ഒട്ടാവ: കാനഡയിലേക്ക് കുടിയേറാൻ ആഗ്രഹിക്കുന്നവർക്ക് സ്ഥിരതാമസത്തിനുള്ള ഏറ്റവും പ്രധാനപ്പെട്ട മാർഗ്ഗമായ ‘എക്സ്പ്രസ് എൻട്രി’ സിസ്റ്റത്തിൽ വൻ അഴിച്ചുപണിക്കൊരുങ്ങി കനേഡിയൻ സർക്കാർ. വരാനിരിക്കുന്ന 12 മുതൽ 18 മാസങ്ങൾക്കുള്ളിൽ പുതിയ പരിഷ്കാരങ്ങൾ പൂർണ്ണമായി നടപ്പിലാക്കുമെന്നാണ് ഔദ്യോഗിക വിവരങ്ങൾ നൽകുന്ന സൂചന.
എക്സ്പ്രസ് എൻട്രി റാങ്കിങ് സിസ്റ്റത്തിൽ മാറ്റങ്ങൾ വരുന്നത് നിലവിൽ പൂളിലുള്ളവരുടെയും ഇനി അപേക്ഷിക്കാൻ ഇരിക്കുന്നവരുടെയും പിആർ സാധ്യതകളെ ബാധിക്കാം. എന്നാൽ, ഇപ്പോൾ മുതൽ തന്നെ കൃത്യമായ പ്ലാനിങ്ങോടെ തയ്യാറെടുത്താൽ പുതിയ മാറ്റങ്ങളെ അതിജീവിച്ച് കാനഡ പിആർ ഉറപ്പാക്കാൻ സാധിക്കും. അതിനായി ഉദ്യോഗാർത്ഥികൾ ഉടനടി ചെയ്യേണ്ട 3 പ്രധാന കാര്യങ്ങൾ താഴെ പറയുന്നവയാണ്:
- ഭാഷാ പരീക്ഷകളിൽ മികച്ച സ്കോർ നേടുക
വരാനിരിക്കുന്ന പരിഷ്കാരങ്ങളിൽ എല്ലാ നാല് ഭാഷാ നൈപുണ്യങ്ങളിലും (Reading, Writing, Listening, Speaking) കുറഞ്ഞത് CLB 6 സ്കോർ എങ്കിലും നിർബന്ധമാക്കാൻ സാധ്യതയുണ്ട്. കൂടാതെ കാനഡയിലെ സഹോദരങ്ങൾ, കനേഡിയൻ വിദ്യാഭ്യാസം എന്നിവയ്ക്കുള്ള ബോണസ് പോയിന്റുകൾ എടുത്തുകളഞ്ഞേക്കാം എന്ന സൂചനയുള്ളതിനാൽ, സ്കോർ ഉയർത്താനുള്ള ഏക മാർഗ്ഗം ലാംഗ്വേജ് ടെസ്റ്റ് മാത്രമായിരിക്കും. നിലവിലുള്ള നിങ്ങളുടെ ലാംഗ്വേജ് ടെസ്റ്റ് റിസൾട്ടിന് 6 മാസത്തിൽ കൂടുതൽ പഴക്കമുണ്ടെങ്കിൽ അത് വീണ്ടും എഴുതി ഉയർന്ന സ്കോർ നേടാൻ ശ്രമിക്കുക. വരും മാസങ്ങളിൽ വരാനിരിക്കുന്ന വലിയ ഡ്രോകളിൽ പങ്കെടുക്കാൻ CELPIP പോലുള്ള അംഗീകൃത ഇംഗ്ലീഷ് പരീക്ഷകൾ എഴുതി ഉയർന്ന സ്കോർ നിലനിർത്തുന്നത് അത്യന്താപേക്ഷിതമാണ്.
- തൊഴിൽ പരിചയം ഉറപ്പാക്കുക
പുതിയ നിയമപ്രകാരം കഴിഞ്ഞ 3 വർഷത്തിനിടയിൽ കുറഞ്ഞത് ഒരു വർഷത്തെ തുടർച്ചയായ സ്കിൽഡ് തൊഴിൽ പരിചയം നിർബന്ധമാക്കിയേക്കും.അടുത്ത 12-18 മാസത്തിനുള്ളിൽ നിങ്ങൾക്ക് ഈ യോഗ്യത ഉണ്ടെന്ന് ഉറപ്പുവരുത്തുക. കാനഡയുടെ ഔദ്യോഗിക ജോബ് ബാങ്ക് അനുസരിച്ച് ഏറ്റവും കൂടുതൽ ശമ്പളം ലഭിക്കുന്ന തസ്തികകളിൽ (High-wage occupation) പ്രവൃത്തിപരിചയം നേടാൻ ശ്രമിക്കുന്നത് റാങ്കിങ്ങിൽ കൂടുതൽ മുൻഗണന ലഭിക്കാൻ സഹായിക്കും.
- ട്രേഡ് സർട്ടിഫിക്കറ്റുകൾ സ്വന്തമാക്കുക
നിങ്ങൾ സാങ്കേതിക മേഖലകളിലോ നിർമ്മാണ മേഖലകളിലോ (Trades) ജോലി ചെയ്യുന്നവരാണെങ്കിൽ കാനഡയിലെ റെഡ് സീൽ (Red-Seal) അംഗീകൃത ട്രേഡ് സർട്ടിഫിക്കറ്റുകൾ സ്വന്തമാക്കാൻ ശ്രമിക്കുക. വരും ദിവസങ്ങളിൽ ഇത്തരം പ്രൊഫഷണലുകൾക്ക് എക്സ്പ്രസ് എൻട്രിയിൽ വലിയ രീതിയിലുള്ള പരിഗണന ലഭിക്കാൻ സാധ്യതയുണ്ട്. പുതിയ പരിഷ്കാരങ്ങൾ വരുന്നതോടെ നിങ്ങളുടെ ലാംഗ്വേജ് ടെസ്റ്റിന്റെ കാലാവധി കഴിഞ്ഞാൽ എക്സ്പ്രസ് എൻട്രി പ്രൊഫൈൽ അസാധുവാകും. അതിനാൽ വലിയ ഡ്രോകളിൽ അവസരം നഷ്ടപ്പെടാതിരിക്കാൻ ഇന്നുതന്നെ തയ്യാറെടുപ്പുകൾ തുടങ്ങുക!
Three steps candidates can take to prepare for the reforms to permanent residence selection through Express Entry
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
