കാനഡയിൽ നിന്ന് അമേരിക്കയിലേക്ക് യാത്ര ചെയ്യുന്നവരുടെ എണ്ണം ഗണ്യമായി കുറഞ്ഞപ്പോൾ, അമേരിക്കയിൽ നിന്ന് കാനഡയിലേക്ക് വരുന്നവരുടെ എണ്ണത്തിൽ വർധനവ് രേഖപ്പെടുത്തി. വർഷങ്ങൾക്ക് ശേഷം ആദ്യമായാണ് ഇങ്ങനെയൊരു മാറ്റം. സ്റ്റാറ്റിസ്റ്റിക്സ് കാനഡയുടെ ഏറ്റവും പുതിയ കണക്കുകൾ പ്രകാരം, കഴിഞ്ഞ ജൂലൈയിൽ 1.8 ദശലക്ഷം അമേരിക്കൻ പൗരന്മാർ കാർ മാർഗം കാനഡയിലെത്തിയപ്പോൾ, അമേരിക്കയിൽ നിന്ന് തിരികെ കാനഡയിലേക്ക് എത്തിയത് 1.7 ദശലക്ഷം കനേഡിയൻ പൗരന്മാർ മാത്രമാണ്.
കോവിഡ്-19 മഹാമാരിക്ക് മുമ്പ് എല്ലാ ജൂലൈ മാസങ്ങളിലും കാനഡയിൽ നിന്ന് അമേരിക്കയിലേക്ക് പോകുന്നവരുടെ എണ്ണമാണ് കൂടുതലുണ്ടായിരുന്നത്. എന്നാൽ ഈ വർഷം സ്ഥിതിഗതികൾ മാറി. കഴിഞ്ഞ വർഷത്തെ അപേക്ഷിച്ച് ഇരു രാജ്യങ്ങളിലേക്കുമുള്ള യാത്രകളിൽ കുറവുണ്ടായിട്ടുണ്ട്. അമേരിക്കയിൽ നിന്ന് കാനഡയിലേക്കുള്ള യാത്ര 7.4% കുറഞ്ഞപ്പോൾ, കാനഡയിൽ നിന്ന് അമേരിക്കയിലേക്കുള്ള യാത്ര 36.9% കുറഞ്ഞു.
ഈ മാറ്റം താത്കാലികമാണോ അതോ ഭാവിയിൽ തുടരുമോ എന്ന് വ്യക്തമല്ലെന്ന് സ്റ്റാറ്റ്കാൻ റിപ്പോർട്ട് പറയുന്നു. അതേസമയം, അമേരിക്കൻ പ്രസിഡന്റ് ഡൊണാൾഡ് ട്രംപിന്റെ പുതിയ അതിർത്തി നിയന്ത്രണ നയങ്ങളാണ് യാത്ര കുറയാൻ കാരണമെന്ന് ചിലർ വിലയിരുത്തുന്നു. അമേരിക്കയിലേക്ക് വിനോദയാത്രകൾ നിർത്തിവെച്ചതായി ഗേൾ ഗൈഡ്സ് ഓഫ് കാനഡ അടുത്തിടെ അറിയിച്ചിരുന്നു. എല്ലാ അംഗങ്ങൾക്കും തുല്യമായി പ്രവേശനം ലഭിക്കുമോ എന്ന ആശങ്ക കാരണമാണ് ഈ തീരുമാനമെന്ന് അവർ വ്യക്തമാക്കി.
വ്യോമയാത്രയിൽ കാനഡയിലേക്ക് വരുന്ന അന്താരാഷ്ട്ര സഞ്ചാരികളുടെ എണ്ണം വർധിച്ചിട്ടുണ്ട്. കഴിഞ്ഞ ജൂലൈയിൽ 1.4 ദശലക്ഷം വിദേശികൾ കാനഡയിൽ എത്തി, ഇത് കഴിഞ്ഞ വർഷത്തെ അപേക്ഷിച്ച് മൂന്ന് ശതമാനം കൂടുതലാണ്. എന്നാൽ മൊത്തത്തിൽ, കഴിഞ്ഞ വർഷത്തെ അപേക്ഷിച്ച് അന്താരാഷ്ട്ര യാത്രക്കാരുടെ വരവിൽ 15.6% കുറവുണ്ടായിട്ടുണ്ട്.
U.S. visitors to Canada outnumber Canadians in U.S. in rare reversal
