.
ഉദ്ഘാടനദിവസം പാലത്തിലൂടെ വാഹനങ്ങൾ സഞ്ചരിക്കുന്ന കാഴ്ച നേരിൽ കാണാൻ ആഗ്രഹമുണ്ടെന്നും അദ്ദേഹം കൂട്ടിച്ചേർത്തു. അമേരിക്കൻ ഭാഗത്ത് നിന്നുള്ള കേസി വിറ്റ്സൺ ഈ പദ്ധതി രണ്ട് രാജ്യങ്ങളും ചേർന്ന് നേടിയ വിജയമാണെന്ന് പറഞ്ഞു. കാനഡൻ സംഘത്തിന് മുൻകൂട്ടി പദ്ധതിയുണ്ടായിരുന്നെങ്കിലും അമേരിക്കൻ ഭാഗത്ത് നിന്ന് ആരാണ് പ്രതീകാത്മകമായി കൈകോർക്കേണ്ടതെന്ന് തീരുമാനിച്ചിരുന്നില്ല. അപ്പോഴാണ് താൻ തന്നെ മുന്നോട്ടുവന്നതെന്നും, അതുവഴിയാണ് ആ ചരിത്രചിത്രത്തിന്റെ ഭാഗമാകാൻ കഴിഞ്ഞതെന്നും അദ്ദേഹം പറഞ്ഞു.
തന്റെ പിതാവും ഡെട്രോയിറ്റിലെ നിരവധി പ്രധാന കെട്ടിടങ്ങളുടെ നിർമാണത്തിൽ പങ്കെടുത്ത ഇരുമ്പ് തൊഴിലാളിയായിരുന്നതിനാൽ, ഈ ചരിത്രനിർമാണത്തിന്റെ ഭാഗമാകാൻ കഴിഞ്ഞത് കുടുംബത്തിനും അഭിമാന നിമിഷമാണെന്നും അദ്ദേഹം വ്യക്തമാക്കി. പാലത്തിന്റെ നിർമാണകാലത്ത് ഇരുരാജ്യങ്ങളിലെയും തൊഴിലാളികൾ അകലെ നിന്നാണ് പരസ്പരം ജോലി ചെയ്യുന്നത് കണ്ടിരുന്നതെന്നും, പാലം ഒന്നിച്ചുചേർന്ന ദിവസമാണ് ആദ്യമായി എല്ലാവരും അടുത്തെത്തി വിജയത്തിന്റെ സന്തോഷം പങ്കിട്ടതെന്നും ജേസൺ ഹഗെറ്റ് പറഞ്ഞു.
ഗോർഡി ഹോവ് ഇന്റർനാഷണൽ ബ്രിഡ്ജ് രണ്ട് രാജ്യങ്ങളിലെ തൊഴിലാളികളുടെ സഹകരണത്തിന്റെയും കൂട്ടായ പരിശ്രമത്തിന്റെയും ശാശ്വത പ്രതീകമാണെന്നും അദ്ദേഹം അഭിപ്രായപ്പെട്ടു. വിൻഡ്സർ-ഡെട്രോയിറ്റ് ബ്രിഡ്ജ് അതോറിറ്റിയുടെ (WDBA) കണക്കുകൾ പ്രകാരം, കാനഡയുടെയും അമേരിക്കയുടെയും ഭാഗങ്ങളിൽ നിന്നായി ഏകദേശം 15,000 തൊഴിലാളികളാണ് ഗോർഡി ഹോവ് ഇന്റർനാഷണൽ ബ്രിഡ്ജിന്റെ നിർമാണത്തിൽ പങ്കെടുത്തത്.
When the hands that built history meet again: The remarkable story of the Gordie Howe Bridge.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
