ടൊറന്റോ: ടൊറന്റോ നഗരത്തെ ലക്ഷ്യമിട്ടൊരു വൻ സാമ്പത്തിക തട്ടിപ്പിന്റെ ഞെട്ടിപ്പിക്കുന്ന വിവരങ്ങൾ പുറത്ത്. 2019-ൽ നടന്ന ഒരു വൈദ്യുതി തട്ടിപ്പ് ശ്രമത്തിൽ, ടൊറന്റോ നഗരം 2.5 മില്യൺ ഡോളറിന്റെ സാമ്പത്തിക നഷ്ടത്തിൽ നിന്നും തലനാരിഴക്കാണ് രക്ഷപെട്ടത്. വിരമിച്ച ഒരു മുൻ ജീവനക്കാരന്റെ വിവരങ്ങൾ അനധികൃതമായി ഉപയോഗിച്ചാണ് ഈ തട്ടിപ്പിന് ശ്രമിച്ചത്. കഴിഞ്ഞ മാസം ജൂൺ 21-ന് ഓഡിറ്റർ ജനറലിന്റെ ഓഫീസ് പുറത്തുവിട്ട റിപ്പോർട്ടിലാണ് ഈ വിവരങ്ങളുള്ളത്. നഗരത്തിന്റെ ഉടമസ്ഥതയിലുള്ള 14 സ്ഥാപനങ്ങളുടെ വൈദ്യുതി വിതരണം ടൊറന്റോ ഹൈഡ്രോയിൽ നിന്ന് നഗരത്തിന്റെ അനുമതിയോ അറിവോ ഇല്ലാതെ രണ്ട് സ്വകാര്യ ഊർജ്ജ വിതരണക്കാർക്ക് കൈമാറിയാണ് തട്ടിപ്പ് നടത്തിയത്.
സ്ഥിരം നടക്കുന്ന പരിശോധനയ്ക്കിടെ കോർപ്പറേറ്റ് റിയൽ എസ്റ്റേറ്റ് മാനേജ്‌മെന്റ് വിഭാഗത്തിലെ ഉദ്യോഗസ്ഥർ അസ്വാഭാവികമായ ഇൻവോയ്സുകൾ ശ്രദ്ധയിൽപ്പെട്ടപ്പോഴാണ് തട്ടിപ്പ് പുറത്തായത്. ടൊറന്റോ ഹൈഡ്രോയുമായി താരതമ്യം ചെയ്യുമ്പോൾ, 4.2 ദശലക്ഷം ഡോളർ വരുന്ന മൂന്നാം കക്ഷി കരാറുകൾ പ്രകാരം നഗരത്തിൽ നിന്ന് അമിതമായി പണം ഈടാക്കിയതായി കണ്ടെത്തി. 2019 സെപ്റ്റംബറിനും 2020 ജനുവരിക്കും ഇടയിൽ, ഈ കരാറുകൾ റദ്ദാക്കുന്നതിന് മുമ്പായി 250,000 ഡോളർ ഇതിനകം അടച്ചിരുന്നു. ഭാഗ്യവശാൽ, ഈ തുക മുഴുവനായും നഗരത്തിന് തിരികെ ലഭിച്ചു.
