കോവിഡിന് ശേഷമുള്ള കാലഘട്ടത്തിൽ മികച്ച വളർച്ച നേടിയ ലാസ് വെഗാസ് ടൂറിസം മേഖല ഇപ്പോൾ കടുത്ത പ്രതിസന്ധിയിലാണ്. ഈ വർഷം സന്ദർശകരുടെ എണ്ണത്തിൽ 11 ശതമാനത്തിലധികം ഇടിവുണ്ടായതായി ലാസ് വെഗാസ് കൺവെൻഷൻ ആൻഡ് വിസിറ്റേഴ്സ് അതോറിറ്റിയുടെ കണക്കുകൾ വ്യക്തമാക്കുന്നു. ഇതിൽ ഏറ്റവും വലിയ ഇടിവ് രേഖപ്പെടുത്തിയിരിക്കുന്നത് കാനഡയിൽ നിന്നുള്ള സഞ്ചാരികളുടെ എണ്ണത്തിലാണ്. അമേരിക്കയുടെ വ്യാപാര നയങ്ങളോടുള്ള പ്രതിഷേധം കാരണമാണ് കനേഡിയൻ പൗരന്മാർ ലാസ് വെഗാസ് യാത്ര ബഹിഷ്കരിക്കുന്നത്. വിമാനക്കമ്പനികളുടെ കണക്കുകൾ പ്രകാരം കാനഡയിൽ നിന്നുള്ള യാത്രക്കാരുടെ എണ്ണത്തിൽ വലിയ കുറവുണ്ടായിട്ടുണ്ട്.
കഴിഞ്ഞ വർഷം ജൂൺ മാസത്തെ അപേക്ഷിച്ച് ഈ വർഷം എയർ കാനഡ യാത്രക്കാരുടെ എണ്ണത്തിൽ 33 ശതമാനവും, വെസ്റ്റ് ജെറ്റ് യാത്രക്കാരുടെ എണ്ണത്തിൽ 31 ശതമാനവും കുറവുണ്ടായി. കുറഞ്ഞ ചെലവിൽ യാത്ര വാഗ്ദാനം ചെയ്യുന്ന ഫ്ലെയർ എന്ന വിമാനക്കമ്പനിയുടെ യാത്രക്കാരുടെ എണ്ണം 62 ശതമാനം വരെ ഇടിഞ്ഞു. ഉയർന്ന നിരക്കുകളും മറ്റ് ചില കാരണങ്ങളും കൊണ്ട് യു.എസ്.സന്ദർശകരുടെ എണ്ണത്തിലും കുറവുണ്ടായിട്ടുണ്ടെങ്കിലും, കനേഡിയൻ ബഹിഷ്കരണം ബിസിനസ് സ്ഥാപനങ്ങളുടെ വരുമാനത്തിൽ വലിയ ആഘാതമേൽപ്പിച്ചിട്ടുണ്ട്.
എംജിഎം റിസോർട്ട്സ് സിഇഒ ബിൽ ഹോൺബക്കിൾ നിക്ഷേപകരുമായുള്ള ഒരു കോൺഫറൻസ് കോളിൽ കാനഡയിൽ നിന്നുള്ള സന്ദർശകരുടെ എണ്ണത്തിൽ ഈ വർഷം തുടക്കം മുതൽ തന്നെ കുറവുണ്ടായിട്ടുണ്ടെന്ന് വ്യക്തമാക്കി. യു.എസ്. പ്രസിഡന്റ് ഡൊണാൾഡ് ട്രംപ് വ്യാപാര യുദ്ധം ആരംഭിച്ച സമയത്താണ് ഇത് തുടങ്ങിയതെന്നും, ഇപ്പോഴും ഈ സാഹചര്യം തുടരുകയാണെന്നും അദ്ദേഹം പറഞ്ഞു. നഗരത്തിലെ പ്രമുഖ സ്ഥാപനങ്ങളായ ഏരിയ, ബെല്ലാജിയോ, കോസ്മോപൊളിറ്റൻ തുടങ്ങിയവയുടെ ഉടമസ്ഥരായ എംജിഎം റിസോർട്ട്സിനെ ഇത് കാര്യമായി ബാധിച്ചിട്ടുണ്ട്.
കനേഡിയൻ യാത്രക്കാരുടെ കുറവ് കമ്പനിയുടെ വരുമാനത്തെ പ്രതികൂലമായി ബാധിച്ചതായി സീസേഴ്സ് എൻ്റർടെയിൻമെൻ്റ് സിഇഒ തോമസ് റീഗും പറഞ്ഞു. രണ്ടാം പാദത്തിലെ മോശം പ്രകടനത്തിനുള്ള ഒരു കാരണം കനേഡിയൻ യാത്രക്കാരുടെ അഭാവമാണെന്ന് അദ്ദേഹം സ്റ്റോക്ക് അനലിസ്റ്റുകളോട് സംസാരിക്കവെ സൂചിപ്പിച്ചു. പ്രാദേശിക യൂണിയൻ നേതാക്കൾ ഈ പ്രതിസന്ധിയെ “ട്രംപ് സ്ലംപ്” എന്നാണ് വിശേഷിപ്പിച്ചത്. വ്യാപാര തർക്കം നടക്കുന്നതിനാൽ യു.എസ്. സന്ദർശിക്കാൻ താൽപര്യമില്ലാത്ത കനേഡിയൻ പൗരന്മാരിൽ ഒരാളാണ് വിന്നിപെഗ് സ്വദേശി മാർട്ടിൻ ഡാലി. ഭാര്യയോടൊപ്പം എല്ലാ വർഷവും ലാസ് വെഗാസ് സന്ദർശിക്കാറുണ്ടായിരുന്ന തനിക്ക് ട്രംപിന്റെ കാനഡയോടുള്ള അവഹേളനം കാരണം ഇത്തവണ അതിന് സാധിക്കില്ലെന്ന് അദ്ദേഹം പറഞ്ഞു.
തൻ്റെ കഠിനാധ്വാനം ചെയ്ത് നേടിയ പണം യു.എസ്.സിൽ ചെലവഴിക്കാൻ താൽപര്യമില്ലെന്നും, പകരം മറ്റൊരു രാജ്യത്ത് മനസാക്ഷിക്കുത്തില്ലാതെ അത് ചെലവഴിക്കാമെന്നും അദ്ദേഹം കൂട്ടിച്ചേർത്തു. ഇതേ അഭിപ്രായമാണ് റീജീന സ്വദേശി ഗൈ കെർബ്രാട്ടിനും ഭാര്യ കാരനും പങ്കുവെച്ചത്. എ.സി/ഡി.സി. കച്ചേരി കാണാൻ ലാസ് വെഗാസിലേക്ക് പോകാനുള്ള പദ്ധതി അവർ റദ്ദാക്കിയിരുന്നു. ട്രംപിന്റെ കാനഡ വിരുദ്ധ നയങ്ങളെ പിന്തുണയ്ക്കാൻ വയ്യ എന്നതായിരുന്നു അവരുടെ നിലപാട്.
ഈ പ്രതിസന്ധി നെവാഡയുടെ സാമ്പത്തിക രംഗത്തെ ബാധിച്ചിട്ടുണ്ട്. നെവാഡയുടെ തൊഴിലില്ലായ്മ നിരക്ക് 5.4 ശതമാനമാണ്. ഇത് യു.എസ്. സംസ്ഥാനങ്ങളിൽ ഏറ്റവും ഉയർന്ന നിരക്കാണ്.
കാനഡയിൽ നിന്നുള്ള സഞ്ചാരികളുടെ കുറവ് 43,000-ത്തോളം ജോലികളെ ബാധിച്ചതായി യൂണിവേഴ്സിറ്റി ഓഫ് നെവാഡ, ലാസ് വെഗാസിലെ സാമ്പത്തിക ശാസ്ത്ര പ്രൊഫസർ സ്റ്റീഫൻ മില്ലർ പറഞ്ഞു. കനേഡിയൻ വിനോദസഞ്ചാരികൾ കഴിഞ്ഞ വർഷം മാത്രം 360 കോടി ഡോളറാണ് പ്രാദേശിക സമ്പദ്വ്യവസ്ഥയിലേക്ക് സംഭാവന ചെയ്തത്. ഈ തുക നെല്ലിസ് എയർഫോഴ്സ് ബേസിൻ്റെ സാമ്പത്തിക ഉത്പാദനത്തിന് തുല്യമാണെന്നും അദ്ദേഹം ചൂണ്ടിക്കാട്ടി. ഈയൊരു പ്രതിസന്ധി പരിഹരിക്കാൻ ആകർഷകമായ ഓഫറുകളുമായി റിസോർട്ടുകൾ മുന്നോട്ട് വരുമെന്ന് മില്ലർ പ്രതീക്ഷ പ്രകടിപ്പിച്ചു. എന്നാൽ താൻ അതിന് വഴങ്ങില്ലെന്നും, തൻ്റെ നിലപാടിൽ ഉറച്ചു നിൽക്കുമെന്നും ഡാലി വ്യക്തമാക്കി.
