ഒട്ടാവ: 2020-ൽ കാനഡ സർക്കാരിന്റെ ഓൺലൈൻ പോർട്ടലുകൾക്ക് നേരെ ഉണ്ടായ സൈബർ ആക്രമണങ്ങളിൽ വ്യക്തിഗത-സാമ്പത്തിക വിവരങ്ങൾ ചോർന്ന കനേഡിയൻ പൗരന്മാർക്ക് നഷ്ടപരിഹാരത്തിനായി അപേക്ഷ നൽകാനുള്ള നടപടികൾ ആരംഭിച്ചു. കോടതി അംഗീകരിച്ച 8.76 മില്യൺ ഡോളറിന്റെ സെറ്റിൽമെന്റ് ഫണ്ടിൽ നിന്നാണ് ബാധിതർക്ക് തുക അനുവദിക്കുന്നത്. ഓഗസ്റ്റ് 4-ന് പ്രാബല്യത്തിൽ വന്ന പ്രത്യേക ക്ലെയിം പോർട്ടൽ വഴി അർഹരായവർക്ക് വിവരങ്ങൾ സമർപ്പിച്ച് 5,000 ഡോളർ വരെ നഷ്ടപരിഹാരം കൈപ്പറ്റാം.
2020 മാർച്ച് 1-നും ഡിസംബർ 31-നും ഇടയിൽ സി.ആർ.എ മൈ അക്കൗണ്ട് (CRA My Account), മൈ സർവീസ് കാനഡ അക്കൗണ്ട് (My Service Canada Account), ജി.സി കേ (GCKey) അക്കൗണ്ടുകൾ എന്നിവയിൽ വിവര ചോർച്ച നേരിട്ടവർക്കാണ് ഈ ആനുകൂല്യത്തിന് അർഹതയുള്ളത്. ‘കെ.പി.എം.ജി’ (KPMG) എന്ന ഏജൻസിക്കാണ് അപേക്ഷകൾ പരിശോധിച്ച് തുക നിശ്ചയിക്കാനുള്ള ചുമതല. വിവരങ്ങൾ ദുരുപയോഗം ചെയ്യപ്പെടാത്തവർക്ക് പാസ്വേഡ് മാറ്റാനും മറ്റും ചെലവഴിച്ച സമയത്തിന് പരമാവധി 80 ഡോളറും, തട്ടിപ്പിനിരയായവർക്ക് 200 ഡോളറും, ഐഡന്റിറ്റി മോഷണം മൂലം സാമ്പത്തിക നഷ്ടമുണ്ടായവർക്ക് രേഖകളുടെ അടിസ്ഥാനത്തിൽ 5,000 ഡോളർ വരെയുമാണ് നഷ്ടപരിഹാരം ലഭിക്കുക.
കാനഡ ഫെഡറൽ കോടതി മേയ് 5-ന് നൽകിയ ഉത്തരവിനെ തുടർന്നാണ് പദ്ധതിയുടെ അന്തിമ നടപടികൾ പൂർത്തിയായത്. ബാധിതർക്ക് ഔദ്യോഗിക KPMG പോർട്ടൽ വഴി നേരിട്ട് അപേക്ഷകൾ നൽകാവുന്നതാണ്. അപേക്ഷ സമർപ്പിക്കാനുള്ള അവസാന തീയതി 2027 ഫെബ്രുവരി 3 ആണ്. അതേസമയം, സെറ്റിൽമെന്റിന്റെ പേരിൽ നടക്കുന്ന വ്യാജ സന്ദേശങ്ങളിലോ പണമാവശ്യപ്പെടുന്ന തട്ടിപ്പുകളിലോ വീഴരുതെന്നും, വിവരങ്ങൾ കൈമാറുമ്പോൾ ഔദ്യോഗിക പോർട്ടൽ തന്നെ ഉപയോഗിക്കുന്നുണ്ടെന്ന് ഉറപ്പുവരുത്തണമെന്നും അധികൃതർ മുന്നറിയിപ്പ് നൽകി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
CRA Data Breach: Up to $5,000 Compensation for Affected Individuals; How to Apply?
