ലോംഗ്യൂയിൽ : ചന്ദ്രനെ ലക്ഷ്യമാക്കി നീങ്ങുന്ന ആർട്ടെമിസ് II (Artemis II) പേടകത്തിലെ മിഷൻ സ്പെഷ്യലിസ്റ്റ് ജെറമി ഹാൻസൻ കനേഡിയൻ സ്പേസ് ഏജൻസിയിലെ മാധ്യമപ്രവർത്തകരുമായി വീഡിയോ കോളിലൂടെ സംസാരിച്ചു. ഭൂമിയിൽ നിന്നും ഏകദേശം 1,90,000 കിലോമീറ്റർ അകലെ നിന്നുമാണ് ഹാൻസൻ തന്റെ യാത്രാനുഭവങ്ങൾ പങ്കുവെച്ചത്.
ഭൂമിയിൽ നിന്നും ഏറെ അകലെയുള്ള ‘ഡീപ് സ്പേസി’ലേക്ക് കടക്കാൻ യാത്രികർ പൂർണ്ണ സജ്ജരാണെന്ന് നാസ അറിയിച്ചു. തിങ്കളാഴ്ച ഉച്ചയോടെ സംഘം ചന്ദ്രന്റെ മറുവശത്ത് എത്തുമെന്നാണ് പ്രതീക്ഷിക്കുന്നത്. ഈ യാത്രയ്ക്കിടെ ചന്ദ്രന് പിന്നിൽ നിന്നും ഭൂമി ഉദിച്ചുയരുന്ന ‘എർത്ത് റൈസ്’ (Earthrise) എന്ന അപൂർവ കാഴ്ചയ്ക്കും ഇവർ സാക്ഷ്യം വഹിക്കും.
അമേരിക്കൻ ബഹിരാകാശ യാത്രികരായ റീഡ് വൈസ്മാൻ, വിക്ടർ ഗ്ലോവർ, ക്രിസ്റ്റീന കോച്ച് എന്നിവരാണ് ഹാൻസനൊപ്പമുള്ളത്. പേടകത്തിലെ വിവിധ ഉപകരണങ്ങളുടെയും സുരക്ഷാ സംവിധാനങ്ങളുടെയും പരിശോധനയിലാണ് സംഘം ഇപ്പോൾ. ഹാൻസന്റെ പ്രവർത്തനങ്ങൾ മികച്ചതാണെന്ന് സഹയാത്രികനായ വിക്ടർ ഗ്ലോവർ അഭിപ്രായപ്പെട്ടു. വലിയ ലക്ഷ്യങ്ങൾക്കായി ഒരുമിച്ച് പ്രവർത്തിക്കുമ്പോൾ മികച്ച നേട്ടങ്ങൾ കൈവരിക്കാനാകുമെന്ന് ഹാൻസൻ പറഞ്ഞു.
വിക്ഷേപണം വിജയിച്ചതോടെ കാനഡയിലുടനീളം വലിയ ആവേശമാണ് പ്രകടമാകുന്നത്. അന്താരാഷ്ട്ര സഹകരണത്തിന്റെ മികച്ച മാതൃകയാണിതെന്ന് കനേഡിയൻ സ്പേസ് ഏജൻസി പ്രസിഡന്റ് ലിസ ക്യാമ്പ്ബൽ വ്യക്തമാക്കി. യാത്രയ്ക്കിടെ പകർത്തിയ മനോഹരമായ ചിത്രങ്ങൾ ഉടൻ തന്നെ ജനങ്ങളുമായി പങ്കുവെക്കുമെന്ന് ജെറമി ഹാൻസൻ അറിയിച്ചു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Artemis II to orbit the moon; Travelers share details from 1,90,000 km away
