മൊഗാദിഷു: കായിക ജീവിതത്തിലെ കടുത്ത പ്രതിസന്ധികൾക്ക് ശേഷം കരുത്തോടെ തിരിച്ചുവരവിനൊരുങ്ങി സോമാലിയൻ കായികതാരം ഒമർ അബ്ദുൽകാദിർ അർതാൻ. തന്റെ ഔദ്യോഗിക പ്രതികരണത്തിലൂടെ, കടുത്ത വെല്ലുവിളികൾക്കിടയിലും തനിക്ക് പിന്തുണ നൽകിയവർക്ക് നന്ദി അറിയിച്ച താരം, 2030 ഫിഫ ലോകകപ്പിൽ താൻ ഉണ്ടാകുമെന്ന് ഉറപ്പിച്ചു പറഞ്ഞു.
കഠിനമായ ഘട്ടത്തിലൂടെ കടന്നുപോകുമ്പോൾ സോമാലിയൻ ജനതയും ഭരണകൂടവും നൽകിയ പിന്തുണയാണ് തന്റെ കരുത്തെന്നും അർതാൻ വ്യക്തമാക്കി. ഫിഫയോടും (FIFA) കാഫിനോടും (CAF) താരം പ്രത്യേക നന്ദി രേഖപ്പെടുത്തി. “ഈ യാത്രയിലുടനീളം എന്നെ പിന്തുണച്ചവർക്ക് നന്ദി. അവർ എന്നെ ഒരിക്കലും ഒറ്റപ്പെടുത്തിയില്ല,” അർതാൻ പറഞ്ഞു.
തന്റെ ലക്ഷ്യത്തെക്കുറിച്ച് സംസാരിക്കവെ, അടുത്ത ലോകകപ്പിലേക്ക് കൂടുതൽ കരുത്തോടെയും മികച്ച തയ്യാറെടുപ്പുകളോടെയും തിരിച്ചുവരുമെന്ന് അദ്ദേഹം ആത്മവിശ്വാസം പ്രകടിപ്പിച്ചു. “ഇൻഷാ അള്ളാ, 2030 ഫിഫ ലോകകപ്പിൽ ഞാൻ ഉണ്ടാകുമെന്ന് ഉറപ്പ് നൽകുന്നു. സോമാലിയൻ പതാക അഭിമാനത്തോടെ ഉയർത്തിപ്പിടിക്കാൻ ഞാൻ കഠിനാധ്വാനം തുടരും, ഒരിക്കലും പിന്മാറില്ല,” താരം കൂട്ടിച്ചേർത്തു.
സോമാലിയൻ കായികരംഗത്ത് വലിയ പ്രതീക്ഷകൾ നൽകുന്നതാണ് അർത്താന്റെ ഈ ശക്തമായ തിരിച്ചുവരവ് പ്രഖ്യാപനം. താരത്തിന്റെ ദൃഢനിശ്ചയത്തെ വലിയ ആവേശത്തോടെയാണ് ആരാധകർ സ്വീകരിച്ചിരിക്കുന്നത്. ആഫ്രിക്കൻ ഫുട്ബോളിലെ കഴിഞ്ഞ വർഷത്തെ മികച്ച റഫറിയായി തെരഞ്ഞെടുക്കപ്പെട്ട സൊമാലിയക്കാരൻ ഒമർ അബ്ദുൾകാദിർ അർതാനെ ഫിഫ- റഫറിമാരുടെ പട്ടികയിൽനിന്ന് ഒഴിവാക്കിയിരുന്നു. അമേരിക്ക വിസ അനുവദിക്കാത്തതായിരുന്നു കാരണം. ലോകകപ്പ് നിയന്ത്രിക്കുന്ന ആദ്യ സൊമാലിയക്കാരനെന്ന നേട്ടത്തിനരികെയായിരുന്നു അർതാൻ.
"They never left me alone, I will be back"; 2030 FIFA World Cup
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
