മോൺട്രിയൽ: വോട്ടർമാർക്കുള്ള വിവരങ്ങൾ ഫ്രഞ്ച് ഭാഷയിൽ മാത്രം നൽകുന്നത് വോട്ടെടുപ്പിനെ ബാധിക്കുമെന്നും, അതിനാൽ ഭാഷാ നിയമങ്ങളിൽ മാറ്റം വരുത്തണമെന്നും ക്യുബെക്കിലെ തിരഞ്ഞെടുപ്പ് ഏജൻസിയായ ‘Élections Québec’ സർക്കാരിനോട് ആവശ്യപ്പെട്ടു. 2026-ലെ തിരഞ്ഞെടുപ്പിന് മുന്നോടിയായി, 2023 മുതൽ 2025 വരെയുള്ള കാലയളവിൽ ഏജൻസി ഡയറക്ടർ ജീൻ-ഫ്രാൻസ്വാ ബ്ലാൻഷെ സർക്കാരിന് അയച്ച കത്തുകളിലാണ് ഈ കാര്യം വ്യക്തമാക്കുന്നത്. 2022-ൽ കൊണ്ടുവന്ന പുതിയ നിയമപ്രകാരം സർക്കാർ സ്ഥാപനങ്ങളുടെ ഔദ്യോഗിക ഭാഷ ഫ്രഞ്ച് മാത്രമാക്കിയിരുന്നു. എന്നാൽ തിരഞ്ഞെടുപ്പ് രേഖകൾക്ക് ഇതിൽ ഇളവ് നൽകാൻ സർക്കാർ തയ്യാറായില്ല.
എല്ലാ വോട്ടർമാർക്കും ഇംഗ്ലീഷിൽ വിവരങ്ങൾ ലഭിച്ചില്ലെങ്കിൽ അത് അവരുടെ വോട്ടവകാശത്തെ ബാധിക്കുമെന്നും, പിന്നീട് തിരഞ്ഞെടുപ്പ് ഫലം തന്നെ ചോദ്യം ചെയ്യപ്പെടാൻ ഇടയാകുമെന്നും ഏജൻസി മുന്നറിയിപ്പ് നൽകിയിരുന്നു. ഇതിനെത്തുടർന്ന്, വിവരങ്ങൾ ഇംഗ്ലീഷിലും നൽകണം എന്ന് ആവശ്യപ്പെട്ട് ചില ഭാഷാ അവകാശ സംഘടനകൾ കോടതിയെ സമീപിച്ചു. സെപ്റ്റംബർ 16-നകം കോടതിയിൽ നിന്ന് അനുകൂല തീരുമാനം വന്നാൽ ഇംഗ്ലീഷിലുള്ള കാർഡുകൾ അയക്കാൻ തയ്യാറാണെന്ന് ഏജൻസിയുടെ അഭിഭാഷകൻ അറിയിച്ചിട്ടുണ്ട്. സെപ്റ്റംബർ 17-ന് സ്ഥാനാർഥികളുടെ അന്തിമ പട്ടിക വരാനിരിക്കുകയാണ്.
Also Read : കാനഡ ചൈൽഡ് ബെനഫിറ്റ്: അടുത്ത പേയ്മെന്റ് സെപ്റ്റംബർ 18-ന്, തുകയിൽ മാറ്റം
ദ്വിഭാഷാ കാർഡുകൾ അയക്കാനുള്ള താൽക്കാലിക അനുമതി നീട്ടി നൽകില്ലെന്ന് സർക്കാർ ഉറപ്പിച്ചു പറഞ്ഞതോടെ, ഇത്തവണത്തെ വോട്ടർ ഗൈഡുകൾ ഫ്രഞ്ച് ഭാഷയിൽ മാത്രമാണ് അച്ചടിച്ച് വിതരണം ചെയ്തത്. എന്നാൽ ഇംഗ്ലീഷിൽ വിവരങ്ങൾ ആവശ്യമുള്ളവർക്കായി ഗൈഡിൽ ഒരു QR കോഡ് ഉൾപ്പെടുത്തിയിട്ടുണ്ട്. കൂടാതെ ഇംഗ്ലീഷ് വിദ്യാഭ്യാസത്തിന് അർഹതയുള്ളവർക്കും ഫസ്റ്റ് നേഷൻ വിഭാഗത്തിൽപ്പെട്ടവർക്കും നേരിട്ട് ഏജൻസിയെ ബന്ധപ്പെട്ട് വിവരങ്ങൾ വാങ്ങാവുന്നതാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
