സമ്പന്നരും ദരിദ്രരും തമ്മിലുള്ള വിടവ് വർദ്ധിക്കുന്നു; കാനഡയിലെ പുതിയ സാമ്പത്തിക റിപ്പോർട്ട് പറയുന്നത് ഇങ്ങനെ!

ഒട്ടാവ: കാനഡയിലെ സമ്പന്നരും ദരിദ്രരും തമ്മിലുള്ള സാമ്പത്തിക വിടവ് 2025-ൽ വീണ്ടും വർദ്ധിച്ചതായി സ്റ്റാറ്റിസ്റ്റിക്സ് കാനഡ അറിയിച്ചു. സാമ്പത്തിക വിപണിയിലുണ്ടായ നേട്ടങ്ങൾ, കുറഞ്ഞ പലിശ നിരക്കുകൾ, തൊഴിൽ വിപണിയിലെ മാന്ദ്യം എന്നിവയാണ് ഈ മാറ്റത്തിന് പ്രധാന കാരണങ്ങളായി ചൂണ്ടിക്കാണിക്കപ്പെടുന്നത്. ഏറ്റവും ഉയർന്ന വരുമാനമുള്ള 40 ശതമാനം കുടുംബങ്ങളും ഏറ്റവും കുറഞ്ഞ വരുമാനമുള്ള 40 ശതമാനം കുടുംബങ്ങളും തമ്മിലുള്ള അന്തരത്തിൽ 46.7 ശതമാനത്തിന്റെ വർദ്ധനവ് രേഖപ്പെടുത്തി. മുൻവർഷം ഇത് 46.4 ശതമാനമായിരുന്നുവെന്നും റിപ്പോർട്ടുകൾ വ്യക്തമാക്കുന്നു.

രാജ്യത്തെ മൊത്തം ആസ്തിയുടെ 65.7 ശതമാനവും ജനസംഖ്യയുടെ 20 ശതമാനം വരുന്ന സമ്പന്നരുടെ കൈവശമാണെന്ന് സ്റ്റാറ്റിസ്റ്റിക്സ് കാനഡ വ്യക്തമാക്കി. ഇവരുടെ ശരാശരി ആസ്തി ഒരു കുടുംബത്തിന് 3.5 മില്യൺ ഡോളറാണ്. അതേസമയം, ജനസംഖ്യയുടെ താഴെ തട്ടിലുള്ള 40 ശതമാനം ആളുകളുടെ പക്കൽ രാജ്യത്തെ മൊത്തം സമ്പത്തിന്റെ മൂന്ന് ശതമാനം മാത്രമാണുള്ളത്. ഈ വിഭാഗത്തിലെ ശരാശരി ആസ്തി ഒരു കുടുംബത്തിന് 81,650 ഡോളറാണെന്നും ഔദ്യോഗിക കണക്കുകൾ വ്യക്തമാക്കുന്നു.

ഏറ്റവും കുറഞ്ഞ വരുമാനമുള്ള കുടുംബങ്ങളിലെ വേതന വർദ്ധനവ് ശരാശരിയേക്കാൾ താഴെയാണെന്നും നിക്ഷേപങ്ങളിൽ നിന്നുള്ള വരുമാനം കുറഞ്ഞതായും ഏജൻസി അറിയിച്ചു. പലിശ നിരക്കിലുണ്ടായ കുറവ് മൂലം സമ്പാദ്യങ്ങളിൽ നിന്നുള്ള ലാഭം ഇടിഞ്ഞത് ഈ വിഭാഗത്തെ ബാധിച്ചു. സമ്പന്നരായ 20 ശതമാനവും ദരിദ്രരായ 40 ശതമാനവും തമ്മിലുള്ള ആസ്തി വിടവ് 2025 അവസാനത്തോടെ 62.7 ശതമാനമായി ഉയർന്നു. മുൻവർഷത്തെ അപേക്ഷിച്ച് 0.6 ശതമാനത്തിന്റെ വർദ്ധനവാണ് ഇതിലുണ്ടായതെന്നും സ്റ്റാറ്റിസ്റ്റിക്സ് കാനഡയുടെ റിപ്പോർട്ടിൽ പറയുന്നു.

വർദ്ധിച്ചുവരുന്ന സാമ്പത്തിക വിഭജനം ഉപഭോക്താക്കളുടെ സാമ്പത്തിക സർവേകളിലും പ്രതിഫലിക്കുന്നതായി ഇൻസോൾവൻസി സ്ഥാപനമായ എംഎൻപി ലിമിറ്റഡ് വ്യക്തമാക്കി. നിലവിലെ സാഹചര്യത്തിൽ കാനഡക്കാർ ചെലവ് ചുരുക്കാൻ ശ്രദ്ധിക്കുന്നുണ്ടെങ്കിലും സാമ്പത്തിക സമ്മർദ്ദം അസമമായി തുടരുകയാണെന്ന് എംഎൻപി പ്രസിഡന്റ് ഗ്രാന്റ് ബാസിയൻ അറിയിച്ചു. പലർക്കും പ്രതിമാസ ബില്ലുകളും കടങ്ങളും തിരിച്ചടയ്ക്കാൻ മതിയായ വരുമാനം ലഭിക്കുന്നില്ലെന്നും വലിയ സാമ്പത്തിക തീരുമാനങ്ങളിൽ നിന്ന് ജനങ്ങൾ വിട്ടുനിൽക്കുകയാണെന്നും അദ്ദേഹം കൂട്ടിച്ചേർത്തു.

The gap between rich and poor is widening; Canada’s new economic report says this!

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt