ക്യുബെക്കിൽ പഠിക്കാൻ ഇനി ചെലവേറും; പഠനച്ചെലവ് വർദ്ധിപ്പിച്ച് യുഎസ് താരിഫ് യുദ്ധം

ക്യുബെക്ക്: അന്താരാഷ്ട്ര വിദ്യാർത്ഥികൾക്ക് ക്യുബെക്ക് പ്രവിശ്യയിൽ സർവകലാശാലാ പഠനത്തിനുള്ള ചെലവ് വർധിക്കുന്നതായി റിപ്പോർട്ട്. യു.എസ്. ഏർപ്പെടുത്തിയ താരിഫ് യുദ്ധമാണ് വിദ്യാർത്ഥികൾക്ക് തിരിച്ചടിയാകുന്നത്. താരിഫ് ഏർപ്പെടുത്തിയതോടെ കോളേജ് വിദ്യാർത്ഥികൾക്ക് താമസത്തിനും ഭക്ഷണത്തിനും ആവശ്യമായ പഠന സാമഗ്രികൾക്കും ഉൾപ്പെടെ എല്ലാറ്റിനും വില വർധിച്ചു. ക്യുബെക്ക് സർവകലാശാലാ വിദ്യാർത്ഥികളുടെ പഠനച്ചെലവ് ഓരോരുത്തർക്കും വ്യത്യസ്തമായിരിക്കും.

സ്വന്തം വീട്ടിൽ താമസിക്കുന്ന ഒരാളുടെയും ഹോസ്റ്റലിൽ താമസിക്കുന്ന ഒരാളുടെയും പഠനച്ചെലവിൽ വലിയ വ്യത്യാസമുണ്ടാകും. രക്ഷിതാക്കളുടെ സാമ്പത്തിക സ്ഥിതിയും ഏത് കോഴ്സിനാണ് ചേരുന്നത് എന്നതും പഠനച്ചെലവിനെ കാര്യമായി ബാധിക്കും. 2025-ൽ ഒരു വിദ്യാർത്ഥിക്ക് താമസത്തിനും ഭക്ഷണത്തിനും ഉൾപ്പെടെ ഏകദേശം $21,631 വരെ ചെലവ് വരുമെന്നാണ് യൂണിവേഴ്സിറ്റി ഡു ക്യുബെക്ക് മോൺട്രിയൽ (UQAM) പുറത്തുവിട്ട റിപ്പോർട്ടിൽ പറയുന്നത്.

ക്യുബെക്ക് സർവകലാശാലയിലെ വിദ്യാർത്ഥികളുമായി നടത്തിയ അഭിമുഖത്തിൽ, കോഴ്സിനനുസരിച്ച് ഒരു വിദ്യാർത്ഥിക്ക് ഒരു വർഷം $2,000 മുതൽ $35,000 വരെ ട്യൂഷൻ ഫീസ് ചെലവ് വരുന്നുണ്ടെന്ന് പറയുന്നു. അന്താരാഷ്ട്ര വിദ്യാർത്ഥികൾക്ക് ഇത് ഒരു വർഷം $25,000 മുതൽ $56,000 വരെയാകും. 2024-ൽ ക്യുബെക്ക് സർക്കാർ അന്താരാഷ്ട്ര വിദ്യാർത്ഥികൾക്ക് നിർബന്ധിത ട്യൂഷൻ ഫീസായി കുറഞ്ഞത് $20,000 നിശ്ചയിച്ചതിനു ശേഷമാണിത്.

സാമ്പത്തിക ശാസ്ത്രജ്ഞനായ ഇമ്മാനുവൽ ഫോബെർട്ടിന്റെ അഭിപ്രായത്തിൽ, ഡൊണാൾഡ് ട്രംപിന്റെ താരിഫ് യുദ്ധം വിദ്യാഭ്യാസ മേഖലയിലും വിലക്കയറ്റത്തിന് കാരണമായി. “താരിഫ് യുദ്ധം കാരണം പഠന സാമഗ്രികൾക്ക് മാത്രമല്ല, വാടക, ഭക്ഷണം, യാത്രാചെലവുകൾ എന്നിവയ്ക്കും വില വർധിച്ചു. താരിഫുകളും കൗണ്ടർ താരിഫുകളും കാരണം ഭക്ഷണസാധനങ്ങൾക്കാണ് ഏറ്റവും കൂടുതൽ വില വർധിച്ചത്,” അദ്ദേഹം കൂട്ടിച്ചേർത്തു.

കാനഡയ്ക്കും അമേരിക്കയ്ക്കും ഇടയിലുള്ള ഉൽപ്പന്നങ്ങളുടെ ഇറക്കുമതിയിലും ഗതാഗതത്തിലുമുണ്ടായ തടസ്സങ്ങളും വില വർധനവിന് കാരണമായി. ഫ്രാൻസ്, ജർമ്മനി തുടങ്ങിയ യൂറോപ്യൻ രാജ്യങ്ങളിൽ സർക്കാർ ധനസഹായത്തോടെ വിദ്യാർത്ഥികൾക്ക് സൗജന്യ വിദ്യാഭ്യാസം നൽകുന്നുണ്ട്. 2022-ൽ Institute of Socioeconomic Research and Information (IRIS) നടത്തിയ പഠനത്തിൽ ക്യുബെക്കിൽ സൗജന്യ സർവകലാശാലാ വിദ്യാഭ്യാസം നൽകാൻ പ്രതിവർഷം $1.2 ബില്യൺ ചെലവ് വരുമെന്ന് കണക്കാക്കുന്നു.

വിദ്യാഭ്യാസം എന്നത് ഭാവിയുടെ വാതിലാണ്. എന്നാൽ, ഭാവിയുടെ വാതിൽ തുറക്കാൻ സാമ്പത്തിക ശേഷി ഇല്ലാത്തവർക്ക് കൂടുതൽ കടക്കെണിയിലേക്ക് വീഴേണ്ടിവരുന്ന അവസ്ഥയാണ് ഇപ്പോഴുള്ളത്. ഇത് സാധാരണ വിദ്യാർത്ഥികളുടെ സ്വപ്നങ്ങൾക്ക് മങ്ങലേൽപ്പിക്കും. കടക്കെണിയുടെ ഭാരം ചുമക്കേണ്ടി വരുന്ന അവസ്ഥ ഒരു വിദ്യാർത്ഥിയുടെ പഠനത്തെയും ഭാവിയെയും പ്രതികൂലമായി ബാധിച്ചേക്കാം. അവരുടെ സ്വപ്നങ്ങളും ആഗ്രഹങ്ങളും തകർന്നുപോകുന്ന കാഴ്ചയായിരിക്കും നമുക്ക് കാണാൻ സാധിക്കുക.