ക്യുബെക് സിറ്റി: സോഷ്യൽ മീഡിയ പ്ലാറ്റ്ഫോമുകളിലൂടെ കൗമാരക്കാരെ ലക്ഷ്യമിട്ട് ഭീകരവാദ ആശയങ്ങൾ പ്രചരിപ്പിക്കുകയും റിക്രൂട്ട്മെന്റ് നടത്തുകയും ചെയ്ത സംഭവത്തിൽ കാനഡയിൽ യുവാവ് അറസ്റ്റിൽ. ക്യുബെക് സിറ്റി സ്വദേശിയായ ജെഫ്രി റൂസൽ (26) ആണ് പിടിയിലായത്. അന്താരാഷ്ട്ര തലത്തിൽ നിരോധിക്കപ്പെട്ട ‘764’ എന്ന ഭീകരവാദ ശൃംഖലയുടെ ആശയങ്ങൾ പ്രചരിപ്പിച്ചതിനാണ് റോയൽ കനേഡിയൻ മൗണ്ടഡ് പോലീസ് (RCMP) ഇയാളെ പിടികൂടിയത്.
തീവ്രവാദ പ്രവർത്തനങ്ങളിൽ പങ്കാളിയാവുക, ഭീകരവാദത്തിന് സഹായം നൽകുക, ക്രിമിനൽ ഗൂഢാലോചന തുടങ്ങിയ ഗുരുതരമായ കുറ്റങ്ങളാണ് ഇയാൾക്കെതിരെ ചുമത്തിയിരിക്കുന്നത്. ബുധനാഴ്ച ക്യുബെക് സിറ്റി കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. കഴിഞ്ഞ ചൊവ്വാഴ്ചയാണ് ഇയാളെ പോലീസ് കസ്റ്റഡിയിലെടുത്തത്.
കുട്ടികൾക്കും കൗമാരക്കാർക്കും ഇടയിൽ പ്രചാരമുള്ള റോബ്ലോക്സ് (Roblox), ഡിസ്കോർഡ് (Discord), മൈൻക്രാഫ്റ്റ് (Minecraft), ടെലിഗ്രാം (Telegram) തുടങ്ങിയ പ്ലാറ്റ്ഫോമുകൾ കേന്ദ്രീകരിച്ചാണ് ഈ ഭീകരവാദ സംഘം പ്രവർത്തിക്കുന്നതെന്ന് അന്വേഷണസംഘം കണ്ടെത്തി. ടെലിഗ്രാമിലൂടെ അത്യന്തം ക്രൂരവും അക്രമാസക്തവുമായ ദൃശ്യങ്ങൾ പ്രചരിപ്പിച്ച് കുട്ടികളെ മാനസികമായി സ്വാധീനിക്കാനാണ് ജെഫ്രി റൂസൽ ശ്രമിച്ചതെന്ന് സംയോജിത ദേശീയ സുരക്ഷാ എൻഫോഴ്സ്മെന്റ് ടീം (INSET) വ്യക്തമാക്കി.
ലോകമെമ്പാടുമുള്ള കുട്ടികളെയും യുവാക്കളെയും ലക്ഷ്യം വച്ച് പ്രവർത്തിക്കുന്ന അപകടകാരികളായ ഒരു വിദേശ ഭീകരവാദ ശൃംഖലയാണിത്. കഴിഞ്ഞ ഡിസംബറിലാണ് കാനഡ ഈ സംഘടനയെ ഭീകരവാദ പട്ടികയിൽ ഉൾപ്പെടുത്തിയത്. ഇന്റർനെറ്റിലൂടെയും നേരിട്ടും അക്രമങ്ങൾ നടത്താൻ യുവാക്കളെ പ്രേരിപ്പിക്കുകയും അവരെ തീവ്രവാദ ആശയങ്ങളിലേക്ക് നയിക്കുകയുമാണ് ഇവരുടെ ലക്ഷ്യം. പ്രൊപ്പഗണ്ട വീഡിയോകൾ വഴി കുട്ടികളെ വലയിലാക്കുന്ന രീതിയാണ് ഇവർ പിന്തുടരുന്നത്.
ഓൺലൈൻ ഇടങ്ങളിൽ മക്കൾ ആരുമായൊക്കെ ആശയവിനിമയം നടത്തുന്നു എന്ന കാര്യത്തിൽ മാതാപിതാക്കൾ അതീവ ജാഗ്രത പാലിക്കണമെന്ന് ആർ.സി.എം.പി (RCMP) മുന്നറിയിപ്പ് നൽകി. ഇത്തരം സംഘങ്ങൾ ഇരകളെ കണ്ടെത്താൻ ഉപയോഗിക്കുന്ന തന്ത്രങ്ങളെക്കുറിച്ച് ഔദ്യോഗിക വെബ്സൈറ്റിലൂടെ പോലീസ് വിവരങ്ങൾ പങ്കുവെച്ചിട്ടുണ്ട്. സംശയാസ്പദമായ നീക്കങ്ങൾ ശ്രദ്ധയിൽപ്പെട്ടാൽ ഉടൻ തന്നെ ദേശീയ സുരക്ഷാ ഇൻഫർമേഷൻ നെറ്റ്വർക്കിനെയോ എമർജൻസി നമ്പറുകളിലോ വിവരം അറിയിക്കണമെന്നും അധികൃതർ അറിയിച്ചു.
Terrorist recruitment targeting the younger generation; 26-year-old arrested in Canada,
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
