പണം കൊടുത്ത് വാങ്ങാൻ റെഡി, പക്ഷെ കോവിഡ് വാക്സീനില്ല; ആൽബർട്ടയിൽ പ്രതിസന്ധി

ആൽബർട്ട: ആൽബർട്ടയിൽ (Alberta) കോവിഡ്-19 പ്രതിരോധ കുത്തിവയ്പ്പ് (ഇമ്മ്യൂണൈസേഷൻ) പരിപാടി വൻ തിരിച്ചടി നേരിടുന്നു. പുതിയ നിയമപ്രകാരം ഭൂരിഭാഗം ആളുകളും വാക്സിനായി കുറഞ്ഞത് 100 ഡോളർ (ഏകദേശം 8,200 രൂപ) നൽകേണ്ടി വരുമ്പോൾ, സ്വകാര്യ ഫാർമസികളിൽ വാക്സിൻ സ്റ്റോക്ക് കുറയുന്നത് കാരണം ആൽബർട്ടക്കാർ വെയിറ്റിങ് ലിസ്റ്റിലാണ്.

ഫാർമസികളിൽ ‘നോ സ്റ്റോക്ക്’ ബോർഡ്

എഡ്മന്റണിലെ (Edmonton) ലൂയിസ് എസ്റ്റേറ്റ്‌സ് ഫാർമസിയിൽ ഈ ആഴ്ച ഫൈസർ (Pfizer) ഡോസുകൾ അവശേഷിച്ചിരുന്നത് രണ്ടെണ്ണം മാത്രമാണ്.ദിവസവും നാലോ അഞ്ചോ പേർ വാക്സിൻ അന്വേഷിച്ച് വരുന്നുണ്ടെങ്കിലും മിക്കവരെയും മടക്കി അയയ്‌ക്കേണ്ടി വരുന്നു എന്ന് ഫാർമസി മാനേജർ മൗളി പട്ടേൽ പറയുന്നു. “ഞങ്ങൾക്ക് അവരെ മടക്കി അയയ്‌ക്കേണ്ടിവരും,” അവർ കൂട്ടിച്ചേർത്തു. കാൽഗറിയിലെ (Calgary) സ്ഥിതിയും സമാനമാണ്. ക്രൗഫൂട്ട് മെഡിസിൻ ഷോപ്പിലെ ഫാർമസിസ്റ്റ് റാൻഡി ഹൗഡൻ പറയുന്നത്, കൂടുതൽ ഡോസുകൾ എപ്പോൾ എത്തുമെന്ന് യാതൊരു സൂചനയും ലഭിക്കുന്നില്ലെന്നാണ്. “വിതരണ ശൃംഖലയിൽ ഞങ്ങൾക്ക് നിലവിൽ സുതാര്യതയില്ല. എത്ര വാക്സിനുകൾ എപ്പോൾ വരുമെന്ന് എനിക്ക് യാതൊരു ധാരണയുമില്ല,” അദ്ദേഹം വ്യക്തമാക്കി.

പണം നൽകി വാങ്ങണം, വിതരണം സ്വകാര്യ കമ്പനികൾക്ക്‌

ആരോഗ്യ പ്രവർത്തകർ പോലുള്ള ഉയർന്ന അപകടസാധ്യതയുള്ള വിഭാഗത്തിൽപ്പെട്ടവർക്ക് മാത്രമാണ് ആൽബർട്ടയിൽ കോവിഡ്-19 വാക്സിൻ സൗജന്യമായി ലഭിക്കുക. മറ്റുള്ളവർ ഫാർമസികളിൽ നിന്നോ സർക്കാർ നടത്തുന്ന പൊതുജനാരോഗ്യ ക്ലിനിക്കുകളിൽ നിന്നോ പണം നൽകി വാക്സിൻ എടുക്കണം. ഫാർമസികളിലേക്ക് ഫൈസർ കാനഡ വഴിയാണ് വാക്സിൻ എത്തുന്നത്. ഫൈസർ കാനഡ നൽകിയ പ്രസ്താവനയിൽ, വർധിച്ച ആവശ്യം കാരണം താൽക്കാലികമായി വിതരണത്തിൽ നിയന്ത്രണങ്ങൾ ഏർപ്പെടുത്തിയിട്ടുണ്ടെന്നും, എന്നാൽ ഉടൻ തന്നെ കൂടുതൽ സ്റ്റോക്ക് ലഭ്യമാക്കുമെന്നും അറിയിച്ചു.

സർക്കാരിന്റെ വിശദീകരണം

പ്രൈമറി ആന്റ് പ്രിവന്റീവ് ഹെൽത്ത് സർവീസസ് മന്ത്രാലയം നൽകിയ പ്രസ്താവനയിൽ, ഒക്ടോബർ 31 വരെ 1,71,000-ത്തിലധികം കോവിഡ്-19 വാക്സിൻ ഡോസുകൾ പ്രവിശ്യാ വിതരണം ചെയ്തിട്ടുണ്ട് എന്നും മോഡേണ (Moderna) വാക്സിൻ ക്ഷാമമില്ലെന്നും അറിയിച്ചു. “സ്വകാര്യ വാക്സിൻ സംഭരണത്തിലോ വിതരണത്തിലോ ആൽബെർട്ട സർക്കാരിന് പങ്കില്ല; വിതരണ വെല്ലുവിളികൾ പരിഹരിക്കാൻ ഫാർമസികൾ അവരുടെ വിതരണക്കാരുമായി നേരിട്ട് പ്രവർത്തിക്കണം,” എന്നും സർക്കാർ കൂട്ടിച്ചേർത്തു.

കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt

Waitlists grow for COVID-19 vaccine at Alberta pharmacies