ടൊറന്റോയിൽ ഭവന നയത്തെക്കുറിച്ചുള്ള വാർത്താസമ്മേളനത്തിനിടെ പ്രസംഗപീഠത്തിലെ ടെലിപ്രോംപ്റ്റർ പെട്ടെന്ന് പ്രവർത്തനം നിലച്ചപ്പോൾ, ചിരിച്ചുകൊണ്ട് അമേരിക്കൻ പ്രസിഡന്റ് ഡൊണാൾഡ് ട്രംപിനെതിരെ കടുത്ത പരിഹാസവുമായി കനേഡിയൻ പ്രധാനമന്ത്രി മാർക്ക് കാർണി. “ടെലിപ്രോംപ്റ്ററിന്റെ പ്രവർത്തനം നിലച്ച കാര്യം നിങ്ങളെ അറിയിക്കാൻ ഞാൻ ആഗ്രഹിക്കുന്നു. എന്നാൽ ചില ലോകനേതാക്കളെപ്പോലെ ഇതിനെയൊരു ഗൂഢാലോചനയായി ഞാൻ കാണുന്നില്ല,” എന്ന് പുഞ്ചിരിയോടെ കാർണി പറഞ്ഞപ്പോൾ വാർത്താസമ്മേളനത്തിൽ ചിരി പടർന്നു. സാങ്കേതിക തകരാറിനെപ്പോലും രാഷ്ട്രീയ നിരീക്ഷണങ്ങൾക്കായി നയതന്ത്രപരമായി ഉപയോഗപ്പെടുത്തുകയായിരുന്നു കനേഡിയൻ പ്രധാനമന്ത്രി.
കഴിഞ്ഞ വർഷം ഐക്യരാഷ്ട്രസഭയുടെ പൊതുസഭയിൽ പ്രസംഗിക്കവേ എസ്കലേറ്റർ നിലച്ചതിനും ടെലിപ്രോംപ്റ്റർ തകരാറിലായതിനും പിന്നിൽ ഗൂഢാലോചനയുണ്ടെന്നും അതിന്മേൽ അന്വേഷണം വേണമെന്നും ട്രംപ് ആവശ്യപ്പെട്ടിരുന്നു. ഈ സംഭവത്തെ പരോക്ഷമായി പരാമർശിച്ചാണ് കാർണി ട്രംപിനെ പരിഹസിച്ചത്. ട്രംപ് വീണ്ടും വൈറ്റ് ഹൗസിലെത്തിയ ശേഷം കാനഡയിൽ നിന്നുള്ള ഉൽപ്പന്നങ്ങൾക്ക് കനത്ത തീരുവ ചുമത്തുകയും കാനഡ അമേരിക്കയുടെ 51-ാമത് സംസ്ഥാനമാകണമെന്ന് ആവശ്യപ്പെടുകയും ചെയ്തതോടെ ഇരുരാജ്യങ്ങളും തമ്മിലുള്ള നയതന്ത്രബന്ധം ഏറെ വഷളായ പശ്ചാത്തലത്തിലാണ് ഈ പരാമർശം ഉണ്ടാകുന്നത്.
അമേരിക്കൻ വ്യാപാര നയങ്ങളെ ശക്തമായി ചെറുക്കുമെന്ന് വ്യക്തമാക്കിയ കാർണി, യു.എസിനോടുള്ള കാനഡയുടെ സാമ്പത്തിക നയതന്ത്ര ആശ്രയത്വം കുറയ്ക്കുന്നതിനുള്ള നടപടികൾ സ്വീകരിച്ചു വരികയാണ്. അധിഷ്ഠിത ആഗോളക്രമം തകർന്നതായി പ്രഖ്യാപിക്കുകയും വൻശക്തികൾ സാമ്പത്തിക സംയോജനത്തെ ആയുധമാക്കുന്നതിനെ വിമർശിക്കുകയും ചെയ്തതിലൂടെ കാർണി അന്താരാഷ്ട്ര തലത്തിൽ ശ്രദ്ധ നേടിയിട്ടുണ്ട്. പുതിയ പരാമർശത്തെക്കുറിച്ച് കനേഡിയൻ പ്രധാനമന്ത്രിയുടെ ഓഫീസോ വൈറ്റ് ഹൗസോ ഔദ്യോഗികമായി പ്രതികരിച്ചിട്ടില്ലെങ്കിലും, നയതന്ത്രരംഗത്തെ സംഘർഷങ്ങൾ കൊടുമ്പിരി കൊള്ളുന്ന സമയത്തുള്ള ഈ കൗതുകകരമായ നീക്കം വലിയ വാർത്താപ്രാധാന്യമാണ് നേടിയിരിക്കുന്നത്.
Mark Carney Mocks Donald Trump Over Teleprompter Failure
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
