പെട്രോളിൽ വെള്ളമെന്ന് പരാതി; വണ്ടികൾ പാതിവഴിയിൽ കട്ടപ്പുറത്ത്! എഡ്മന്റണിലെ ഈ പമ്പിൽ നിന്ന് ഇന്ധനം അടിച്ചവർക്ക് ‘എട്ടിന്റെ പണി’

എഡ്മന്റൺ: സൗത്ത് എഡ്മന്റണിലെ എസ്സോ സർക്കിൾ കെ (Esso Circle K) ഗ്യാസ് സ്റ്റേഷനിൽ നിന്നും ഇന്ധനം അടിച്ച നിരവധി വാഹനങ്ങൾ തകരാറിലായതായി പരാതി. എള്ളേർസ്‌ലി റോഡ്, സമ്മർസൈഡ് ഡ്രൈവ് എന്നിവിടങ്ങളിലെ പമ്പിൽ നിന്ന് പെട്രോൾ നിറച്ച വാഹനങ്ങളാണ് തുടർയാത്ര ചെയ്യാനാകാതെ വഴിയിൽ നിലച്ചത്. ഇന്ധനത്തിൽ വെള്ളത്തിന്റെ അംശം കണ്ടെത്തിയതാണ് എഞ്ചിൻ തകരാറിന് കാരണമായതെന്നാണ് പ്രാഥമിക നിഗമനം.

തിങ്കളാഴ്ച രാത്രി പമ്പിൽ നിന്നും ഇന്ധനം നിറച്ച ഡാൻ ബ്രോൾട്ട് എന്നയാളുടെ വാഹനം പിറ്റേന്ന് രാവിലെ സ്റ്റാർട്ടായില്ല. തുടർന്ന് ഡീലർഷിപ്പിലെത്തിച്ച് നടത്തിയ പരിശോധനയിൽ സ്പാർക്ക് പ്ലഗ്ഗുകൾ നശിച്ചതായും ഇന്ധനത്തിൽ വെള്ളം കലർന്നതായും കണ്ടെത്തി. ഏകദേശം മൂന്ന് ലക്ഷം രൂപയോളം (3,000 ഡോളർ) അറ്റകുറ്റപ്പണികൾക്കായി ചിലവാകുമെന്നാണ് ഇദ്ദേഹം പറയുന്നത്.

സമാനമായ അനുഭവം തന്നെയാണ് ജാനെൽ ഡോർ എന്ന യുവതിക്കുമുണ്ടായത്. പമ്പിൽ നിന്ന് ഇന്ധനം നിറച്ച് പത്ത് ബ്ലോക്കുകൾ പിന്നിടുന്നതിന് മുൻപ് തന്നെ വാഹനം കുലുങ്ങുകയും പാതിവഴിയിൽ നിലയ്ക്കുകയും ചെയ്തു. ജോലിക്ക് പോകാൻ പോലും സാധിക്കാതെ താൻ പ്രയാസപ്പെടുകയാണെന്ന് ഇവർ പ്രതികരിച്ചു.

സംഭവം പുറത്തുവന്നതോടെ സമാനമായ അനുഭവം നേരിട്ട നിരവധി പേർ രംഗത്തെത്തി. ഏകദേശം ഇരുപത്തിയഞ്ചോളം വ്യക്തികൾ ഇതേ പമ്പിനെതിരെ സോഷ്യൽ മീഡിയ വഴി പരാതി ഉന്നയിച്ചിട്ടുണ്ട്. പരാതികൾ വർധിച്ചതോടെ പമ്പിലെ ചില ഇന്ധന പമ്പുകൾ പ്രവർത്തനരഹിതമാക്കുകയും സർവീസ് വാഹനങ്ങൾ സ്ഥലത്തെത്തി പരിശോധന നടത്തുകയും ചെയ്തു.

സർക്കിൾ കെയുടെ ഉടമസ്ഥരായ ‘കുഷ് ടാർഡ്’ (Couche-Tard) സംഭവത്തിൽ ഔദ്യോഗിക പ്രതികരണം നടത്തിയിട്ടുണ്ട്. “ചില ഉപഭോക്താക്കളുടെ പരാതികൾ ശ്രദ്ധയിൽപ്പെട്ടിട്ടുണ്ട്. നിലവിൽ ഇന്ധന വിതരണത്തിൽ പ്രത്യേക തകരാറുകൾ കണ്ടെത്തിയിട്ടില്ലെങ്കിലും ഗുണനിലവാര പരിശോധനകൾ കർശനമായി തുടരുകയാണ്,” എന്ന് കമ്പനി വക്താവ് അമിൻ എൻഡമാമ അറിയിച്ചു. ഇംപീരിയൽ ഓയിൽ അധികൃതർ ഇതുവരെ പ്രതികരിച്ചിട്ടില്ല.

ഉപഭോക്താക്കൾക്ക് സർവീസ് ആൽബർട്ട വഴി പരാതി നൽകാനുള്ള സൗകര്യമുണ്ടെന്ന് മന്ത്രി ഡെയ്ൽ നാലി അറിയിച്ചു. വാഹനങ്ങൾക്ക് നാശനഷ്ടം സംഭവിച്ചവർ ഇൻഷുറൻസ് കമ്പനികളുമായോ നിയമവിദഗ്ധരുമായോ ബന്ധപ്പെടണമെന്നും അദ്ദേഹം നിർദ്ദേശിച്ചു. പമ്പിൽ ഇന്ധന ഗുണനിലവാരത്തിൽ വീഴ്ചയുണ്ടായോ എന്ന കാര്യത്തിൽ വിശദമായ അന്വേഷണം നടക്കുകയാണ്.

Those who bought fuel from this pump in Edmonton will be punished for 'eight years'

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt