അഞ്ച് വർഷത്തെ ഇടവേളയ്ക്ക് ശേഷം, Edmonton Expo Centre “Auto Experience” എന്ന പേരിൽ ഓട്ടോമൊബൈൽ പ്രദർശനം പുനരാരംഭിച്ചു. റേസിംഗ് വാഹനങ്ങൾ, ട്യൂണറുകൾ, ടെസ്റ്റ് ഡ്രൈവുകൾ എന്നിവയുൾപ്പെടെ അത്യാധുനിക ഡ്രൈവിംഗ് സാങ്കേതികവിദ്യകൾ ഇവിടെ പ്രദർശിപ്പിക്കുന്നു. YEG മോട്ടോർസൈക്കിൾ ഷോയുമായുള്ള പങ്കാളിത്തവും ഇത്തവണത്തെ പ്രത്യേകതയാണ്. നാല് ദിവസമാണ് മേള നടക്കുന്നത്.
എന്നാൽ, ഓട്ടോ എക്സ്പീരിയൻസിൻ്റെ തിരിച്ചുവരവ് വാഹന വ്യവസായത്തെ ബാധിക്കുന്ന പുതിയ നികുതികളെക്കുറിച്ചുള്ള ആശങ്കകൾക്കിടയിലാണ്. ഏപ്രിൽ 3-ന്, വിദേശത്ത് നിർമ്മിച്ച വാഹനങ്ങൾക്ക് യു.എസ് 25 ശതമാനം നികുതി ചുമത്തി. ഇതിന് മറുപടിയായി അമേരിക്കൻ നിർമ്മിത കാറുകൾക്ക് കാനഡയും അതേ നിരക്കിൽ നികുതി ഏർപ്പെടുത്തി. Canada-United States-Mexico -Agreement ഉടമ്പടി (CUSMA) പ്രകാരം ചില ഒഴിവാക്കലുകൾ നിലവിലുണ്ടെങ്കിലും, വ്യവസായം ദ്രുതഗതിയിലുള്ള നയപരമായ മാറ്റങ്ങളുമായി പൊരുത്തപ്പെടാൻ ശ്രമിക്കുകയാണ്. മെയ് 3 മുതൽ പ്രാബല്യത്തിൽ വരുന്ന പാർട്സുകളുടെ നികുതിയെക്കുറിച്ചും ആശങ്കയുണ്ട്.
പ്രദർശനത്തിനെത്തിയ ഡീലർമാർ, ഈ മാറ്റങ്ങൾക്കിടയിലും ഉപഭോക്താക്കൾക്ക് ആവശ്യമായ വിവരങ്ങൾ നൽകി സഹായിക്കാൻ ശ്രമിക്കുന്നുണ്ട്. വർദ്ധിച്ചുവരുന്ന ചിലവും കുറഞ്ഞ ഉത്പാദനവും ഉടൻ തന്നെ വില വർദ്ധനവിന് കാരണമാകുമെന്ന് വിദഗ്ദ്ധർ മുന്നറിയിപ്പ് നൽകുന്നു. “ഇന്നത്തെ വില നാളെയുമുണ്ടാകുമെന്ന് ഉറപ്പ് പറയാൻ കഴിയില്ല” എന്ന് ഒരു ഡീലർ പറഞ്ഞതായി റിപ്പോർട്ടുകളുണ്ട്. അതിനാൽ ഉപഭോക്താക്കൾ എത്രയും പെട്ടെന്ന് തീരുമാനമെടുക്കാൻ ശ്രമിക്കണമെന്ന് നിർദ്ദേശിക്കുന്നു.
