അപ്പാർട്ട്മെന്റിൽ ഇലക്ട്രിക് വണ്ടി ചാർജ് ചെയ്തു ‘വൈദ്യുതി മോഷണത്തിന്’ പിഴ; ബ്രിട്ടീഷ് കൊളംബിയയിൽ നിയമപോരാട്ടം, ഒടുവിൽ കോടതിയിൽ നീതി

വാങ്കൂവർ: അപ്പാർട്ട്മെന്റ് പാർക്കിംഗിലെ പ്ലഗ് പോയിന്റിൽ നിന്നും ഇലക്ട്രിക് വാഹനം ചാർജ് ചെയ്തതിന് ‘വൈദ്യുതി മോഷണം’ ആരോപിച്ച് താമസക്കാരന് മേൽ ചുമത്തിയ പിഴ കോടതി റദ്ദാക്കി. കാനഡയിലെ ബ്രിട്ടീഷ് കൊളംബിയയിലാണ് വിചിത്രമായ ഈ നിയമപോരാട്ടം നടന്നത്. ചിക്കി ലായ് എന്ന താമസക്കാരന് മേൽ കെട്ടിട ഉടമകളുടെ സംഘടന (Strata) ചുമത്തിയ 200 ഡോളർ പിഴയാണ് സിവിൽ റെസല്യൂഷൻ ട്രൈബ്യൂണൽ ഒഴിവാക്കി ഉത്തരവിട്ടത്.

2024-ലാണ് കേസിനാസ്പദമായ സംഭവം നടന്നത്. കെട്ടിടത്തിലെ പൊതുവായ ഇലക്ട്രിക് ഔട്ട്‌ലെറ്റ് ഉപയോഗിച്ച് അനുവാദമില്ലാതെ കാർ ചാർജ് ചെയ്തു എന്നായിരുന്നു സ്ട്രാറ്റ കൗൺസിലിന്റെ വാദം. എന്നാൽ പാർക്കിംഗിലെ ഔട്ട്‌ലെറ്റുകൾ ഉപയോഗിക്കാൻ നേരത്തെ അനുമതി ഉണ്ടായിരുന്നുവെന്നും, താൻ അനുവാദം ചോദിച്ചപ്പോൾ കൃത്യമായ മറുപടി നൽകാതെ അധികൃതർ ഒഴിഞ്ഞുമാറുകയായിരുന്നുവെന്നും ലായ് കോടതിയിൽ ചൂണ്ടിക്കാട്ടി. മൂന്ന് ഇലക്ട്രിക് വാഹനങ്ങൾ ഒരേസമയം ചാർജ് ചെയ്തപ്പോൾ സർക്യൂട്ട് ബ്രേക്കർ പ്രവർത്തനരഹിതമായതോടെയാണ് വിഷയം സങ്കീർണ്ണമായത്. ലായ് ക്യൂ തെറ്റിച്ചാണ് ചാർജ് ചെയ്തതെന്നും ഇത് സുരക്ഷാ ഭീഷണിയാണെന്നും കാണിച്ച് അധികൃതർ പിഴ ചുമത്തുകയായിരുന്നു.

കേസ് പരിഗണിച്ച ട്രൈബ്യൂണൽ അംഗം ജെ. ഗാർത്ത് കാംബ്രി സ്ട്രാറ്റ കൗൺസിലിന്റെ നടപടിയെ രൂക്ഷമായി വിമർശിച്ചു. കെട്ടിടത്തിലെ പൊതു വൈദ്യുതി സ്രോതസ്സുകൾ ഉപയോഗിക്കുന്നത് വിലക്കിക്കൊണ്ടുള്ള കൃത്യമായ നിയമം ആ സമയത്ത് നിലവിലുണ്ടായിരുന്നില്ലെന്ന് കോടതി കണ്ടെത്തി. അത്തരമൊരു നിയമം ഇല്ലാത്തിടത്തോളം കാലം ഉടമയ്ക്ക് വൈദ്യുതി ഉപയോഗിക്കാമെന്നും പിഴ ചുമത്തുന്നതിന് മുൻപ് പാലിക്കേണ്ട നടപടിക്രമങ്ങൾ അധികൃതർ ലംഘിച്ചതായും കോടതി നിരീക്ഷിച്ചു.

അതേസമയം, തർക്കം തുടരുന്നതിനിടെ നടത്തിയ സാങ്കേതിക പരിശോധനയിൽ പഴയ പ്ലഗ് പോയിന്റുകൾ വഴി കാർ ചാർജ് ചെയ്യുന്നത് സുരക്ഷിതമല്ലെന്ന് കണ്ടെത്തിയിരുന്നു. ഇതേത്തുടർന്ന് 2024 ജൂണിൽ പാർക്കിംഗിലെ ഔട്ട്‌ലെറ്റുകൾ വഴിയുള്ള ചാർജിംഗ് സ്ട്രാറ്റ കൗൺസിൽ ഔദ്യോഗികമായി നിരോധിച്ചു. ഈ പുതിയ നിയമം സാധുവാണെന്ന് കോടതി അംഗീകരിച്ചു. അതിനാൽ പഴയ പിഴ ഒഴിവാക്കി നൽകിയെങ്കിലും, തുടർന്നും അവിടെ ചാർജ് ചെയ്യാൻ അനുവദിക്കണമെന്ന ലായിയുടെ ആവശ്യം കോടതി തള്ളി. ഭാവിയിൽ എല്ലാ ഉടമകൾക്കും സുരക്ഷിതമായി ചാർജ് ചെയ്യാൻ കഴിയുന്ന പുതിയ സംവിധാനം ജനാധിപത്യപരമായി നടപ്പിലാക്കാൻ സ്ട്രാറ്റയ്ക്ക് കോടതി സമയം അനുവദിച്ചു.

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla

‘Stealing electricity’: Man fined for charging EV in condo parkade, B.C. tribunal hears