ഓഡിറ്റർ ജനറൽ 2020-ൽ ആരംഭിച്ച അന്വേഷണം കഴിഞ്ഞ മാസമാണ് പൂർത്തിയായത്. വിരമിച്ച ഒരു സിറ്റി ജീവനക്കാരന്റെ വിവരങ്ങൾ ഉപയോഗിച്ചാണ് ഈ കരാറുകൾക്ക് തുടക്കമിട്ടതെന്നും, എന്നാൽ ആ വ്യക്തിക്ക് ഇതിൽ പങ്കില്ലെന്നും റിപ്പോർട്ടിൽ കണ്ടെത്തി. നിലവിലുള്ള സിറ്റി ജീവനക്കാരുടെ ഭാഗത്തുനിന്ന് തെറ്റായൊന്നും കണ്ടെത്തിയില്ലെങ്കിലും, ചില കൺസൾട്ടിംഗ് സ്ഥാപന ഉടമകൾക്ക് തട്ടിപ്പുമായി ബന്ധമുണ്ടെന്ന് റിപ്പോർട്ടിൽ പറയുന്നുണ്ടെങ്കിലും, വ്യക്തമായ തെളിവുകളുടെ അഭാവം മൂലം അവർക്കെതിരെ കുറ്റം ചുമത്താൻ കഴിഞ്ഞിട്ടില്ല
കേസ് ടൊറന്റോ പോലീസിന് കൈമാറിയിട്ടുണ്ട്. പോലീസ് വക്താവ് സ്റ്റെഫാനി സെയർ പറഞ്ഞത്, “ക്രിമിനൽ അന്വേഷണത്തിന് ഇത് അനുയോജ്യമാണോ എന്ന് ഞങ്ങൾ നിലവിൽ വിലയിരുത്തുകയാണ്” എന്നാണ്.സിറ്റി കൗൺസിലിന്റെ ഓഡിറ്റ് കമ്മിറ്റി വെള്ളിയാഴ്ച ഈ റിപ്പോർട്ട് പരിശോധിക്കും. റിപ്പോർട്ട് അംഗീകരിക്കുകയാണെങ്കിൽ, ഇൻവോയ്സ് പരിശോധനാ പ്രോട്ടോക്കോളുകൾ ശക്തിപ്പെടുത്തുന്നതിനായി റിപ്പോർട്ട് എല്ലാ വകുപ്പുകളിലും വിതരണം ചെയ്യാൻ സിറ്റി മാനേജരോട് ആവശ്യപ്പെടും. ഈ സംഭവത്തിൽ നിന്ന് പാഠം ഉൾക്കൊള്ളേണ്ടതിന്റെ പ്രാധാന്യം ഓഡിറ്റ് കമ്മിറ്റി ചെയർമാൻ കൗൺസിലർ സ്റ്റീഫൻ ഹോളിഡേ ഊന്നിപ്പറഞ്ഞു. “ഇത് വലിയൊരു തുകയാണ്. വൈദ്യുതിക്ക് ഒരു വർഷം 200 ദശലക്ഷം ഡോളറിലധികം ചെലവ് വരുന്നുണ്ട്. ശരിയായ പരിശോധനകളും സന്തുലിതാവസ്ഥയും നികുതിദായകർക്ക് മികച്ച സംരക്ഷണം ഉറപ്പാക്കുന്നു,” അദ്ദേഹം പറഞ്ഞു.
തട്ടിപ്പ് ശ്രമത്തിന്റെ പശ്ചാത്തലത്തിൽ, ഭാവിയിൽ ഇത്തരം പ്രശ്നങ്ങൾ ഒഴിവാക്കാൻ ‘ചുമതലകളുടെ വേർതിരിവ്’ (separation of duties) എന്ന സമ്പ്രദായം സഹായകമാകുമെന്ന് ഒന്റാറിയോ ആസ്ഥാനമായുള്ള ഹേവുഡ് ഹണ്ട് ഇൻവെസ്റ്റിഗേഷൻ ഏജൻസിയിലെ അന്വേഷകനും മുൻ ആർ.സി.എം.പി. ഉദ്യോഗസ്ഥനുമായ ജെഫ് ഫിലിറ്റർ പറഞ്ഞു.
“ഓരോ ഘട്ടത്തിലും ഓരോ വ്യക്തിക്ക് ഓരോ കാര്യത്തിന്റെ ചുമതല നൽകുകയും, ഓരോ ഘട്ടവും അടുത്തയാൾ പരിശോധിക്കുകയും ചെയ്യുകയാണെങ്കിൽ, ഒരുപക്ഷേ ഇതെല്ലാം ഒഴിവാക്കാമായിരുന്നു,” ഫിലിറ്റർ ചൂണ്ടിക്കാട്ടി. ഒരു വ്യക്തി മാത്രം കരാർ അംഗീകാരത്തിന്റെ പല ഘട്ടങ്ങളും കൈകാര്യം ചെയ്യുന്നത് തടയുന്നതിലൂടെ, ഭാവിയിൽ ഇത്തരം സംഭവങ്ങൾ ഒഴിവാക്കാൻ ഈ നടപടി സഹായിക്കുമെന്നും അദ്ദേഹം കൂട്ടിച്ചേർത്തു.
