കനേഡിയൻ കോഫി ഭീമന്മാരായ ടിം ഹോർട്ടൺസ്, ഉപഭോക്താക്കൾക്ക് ഇനി കോഫി മാത്രമല്ല, അവരുടെ ഇലക്ട്രിക് വാഹനങ്ങൾക്കും ഊർജ്ജം നൽകും. രാജ്യത്തുടനീളമുള്ള 100 റെസ്റ്റോറന്റുകളിൽ അതിവേഗ ഇലക്ട്രിക് വാഹന (EV) ചാർജിങ് സ്റ്റേഷനുകൾ സ്ഥാപിക്കാനാണ് കമ്പനി ലക്ഷ്യമിടുന്നത്. ആദ്യത്തെ ചാർജിങ് സ്റ്റേഷൻ ഇതിനകം തന്നെ റെജീനയിലെ ഒരു ടിം ഹോർട്ടൺസ് റെസ്റ്റോറന്റിൽ പൊതുജനങ്ങൾക്കായി തുറന്നു.
ഈ പദ്ധതിക്കായി ക്യുബെക് ആസ്ഥാനമായുള്ള FLO എന്ന കമ്പനിയുമായി ടിം ഹോർട്ടൺസ് സഹകരിക്കും. 2028-ഓടെ കാനഡയിലെ എല്ലാ 10 പ്രവിശ്യകളിലുമുള്ള തിരഞ്ഞെടുത്ത കേന്ദ്രങ്ങളിൽ ചാർജിങ് സ്റ്റേഷനുകൾ ലഭ്യമാക്കാനാണ് കമ്പനി പദ്ധതിയിടുന്നത്.
ഈ വർഷം അവസാനത്തോടെ 13 ടിം ഹോർട്ടൺസ് കേന്ദ്രങ്ങളിലും 2026-ഓടെ 50 കേന്ദ്രങ്ങളിലും ചാർജിങ് സ്റ്റേഷനുകൾ സ്ഥാപിക്കും. ഇതോടെ കാനഡയിലെ ഏറ്റവും വലിയ ഇ.വി. ഫാസ്റ്റ് ചാർജിങ് ദാതാക്കളിലൊന്നാകാൻ ടിം ഹോർട്ടൺസ് ഒരുങ്ങുകയാണ്.
ഓരോ ചാർജിങ് സ്റ്റേഷനിലും ശരാശരി നാല് പോർട്ടുകൾ ഉണ്ടാകും. 10 മിനിറ്റുകൊണ്ട് 120 കിലോമീറ്റർ (75 മൈൽ) ദൂരം സഞ്ചരിക്കാൻ ആവശ്യമായ ചാർജ് ഈ സ്റ്റേഷനുകൾ നൽകും. യാത്രക്കാർക്ക് FLO-യുടെ മൊബൈൽ ആപ്പ് ഉപയോഗിച്ച് ഏറ്റവും അടുത്തുള്ള ചാർജിങ് സ്റ്റേഷനുകൾ കണ്ടെത്താൻ സാധിക്കും.
ഇലക്ട്രിക് വാഹന ചാർജിങ് സ്റ്റേഷനുകൾ നിർമ്മിക്കുന്നതിൽ കാനഡ പിന്നിലാണെന്ന് വിമർശനങ്ങൾ നേരിടുന്ന സാഹചര്യത്തിലാണ് ടിം ഹോർട്ടൺസ്സിന്റെ ഈ നീക്കം. മോൺട്രിയൽ ആസ്ഥാനമായുള്ള കൺസൾട്ടൻസി സ്ഥാപനമായ ഡൺസ്കി എനർജി ആൻഡ് ക്ലൈമറ്റിന്റെ റിപ്പോർട്ടനുസരിച്ച്, നിലവിൽ രാജ്യത്ത് 35,000-ൽ അല്പം കൂടുതലെ ചാർജിങ് സ്റ്റേഷനുകളുള്ളൂ. രാജ്യത്തിന്റെ നയപരമായ ലക്ഷ്യങ്ങൾ നേടുന്നതിന് 1,00,520 ചാർജിങ് സ്റ്റേഷനുകൾ ആവശ്യമുണ്ട്.
നാച്ചുറൽ റിസോഴ്സസ് കാനഡയുടെ ഏറ്റവും പുതിയ കണക്കുകൾ പ്രകാരം, കാനഡയിലെ 88 ശതമാനം ചാർജിങ് പോർട്ടുകളും ബ്രിട്ടീഷ് കൊളംബിയ, ഒന്റാറിയോ, ക്യുബെക് എന്നീ പ്രവിശ്യകളിലാണ്. കഴിഞ്ഞ വർഷത്തെ പുതിയ ഇ.വി. വിൽപ്പനയുടെ 92 ശതമാനവും ഈ പ്രവിശ്യകളിലാണ് നടന്നത്. ടിം ഹോർട്ടൺസിന്റെ ഈ പുതിയ സംരംഭം രാജ്യത്തെ ഇലക്ട്രിക് വാഹന വിപ്ലവത്തിന് വലിയൊരു മുതൽക്കൂട്ടാകുമെന്നാണ് പ്രതീക്ഷ.
