ന്യൂയോർക്ക്: ലോകമെമ്പാടുമുള്ള ദശലക്ഷക്കണക്കിന് ആളുകൾ നേരിടുന്ന അമിതവണ്ണമെന്ന ആരോഗ്യപ്രശ്നത്തിന് നിർണായക പരിഹാരവുമായി പ്രമുഖ ആഗോള ഫാർമസ്യൂട്ടിക്കൽ കമ്പനിയായ എലി ലില്ലി (Eli Lilly). കമ്പനി വികസിപ്പിച്ചുവരുന്ന ‘റെറ്റാട്രൂട്ടൈഡ്’ (Retatrutide) എന്ന പുതിയ മരുന്ന്, പരീക്ഷണത്തിൽ പങ്കെടുത്തവരിൽ ഒന്നരവർഷം കൊണ്ട് 28 ശതമാനത്തിലധികം ശരീരഭാരം കുറയ്ക്കാൻ സഹായിച്ചതായാണ് പുതിയ റിപ്പോർട്ട്. നിലവിൽ വിപണിയിലുള്ള മറ്റ് മരുന്നുകളേക്കാൾ മികച്ച ഫലപ്രാപ്തിയാണ് പുതിയ ഘട്ടത്തിലെ പരീക്ഷണത്തിലൂടെ തെളിഞ്ഞിരിക്കുന്നത്. അടുത്ത വർഷത്തോടെ മരുന്ന് വിപണിയിലെത്തിക്കാനുള്ള അന്തിമ അനുമതികൾക്കായി കമ്പനി അപേക്ഷ സമർപ്പിക്കും.
ആരോഗ്യമേഖലയിൽ വലിയ ചർച്ചകൾക്ക് വഴിവെച്ച മൂന്നാം ഘട്ട ക്ലിനിക്കൽ പരീക്ഷണത്തിന്റെ വിവരങ്ങളാണ് കമ്പനി പുറത്തുവിട്ടത്. പ്രമേഹ രോഗമില്ലാത്ത, എന്നാൽ അമിതവണ്ണവും അതോടൊപ്പമുള്ള മറ്റ് ആരോഗ്യപ്രശ്നങ്ങളുമുള്ള മുതിർന്ന വ്യക്തികളിലാണ് ഈ പരീക്ഷണം നടത്തിയത്. ഇതിൽ ഉയർന്ന അളവിൽ (12 മില്ലിഗ്രാം) മരുന്ന് സ്വീകരിച്ചവർ 80 ആഴ്ചകൾ കൊണ്ട് ശരാശരി 28.3 ശതമാനം ശരീരഭാരം കുറച്ചതായി കണ്ടെത്തി. പരീക്ഷണത്തിൽ പങ്കെടുത്തവരിൽ 45 ശതമാനത്തിലധികം ആളുകൾക്ക് 30 ശതമാനത്തിലേറെ ഭാരം കുറയ്ക്കാനായി എന്നതും ശ്രദ്ധേയമാണ്. ഇത് സാധാരണയായി ശസ്ത്രക്രിയകളിലൂടെ മാത്രം സാധ്യമാകുന്ന മാറ്റമാണെന്ന് വിദഗ്ദ്ധർ വിലയിരുത്തുന്നു.
‘ട്രിപ്പിൾ ജി’ (Triple G) എന്ന വിളിപ്പേരിലറിയപ്പെടുന്ന ഈ മരുന്ന് മനുഷ്യശരീരത്തിലെ മൂന്ന് ഹോർമോൺ റിസപ്റ്ററുകളെയാണ് ഒരേസമയം ഉത്തേജിപ്പിക്കുന്നത്. വിശപ്പ് കുറയ്ക്കുന്നതിനുള്ള ജി.എൽ.പി-1 (GLP-1), ഇൻസുലിൻ ഉത്പാദനം വർദ്ധിപ്പിക്കുന്നതിനുള്ള ജി.ഐ.പി (GIP), ശരീരത്തിലെ കൊഴുപ്പ് വേഗത്തിൽ എരിച്ചുകളയാൻ സഹായിക്കുന്ന ഗ്ലൂക്കഗോൺ (Glucagon) എന്നിവയെയാണ് ഈ മരുന്ന് നിയന്ത്രിക്കുന്നത്.
നിലവിൽ വിപണിയിലുള്ള മരുന്നുകൾ പരമാവധി 15 മുതൽ 20 ശതമാനം വരെ മാത്രം ഭാരം കുറയ്ക്കുമ്പോഴാണ് റെറ്റാട്രൂട്ടൈഡ് 28 ശതമാനത്തിന് മുകളിൽ ഫലം തരുന്നത്. കുറഞ്ഞ അളവിൽ (4 മില്ലിഗ്രാം) മരുന്ന് നൽകിയവരിൽ പോലും 19 ശതമാനം ഭാരക്കുറവ് രേഖപ്പെടുത്തിയിട്ടുണ്ട്. രണ്ട് വർഷം തുടർച്ചയായി മരുന്ന് ഉപയോഗിച്ചവരിൽ ഭാരക്കുറവ് 30 ശതമാനവും കടന്നു.
പുതിയ മരുന്നിന്റെ ഫലപ്രാപ്തിക്കൊപ്പം തന്നെ അതിന്റെ പാർശ്വഫലങ്ങളെയും നിക്ഷേപകരും ആരോഗ്യരംഗവും ഉറ്റുനോക്കുന്നുണ്ട്. മരുന്ന് ഉപയോഗിച്ച ചിലരിൽ ചർമ്മത്തിൽ നേരിയ അസ്വസ്ഥതകൾ (Dysesthesia) പ്രകടമായെങ്കിലും, ഇത് മുൻപത്തെ പരീക്ഷണങ്ങളെ അപേക്ഷിച്ച് കുറവാണെന്ന് കമ്പനി വ്യക്തമാക്കി. ഉയർന്ന ഡോസ് സ്വീകരിച്ചവരിൽ 11 ശതമാനത്തോളം പേർ പാർശ്വഫലങ്ങൾ കാരണം പരീക്ഷണം പൂർത്തിയാക്കുന്നതിന് മുൻപ് പിന്മാറിയിട്ടുണ്ട്.
എങ്കിലും നിലവിലുള്ള മറ്റ് അനുബന്ധ മരുന്നുകളുടെ അത്രയും തന്നെ സുരക്ഷിതത്വ നിലവാരം പുതിയ മരുന്നിനുമുണ്ടെന്നാണ് എലി ലില്ലി വ്യക്തമാക്കുന്നത്. വാർത്ത പുറത്തുവന്നതോടെ ഓഹരി വിപണിയിൽ കമ്പനിയുടെ മൂല്യത്തിലും നേരിയ വർദ്ധനവുണ്ടായി. അടുത്ത വർഷം മരുന്ന് വിപണിയിലെത്തുന്നതോടെ അമിതവണ്ണത്തിനുള്ള ചികിത്സാരംഗത്ത് വലിയൊരു മാറ്റമുണ്ടാകുമെന്നാണ് പ്രതീക്ഷിക്കുന്നത്.
'Triple G' to tackle obesity; New drug that burns body fat
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
