അമേരിക്കൻ പ്രസിഡന്റ് ഡൊണാൾഡ് ട്രംപ് പ്രഖ്യാപിച്ച പുതിയ താരിഫുകളുടെ പശ്ചാത്തലത്തിൽ, വ്യാപാര തർക്കങ്ങൾ പരിഹരിക്കുന്നതിനായി കാനഡ പ്രധാനമന്ത്രി മാർക്ക് കാർണിയുമായി രാജ്യത്തെ പ്രവിശ്യാ പ്രീമിയർമാർ ചാർലറ്റ്ടൗണിൽ നിർണായക കൂടിക്കാഴ്ച നടത്തി. ചില ഉൽപ്പന്നങ്ങൾക്ക് മേൽ 50 ശതമാനം വരെ താരിഫ് ചുമത്താനുള്ള അമേരിക്കയുടെ നീക്കം സാമ്പത്തിക മേഖലയിൽ കടുത്ത ആശങ്ക സൃഷ്ടിച്ചിട്ടുണ്ട്. ഈ സാഹചര്യത്തിൽ വരും ദിവസങ്ങളിലേക്കുള്ള കൃത്യവും ശക്തവുമായ ചർച്ചാ പ്ലാൻ പ്രധാനമന്ത്രി മുന്നോട്ട് വെക്കണമെന്നാണ് പ്രവിശ്യാ നേതാക്കളുടെ പ്രധാന ആവശ്യം. കാനഡ-യുണൈറ്റഡ് സ്റ്റേറ്റ്സ്-മെക്സിക്കോ വ്യാപാര കരാർ (CUSMA) പുനഃപരിശോധിക്കാനും പുതുക്കാനുമുള്ള ശ്രമങ്ങൾ ഊർജ്ജിതമാക്കണമെന്ന് അവർ ആവശ്യപ്പെട്ടു.
ട്രംപിന്റെ താരിഫ് നയങ്ങൾക്കെതിരെ കാനഡ എത്തരത്തിൽ പ്രതികരിക്കണം എന്നതിൽ അഭിപ്രായ വ്യത്യാസങ്ങളുണ്ടെങ്കിലും, എല്ലാ മേഖലകളെയും ഉൾക്കൊള്ളുന്ന സമഗ്രമായ ഒരു കരാറാണ് ആവശ്യമെന്ന കാര്യത്തിൽ നേതാക്കൾക്കിടയിൽ ഐക്യദാർഢ്യമുണ്ട്. മരം, സ്റ്റീൽ, അലുമിനിയം, നിർമ്മാണ മേഖല, ഓട്ടോമൊബൈൽ ഇൻഡസ്ട്രി തുടങ്ങി താരിഫ് ബാധിക്കുന്ന മുഴുവൻ മേഖലകളെയും സംരക്ഷിക്കുന്ന സമീപനമാണ് കാർണി സ്വീകരിക്കേണ്ടതെന്ന് ഒന്റാറിയോ പ്രീമിയർ ഡഗ് ഫോർഡ് വ്യക്തമാക്കി. അമേരിക്കയോട് ബലഹീനത കാട്ടാതെ ശക്തമായ നിലപാടിൽ നിന്ന് ചർച്ച ചെയ്യണമെന്ന് ആവശ്യപ്പെട്ട അദ്ദേഹം, അടുത്ത 29 ദിവസത്തിനുള്ളിൽ വ്യക്തമായ പദ്ധതി തയ്യാറാക്കണമെന്ന് പ്രധാനമന്ത്രിയോട് നിർദ്ദേശിച്ചു.
അതേസമയം, പ്രവിശ്യകൾ നേരിടുന്ന ആഘാതത്തിന്റെ തോതിൽ വ്യത്യാസങ്ങളുണ്ടെന്ന് നേതാക്കൾ ചൂണ്ടിക്കാട്ടി. ആൽബെർട്ട പ്രവിശ്യയെ നിലവിൽ താരിഫുകൾ വലിയ തോതിൽ ബാധിച്ചിട്ടില്ലെങ്കിലും എല്ലാ പ്രവിശ്യകളും പൂർണ്ണമായും താരിഫ് മുക്തമാകണമെന്നാണ് തങ്ങളുടെ നിലപാടെന്ന് ആൽബർട്ട പ്രീമിയർ ഡാനിയൽ സ്മിത്ത് വ്യക്തമാക്കി. CUSMA കരാർ പുതുക്കുന്നതിലൂടെ മുഴുവൻ വടക്കേ അമേരിക്കൻ മേഖലയ്ക്കും ഗുണമുണ്ടാകുമെന്ന് സസ്കാച്ചെവൻ പ്രീമിയർ സ്കോട്ട് മോ പ്രത്യാശ പ്രകടിപ്പിച്ചു. എന്നാൽ വ്യാപാര ചർച്ചകളിൽ തങ്ങളുമായി സമയബന്ധിതമായ കൂടിയാലോചനകൾ നടത്തണമെന്ന് പ്രവിശ്യാ ഭരണകൂടങ്ങൾ ഫെഡറൽ ഗവൺമെന്റിനോട് സംയുക്ത പ്രസ്താവനയിലൂടെ ആവശ്യപ്പെട്ടിട്ടുണ്ട്.
വ്യാപാര ചർച്ചകൾ ശക്തമാക്കുന്നതിന്റെ ഭാഗമായി കാനഡയുടെ വ്യാപാര മന്ത്രി ഡൊമിനിക് ലെബ്ലാങ്ക് അമേരിക്കൻ ട്രേഡ് റെപ്രസെന്റേറ്റീവ് ജാമിസൺ ഗ്രീറുമായി ആശയവിനിമയം നടത്തിയിട്ടുണ്ട്. അമേരിക്കയിൽ ജീവിതച്ചെലവ് കൂടുതലുള്ള പ്രദേശങ്ങളെയും വരാനിരിക്കുന്ന കോൺഗ്രഷണൽ തിരഞ്ഞെടുപ്പുകളെയും ലക്ഷ്യമിട്ട് പ്രതിരോധ നടപടികൾ കൈക്കൊള്ളാൻ കാനഡയിലെ നയതന്ത്ര പ്രതിനിധികൾ ആലോചിക്കുന്നതായാണ് വിവരങ്ങൾ. തൊഴിലാളികൾ, കർഷകർ, വ്യവസായികൾ എന്നിവരുടെ താല്പര്യങ്ങൾ സംരക്ഷിക്കുന്നതിന് കേന്ദ്ര-പ്രവിശ്യാ സർക്കാരുകൾ ഒറ്റക്കെട്ടായി നീങ്ങേണ്ടതുണ്ടെന്ന് പി.ഇ.ഐ പ്രീമിയറും യോഗത്തിന്റെ അധ്യക്ഷനുമായ റോബ് ലാന്റ്സ് എടുത്തുപറഞ്ഞു.
Trump Tariff Threat: Canada Premiers Meet Mark Carney
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
