വാഷിംഗ്ടൺ: അന്താരാഷ്ട്ര കപ്പൽ പാതകളിൽ ഇറാൻ നടത്തുന്ന ഇടപെടലുകൾ അംഗീകരിക്കാനാവില്ലെന്ന് യുഎസ് പ്രതിരോധ സെക്രട്ടറി പീറ്റ് ഹെഗ്സെത്ത്. ഹോർമുസ് കടലിടുക്കിലൂടെയുള്ള വ്യാപാരക്കപ്പലുകളെ ഭീഷണിപ്പെടുത്തുന്നത് പാതയുടെ നിയന്ത്രണമല്ലെന്നും മറിച്ച് വെറും കടൽക്കൊള്ളയാണെന്നും അദ്ദേഹം വ്യക്തമാക്കി.
ഇറാനും അമേരിക്കയും തമ്മിലുള്ള രണ്ടാഴ്ചത്തെ വെടിനിർത്തൽ കാലാവധി ഏപ്രിൽ 22-ന് അവസാനിക്കാനിരിക്കെയാണ് പ്രതിരോധ സെക്രട്ടറിയുടെ ഭാഗത്തുനിന്നും കടുത്ത ഭാഷയിലുള്ള പ്രതികരണം ഉണ്ടായിരിക്കുന്നത്. മേഖലയിലെ സംഘർഷം കുറയ്ക്കുന്നതിനായി പാകിസ്ഥാനിൽ വെച്ച് നടന്ന ചർച്ചകൾ പരാജയപ്പെട്ട പശ്ചാത്തലത്തിൽ, ഇറാൻ ശരിയായ തീരുമാനമെടുത്തില്ലെങ്കിൽ മറ്റൊരു യുദ്ധത്തിലേക്ക് നീങ്ങാൻ അമേരിക്ക മടിക്കില്ലെന്ന് അദ്ദേഹം മുന്നറിയിപ്പ് നൽകി.
ലോകത്തിലെ ആകെ എണ്ണ വിതരണത്തിന്റെ 20 ശതമാനത്തോളം കടന്നുപോകുന്ന ഹോർമുസ് കടലിടുക്കിൽ ഇറാൻ നടത്തുന്ന ഭീഷണി ആഗോള സമ്പദ്വ്യവസ്ഥയെ ബാധിക്കുമെന്ന ആശങ്ക ശക്തമാണ്. ഇറാന്റെ ഓരോ നീക്കങ്ങളും യുഎസ് രഹസ്യാന്വേഷണ ഏജൻസികൾ നിരീക്ഷിച്ചുവരികയാണെന്നും, നേരത്തെ തകർക്കപ്പെട്ട ആയുധ ലോഞ്ചറുകൾ പുനഃസ്ഥാപിക്കാനുള്ള നീക്കങ്ങൾ നടക്കുന്നുണ്ടെന്നും ഹെഗ്സെത്ത് ചൂണ്ടിക്കാട്ടി. അമേരിക്കൻ സൈന്യം പൂർണ്ണ സജ്ജമാണെന്നും അദ്ദേഹം കൂട്ടിച്ചേർത്തു.
അതേസമയം, കഴിഞ്ഞ വർഷത്തെ സൈനിക ആക്രമണങ്ങൾക്ക് ശേഷം ഇറാൻ തങ്ങളുടെ ഡ്രോൺ ഉൽപ്പാദനം പത്തിരട്ടിയായി വർദ്ധിപ്പിച്ചതായി റിപ്പോർട്ടുകളുണ്ട്. ഭാവിയിൽ ഉണ്ടാകാൻ സാധ്യതയുള്ള തിരിച്ചടികൾ നേരിടാനാണ് ഇറാൻ സൈനിക ശേഷി വർദ്ധിപ്പിക്കുന്നത്. വെടിനിർത്തൽ കാലാവധി തീരാൻ ദിവസങ്ങൾ മാത്രം ബാക്കിനിൽക്കെ, ഇരു രാജ്യങ്ങളും തമ്മിലുള്ള നയതന്ത്ര ബന്ധം കൂടുതൽ വഷളാകുന്നത് ആഗോള വിപണിയിൽ എണ്ണവില വർദ്ധനവിന് കാരണമായേക്കാം.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
'This is not control, it's piracy'; US Defense Secretary Pete Hegseth issues stern warning to Iran
