ഒട്ടാവ: കാനഡയിലെ പ്രമുഖ വിമാനക്കമ്പനിയായ വെസ്റ്റ്ജെറ്റിലെ (WestJet) ജീവനക്കാർ നടത്തിവന്ന സമരം അവസാനിക്കുന്നു. കമ്പനിയും ജീവനക്കാരുടെ സംഘടനയായ സിയുപിഇയും (CUPE) തമ്മിൽ താത്കാലിക കരാറിലെത്തിയതോടെയാണിത്. തിങ്കളാഴ്ച പുലർച്ചെയാണ് ഇരുകൂട്ടരും ഇക്കാര്യം അറിയിച്ചത്. ഞായറാഴ്ച സമരം തുടങ്ങിയതോടെ നൂറുകണക്കിന് വിമാന സർവീസുകൾ മുടങ്ങുകയും തിരക്കുള്ള യാത്രാ സമയത്ത് ആയിരക്കണക്കിന് യാത്രക്കാർ വലയുകയും ചെയ്തിരുന്നു. നിലവിൽ കരാറിലായെങ്കിലും വിമാന സർവീസുകൾ എന്ന് സാധാരണ നിലയിലാകുമെന്ന് കമ്പനി വ്യക്തമാക്കിയിട്ടില്ല.
കമ്പനിയിലെ 4,400-ഓളം വരുന്ന ഫ്ലൈറ്റ് അറ്റൻഡന്റുമാരാണ് ശമ്പള വർധനവിനായി സമരത്തിനിറങ്ങിയത്. വിമാനം പറക്കുന്ന സമയത്തിന് മാത്രം പ്രതിഫലം നൽകുന്ന രീതിക്ക് പകരം, ഡ്യൂട്ടിക്ക് എത്തുമ്പോൾ മുതൽ ജോലി കഴിയുന്നത് വരെയുള്ള മുഴുവൻ സമയത്തിനും ശമ്പളം വേണമെന്നതായിരുന്നു ഇവരുടെ പ്രധാന ആവശ്യം. ഡ്യൂട്ടി സമയത്ത് ചെയ്യുന്ന അധിക ജോലികൾക്ക് കൂടുതൽ തുക നൽകാനും, ശമ്പള വ്യവസ്ഥകളിൽ അനുകൂലമായ മാറ്റങ്ങൾ വരുത്താനും പുതിയ കരാറിൽ ധാരണയായിട്ടുണ്ട്.
തൊഴിലാളികളുടെ ഐക്യമാണ് ഈ നേട്ടത്തിന് കാരണമെന്ന് യൂണിയൻ പ്രസിഡന്റ് അലിയ ഹുസൈൻ പറഞ്ഞു. ജീവനക്കാരുടെ അധ്വാനത്തിന് അർഹമായ അംഗീകാരം നൽകുന്ന കരാറാണിതെന്നും അവർ കൂട്ടിച്ചേർത്തു. അതേസമയം, കരാറിന്റെ പൂർണ വിവരങ്ങൾ ഉടൻ പുറത്തുവിടുമെന്നും, ഇനി ജീവനക്കാരുടെ വോട്ടെടുപ്പിന് ശേഷമേ കരാർ ഔദ്യോഗികമായി നടപ്പിലാക്കൂ എന്നും വെസ്റ്റ്ജെറ്റ് മാനേജ്മെന്റ് അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
WestJet strike heading towards resolution: Company reaches tentative agreement with employees.
