ലോകമെമ്പാടും കോടിക്കണക്കിന് ആളുകൾ ഉപയോഗിക്കുന്ന വാട്സ്ആപ്പിൽ വിപ്ലവകരമായ മാറ്റത്തിനൊരുങ്ങി മെറ്റ. ‘വാട്സ്ആപ്പ് പ്ലസ്’ എന്ന പേരിൽ പുതിയ ഓപ്ഷണൽ സബ്സ്ക്രിപ്ഷൻ സേവനം ഉടൻ ലഭ്യമാകുമെന്ന് കമ്പനി സ്ഥിരീകരിച്ചു. ഉപഭോക്താക്കൾക്ക് കൂടുതൽ വ്യക്തിഗതവും മെച്ചപ്പെട്ടതുമായ അനുഭവം നൽകുന്നതിനായിട്ടാണ് ഈ പ്രീമിയം ഫീച്ചർ അവതരിപ്പിക്കുന്നത്. ഇതിന്റെ ഭാഗമായി തിരഞ്ഞെടുത്ത ഉപഭോക്താക്കൾക്കിടയിൽ നിലവിൽ ബീറ്റാ ടെസ്റ്റിംഗ് നടന്നുവരികയാണ്.
നിലവിലുള്ള സൗജന്യ സേവനങ്ങൾക്ക് പുറമെയാകും വാട്സ്ആപ്പ് പ്ലസ് ലഭ്യമാകുക. ഈ സേവനത്തിൽ ഉപഭോക്താക്കൾക്ക് 20 ചാറ്റുകൾ വരെ പിൻ ചെയ്ത് വെക്കാനുള്ള സൗകര്യം ലഭിക്കുമെന്ന് വാട്സ്ആപ്പ് അപ്ഡേറ്റ് ട്രാക്കറായ വാബീറ്റ ഇൻഫോ റിപ്പോർട്ട് ചെയ്യുന്നു. നിലവിൽ സാധാരണ ഉപഭോക്താക്കൾക്ക് പരമാവധി മൂന്ന് ചാറ്റുകൾ മാത്രമേ പിൻ ചെയ്യാൻ സാധിക്കൂ. പ്രധാനപ്പെട്ട സംഭാഷണങ്ങൾ പെട്ടെന്ന് കണ്ടെത്താൻ ഇത് ഉപഭോക്താക്കളെ ഏറെ സഹായിക്കും.
വാട്സ്ആപ്പ് ഇന്റർഫേസ് സ്വന്തം ഇഷ്ടപ്രകാരം മാറ്റാൻ സഹായിക്കുന്ന കസ്റ്റം തീമുകളും വ്യക്തിഗത ആപ്പ് ഐക്കണുകളുമാണ് മറ്റൊരു പ്രത്യേകത. ഇതിലൂടെ വാട്സ്ആപ്പിന് പുത്തൻ രൂപം നൽകാൻ സബ്സ്ക്രൈബർമാർക്ക് സാധിക്കും. കൂടാതെ, തെരഞ്ഞെടുത്ത കോൺടാക്റ്റുകൾക്കും ഗ്രൂപ്പുകൾക്കുമായി പ്രത്യേക നോട്ടിഫിക്കേഷനുകളും റിംഗ്ടോണുകളും ക്രമീകരിക്കാനുള്ള സൗകര്യവും ഇതിലൂടെ ലഭ്യമാകും. ഇതോടെ വാട്സ്ആപ്പ് ഉപയോഗം കൂടുതൽ ലളിതവും കാര്യക്ഷമവുമാകും.
സബ്സ്ക്രിപ്ഷനായി മാസംതോറും എത്ര രൂപ നൽകണം എന്ന കാര്യത്തിൽ മെറ്റ ഇതുവരെ ഔദ്യോഗികമായി വ്യക്തത വരുത്തിയിട്ടില്ല. എങ്കിലും യോഗ്യരായ ടെസ്റ്റർമാർക്ക് തുടക്കത്തിൽ ഒരു മാസത്തേക്ക് ഈ സേവനം സൗജന്യമായി നൽകിയേക്കും. ഉപഭോക്താക്കൾക്ക് വളരെ ഉപകാരപ്രദമായ സവിശേഷതകളാണ് ഇതിൽ ഉൾപ്പെടുത്തിയിരിക്കുന്നതെന്നും വരും മാസങ്ങളിൽ ഇത് എല്ലാവരിലേക്കും എത്തിക്കാനാണ് കമ്പനി ലക്ഷ്യമിടുന്നതെന്നും മെറ്റ വക്താവ് അറിയിച്ചു.
‘WhatsApp Plus’ is coming; Chatting will change drastically, these are the premium features!
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
