2035-ഓടെ വടക്കേ അമേരിക്കയിലെ ഏറ്റവും വേഗത്തിൽ വളരുന്ന 10 മെട്രോ നഗരങ്ങളുടെ പട്ടികയിൽ ഒന്നാം സ്ഥാനത്തെത്തി ടൊറന്റോ. റിയൽ എസ്റ്റേറ്റ് മേഖലയിലെ സോഷ്യൽ മാർക്കറ്റ് പ്ലേസായ ഹയർ ക്യാപ്സ് നടത്തിയ പഠനത്തിലാണ് ഈ കണ്ടെത്തൽ. പട്ടികയിൽ കാൽഗറി രണ്ടാം സ്ഥാനത്തും എഡ്മന്റൺ നാലാം സ്ഥാനത്തുമാണ്. സ്വാഭാവിക ജനസംഖ്യാ വളർച്ച, കുടിയേറ്റം, എ.ഐ സ്വാധീനം, കാലാവസ്ഥാ വ്യതിയാനങ്ങളെ പ്രതിരോധിക്കാനുള്ള ശേഷി എന്നിങ്ങനെ നാല് ഘടകങ്ങൾ പരിഗണിച്ചാണ് ഈ റാങ്കിങ് തയ്യാറാക്കിയത്.
ഈ ഓരോ ഘടകത്തിനും 10 പോയിന്റ് വീതം നൽകി ഒരു നഗരത്തിന്റെ മൊത്തം വളർച്ചാ സാധ്യത 40-ൽ കണക്കാക്കിയാണ് പട്ടിക തയ്യാറാക്കിയത്. ഈ മാനദണ്ഡമനുസരിച്ച് 40-ൽ 32 പോയിന്റാണ് കാൽഗറിക്ക് ലഭിച്ചത്. സ്വാഭാവിക ജനസംഖ്യാ വളർച്ചയ്ക്ക് ഏഴ് പോയിന്റും കുടിയേറ്റത്തിന് ഒൻപത് പോയിന്റും എ.ഐ. സ്വാധീനത്തിന് ആറ് പോയിന്റും കാലാവസ്ഥാ പ്രതിരോധ ശേഷിക്ക് 10 പോയിന്റും കാൽഗറി നേടി.
ഈ റിപ്പോർട്ട് അനുസരിച്ച്, കുടിയേറ്റം മൂലമുള്ള വളർച്ച, സാമ്പത്തിക മേഖലയിലെ വൈവിധ്യം, പ്രകൃതിക്ഷോഭങ്ങളെ ചെറുക്കാനുള്ള ശേഷി എന്നിവയാണ് കാൽഗറിയെ മുന്നോട്ട് നയിക്കുന്നത്. ഈ പ്രവണത തുടരുകയാണെങ്കിൽ കാനഡയിലെ പ്രധാന നഗരങ്ങൾ ഭാവിയിലും ഈ വളർച്ച നിലനിർത്തുമെന്നാണ് പഠനം സൂചിപ്പിക്കുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Growth race among North American metros: Toronto leads, Calgary close behind
