‘വലിയ കായികമേളയായാലും നിയമം മാറില്ല’; ഫുട്ബോൾ താരം തോമസ് പാർട്ടിക്ക് വിസ നിഷേധിച്ച് കാനഡ; നിയമനടപടിയുമായി ഘാന

ലണ്ടൻ: ഘാന ദേശീയ ഫുട്ബോൾ ടീം മിഡ്ഫീൽഡർ തോമസ് പാർട്ടിക്ക് വിസ നിഷേധിച്ച കനേഡിയൻ ഇമിഗ്രേഷൻ അധികൃതരുടെ നടപടിക്കെതിരെ കടുത്ത നിയമനടപടികളിലേക്ക് നീങ്ങാൻ ഘാന സർക്കാർ. ലൈംഗികാരോപണക്കേസിൽ ലണ്ടനിൽ വിചാരണ നേരിടുന്ന താരത്തിന് വിസ നിഷേധിച്ച കാനഡയുടെ തീരുമാനം അങ്ങേയറ്റം അന്യായമാണെന്ന് ഘാന ഫുട്ബോൾ അസോസിയേഷൻ പ്രസ്താവനയിലൂടെ അറിയിച്ചു. വരാനിരിക്കുന്ന പ്രധാന മത്സരങ്ങൾക്ക് മുന്നോടിയായി ടീമിന് വൻ തിരിച്ചടിയാണ് ഈ തീരുമാനം ഉണ്ടാക്കിയിരിക്കുന്നത്.

ഇംഗ്ലീഷ് ക്ലബ്ബായ ആഴ്സണലിന്റെ മുൻ താരമായിരുന്ന തോമസ് പാർട്ടിക്കെതിരെ 2025-ലാണ് ലൈംഗികാരോപണം ഉയർന്നത്. എന്നാൽ തനിക്കെതിരെയുള്ള ആരോപണങ്ങൾ അടിസ്ഥാനരഹിതമാണെന്നും താൻ നിരപരാധിയാണെന്നുമാണ് പാർട്ടി കോടതിയിൽ വാദിച്ചിട്ടുള്ളത്. ഈ കേസിൽ വരും മാസങ്ങളിൽ വിചാരണ നടക്കാനിരിക്കെയാണ് കാനഡ വിസ അപേക്ഷ നിരസിച്ചത്. വിചാരണ പൂർത്തിയാകുന്നതുവരെ ഒരാളെ കുറ്റക്കാരനായി കാണാനാകില്ലെന്നും നിരപരാധിത്വം തെളിയിക്കാൻ താരത്തിന് അവകാശമുണ്ടെന്നും ഘാന സർക്കാർ ചൂണ്ടിക്കാണിക്കുന്നു.

നിലവിൽ അമേരിക്കയിലെ റോഡ് ഐലൻഡിലുള്ള സ്മിത്ത്ഫീൽഡ് ബേസ് ക്യാമ്പിലാണ് ഘാന ടീം പരിശീലനം നടത്തുന്നത്. ജൂൺ 17-ന് ടൊറന്റോയിൽ പനാമയ്ക്കെതിരെ നടക്കുന്ന നിർണായകമായ ഉദ്ഘാടന മത്സരത്തിൽ പങ്കെടുക്കാനായി ടീമിനൊപ്പം യാത്ര തിരിക്കേണ്ടതായിരുന്നു തോമസ് പാർട്ടി. എന്നാൽ വിസ ലഭിക്കാത്ത സാഹചര്യത്തിൽ താരത്തിന് കാനഡയിലേക്ക് യാത്ര ചെയ്യാനാകില്ല. ഇത് ഘാനയുടെ മത്സരക്രമങ്ങളെയും തന്ത്രങ്ങളെയും കാര്യമായി ബാധിക്കുമെന്നാണ് വിലയിരുത്തൽ.

അതേസമയം, രാജ്യത്തെ നിയമങ്ങൾ എല്ലാവർക്കും ഒരുപോലെയാണെന്ന നിലപാടിലാണ് കനേഡിയൻ ഇമിഗ്രേഷൻ വിഭാഗം. അന്താരാഷ്ട്ര കായിക മേളകൾക്കോ വലിയ പരിപാടികൾക്കോ ആതിഥേയത്വം വഹിക്കുന്നു എന്നതുകൊണ്ട് രാജ്യത്തെ വിസ നിയമങ്ങളിൽ ഇളവ് വരുത്താനാകില്ലെന്ന് അധികൃതർ വ്യക്തമാക്കി. ഓരോ അപേക്ഷയും കൃത്യമായ മാനദണ്ഡങ്ങൾ പരിശോധിച്ചാണ് തീരുമാനിക്കുന്നതെന്നും അവർ കൂട്ടിച്ചേർത്തു. കേസിന്റെ വിചാരണ നവംബറിലോ അതിനുശേഷമോ നടക്കാനിരിക്കെ, നിലവിലെ പ്രതിസന്ധി പരിഹരിക്കാൻ നയതന്ത്രപരവും ഭരണപരവുമായ എല്ലാ വഴികളും തേടുമെന്ന് ഘാന വ്യക്തമാക്കിയിട്ടുണ്ട്. കാനഡയുടെ തീരുമാനത്തിനെതിരെ അന്താരാഷ്ട്ര തലത്തിൽ നിയമപോരാട്ടത്തിനാണ് ഘാന ഇപ്പോൾ ഒരുങ്ങുന്നത്.

'The law won't change even if it's a big sporting event'; Canada denies visa to footballer Thomas Partey; Ghana takes legal action

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt