വെസ്റ്റ്‌ ജെറ്റ് പണിമുടക്ക് ഭീഷണിയിൽ: റീബുക്കിങ് വാഗ്ദാനങ്ങൾക്കിടയിലും ആശങ്കയിൽ യാത്രക്കാർ

കാനഡയിലെ രണ്ടാമത്തെ വലിയ വിമാനക്കമ്പനിയായ വെസ്റ്റ്‌ജെറ്റിലെ (WestJet) ക്യാബിൻ ക്രൂ അംഗങ്ങൾ പണിമുടക്കിലേക്ക് നീങ്ങുന്നത് പതിനായിരക്കണക്കിന് യാത്രക്കാരുടെ യാത്രാ പദ്ധതികളെ അനിശ്ചിതത്വത്തിലാക്കിയിരിക്കുന്നു. യൂണിയൻ പ്രതിനിധികൾ 72 മണിക്കൂറത്തെ പണിമുടക്ക് നോട്ടീസ് നൽകിയതോടെ പ്രതിദിനം നൂറുകണക്കിന് സർവീസുകൾ തടസ്സപ്പെടാൻ സാധ്യതയുണ്ട്. വിമാനങ്ങൾ മുൻകൂട്ടി പുനഃക്രമീകരിക്കുമെന്ന് (Rebook) കമ്പനി അവകാശപ്പെടുന്നുണ്ടെങ്കിലും, യാത്രക്കാർക്ക് നൽകുന്ന സേവനങ്ങളിൽ വൻ അപാകതകൾ നിലനിൽക്കുന്നതായി പരാതികൾ ഉയർന്നുകഴിഞ്ഞു.

തേർഡ് പാർട്ടി ബുക്കിംഗ് വെബ്‌സൈറ്റുകൾ വഴി ടിക്കറ്റെടുത്ത യാത്രക്കാരാണ് നിലവിൽ ഏറ്റവും കൂടുതൽ പ്രതിസന്ധി നേരിടുന്നത്. വിമാന സർവീസുകൾ മുടങ്ങാൻ സാധ്യതയുള്ളതിനാൽ ബദൽ മാർഗ്ഗങ്ങൾ തേടുന്ന യാത്രക്കാരോട് നേരിട്ട് സഹകരിക്കാൻ വേസ്റ്റ്‌ജെറ്റ് വിസമ്മതിക്കുന്നതായി യാത്രക്കാർ വ്യക്തമാക്കുന്നു. തേർഡ് പാർട്ടി ഏജൻസികൾ വഴി ബുക്ക് ചെയ്തവർ പണം തിരികെ ലഭിക്കുന്നതിനായി അതത് ഏജൻസികളെത്തന്നെ സമീപിക്കണമെന്നാണ് വേസ്റ്റ്‌ജെറ്റിന്റെ ഔദ്യോഗിക നിലപാട്. ഇത് സർവീസ് റദ്ദാക്കപ്പെട്ടാൽ തങ്ങൾക്ക് കൃത്യമായ പുനഃക്രമീകരണം ലഭിക്കുമോ എന്ന കാര്യത്തിൽ യാത്രക്കാരിൽ വലിയ സംശയത്തിന് വഴിവെച്ചിട്ടുണ്ട്.

വിമാനത്താവളത്തിലെ ഗ്രൗണ്ട് ഡ്യൂട്ടി ഉൾപ്പെടെയുള്ള ജോലി സമയങ്ങൾക്ക് വേതനം നൽകുന്നില്ലെന്നതാണ് 4,400-ഓളം വരുന്ന വിമാന ജീവനക്കാരുടെ പ്രധാന പരാതി. സി.യു.പി.ഇ (CUPE) യൂണിയന്റെ നേതൃത്വത്തിലാണ് ജീവനക്കാരുടെ ഈ സമരം. എന്നാൽ ‘ക്രെഡിറ്റ് അവർ’ (Credit Hour) രീതിയിലാണ് തങ്ങൾ ജീവനക്കാർക്ക് വേതനം നൽകുന്നതെന്നും, ഇത് ജീവനക്കാർക്ക് മികച്ച വരുമാനം ഉറപ്പാക്കുന്നുണ്ടെന്നും വിമാനക്കമ്പനി അവകാശപ്പെടുന്നു. എന്നാൽ ഈ സംവിധാനം കൃത്യമായ വേതനം നൽകുന്നില്ലെന്നും, ജീവനക്കാരുടെ അധ്വാനത്തിന് അർഹമായ പരിഗണന ലഭിക്കുന്ന ഒരു കരാർ രൂപീകരിക്കുന്നത് വരെ ചർച്ചകൾ തുടരുമെന്നും യൂണിയൻ പ്രതിനിധി ആലിയ ഹുസൈൻ വ്യക്തമാക്കി.

നിലവിലെ പ്രതിസന്ധിയിൽ യാത്രക്കാർക്കുണ്ടായ ബുദ്ധിമുട്ടുകളിൽ കമ്പനി സി.ഇ.ഒ ഖേദം പ്രകടിപ്പിച്ചു. എന്നാൽ സമരം കാരണം യാത്രാ തടസ്സങ്ങൾ നേരിടുന്നുണ്ടെങ്കിലും ജീവനക്കാരുടെ ആവശ്യങ്ങൾ ന്യായമാണെന്നാണ് ഒരുവിഭാഗം യാത്രക്കാരുടെ നിലപാട്. ജോലി ചെയ്യുന്ന മുഴുവൻ സമയത്തിനും അർഹമായ വേതനം ലഭിക്കേണ്ടത് അത്യാവശ്യമാണെന്നും, കമ്പനിയും യൂണിയനും തമ്മിൽ ഉടൻ തന്നെ ഒരു ഒത്തുതീർപ്പിലെത്തുമെന്നാണ് പ്രതീക്ഷിക്കുന്നതെന്നും യാത്രക്കാർ അഭിപ്രായപ്പെടുന്നു.

WestJet Strike Threat: Travelers Worry Despite Rebooking

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt